މިސްރުގެ މަގްބޫލް ސޯޝަަލް މީޑިއާ އިންފްލުއެންސަރެއް ހެދި ވީޑިއޯއެއްގެ މައްސަލައިގައި ސައުދީ އަރަބިއްޔާއިން އޭނާ ހައްޔަރުކޮށްފި އެވެ.

ޓިކްޓޮކްގައި ފަސް މިލިއަން މީހުން ތަލާ ސަފްވާން ފޮލޯކުރެ އެވެ. އަދި އޭނާގެ ޔޫޓިއުބް ޗެނަލަށް 800،000 އަށް ވުރެ ގިނަ މީހުން ސަބްސްކްރައިބްކޮށްފައިވެ އެވެ.

އޭނާ ހައްޔަރު ކުރީ ދާދި ފަހުން ޕޯސްޓު ކުރި ވީޑިއޯއެއްގައި އެއް ޖިންސުން ގުޅުން ހިންގަން ހިތްވަރުދޭ ކަމަށް ބެލެވޭތީ އެވެ. އެކަމަކު އެއީ އެ ވީޑިއޯގެ މަގްސަދު ނޫން ކަމަށް ސަފްވާން ބުނެ އެވެ.

އެހެން ނަމަވެސް ސައުދީ އަރަބިއްޔާގެ ފުލުހުން ބުނީ އެ ވީޑިއޯއަކީ އާއްމު އިޖުތިމާއީ މިންގަނޑުތަކާ އެކަށީގެންވާ ވީޑިއޯއެއް ނޫން ކަމަށެވެ.

ވީޑިއޯގެ މައްސަަލައިގައި ތަލާއާ ދެކޮޅަށް ބޮޑު ކެމްޕެއިނެއް ފަށާފައިވާ އިރު، އޭނާއާ ދެކޮޅު ހޭޝްޓެގެއް ވެސް ސައުދީ އަރަބިއްޔާގެ ޓްވިޓާގައި ޓްރެންޑްވި އެވެ.

ދާދި ފަހުން ސައުދީގެ މީޑިއާ ރެގިއުލޭޓަރުން ވަނީ މުސްލިމް އުސޫލްތަކާ ހިލާފު އިޝްތިހާރުތައް ޔޫޓިއުބުން ނެގުމަށް ވެސް އަންގާފަ އެވެ. އެ އެންގުމަށް އަމަލު ނުކޮށްފި ނަމަ ގާނޫނީ ފިޔަވަޅުގެ އިންޒާރު ދިނެވެ.