މާލޭގެ ފަސް ސަރަހައްދަކަށް އުދަ އަރައިފި އެވެ.

މާލެއަށް އުދަ އެރި ސަރަހައްދުތަކުގެ ތެރޭގައި، އިންޑަސްޓްރިއަލް ޒޯން، ސްވިމިން ޓްރެކް ސަރަހައްދު، ރާޅުގަނޑު ސަރަހައްދު، އާޓިފިޝަލް ބީޗް ސަރަހައްދު އަދި ކާނިވާ ސަރަހައްދު ހިމެނެ އެވެ.

އެންމެ ބޮޑަށް އުދައިގެ އަސަރު ކޮށްފައި ވަނީ ރާޅުގަނޑު ސަރަހައްދަށް ކަމަށްވާއިރު، މޫސުން ގޯސްވެ، ކަނޑުގެ ލޮނުގަނޑު އުފުލޭ ދުވަސްވަރު އެ ސަރަހައްދަށް ވެއްޔާއި، ގަލާއެކު އުދަ އަރާކަން ފާހަގަކޮށްލެވެ އެވެ. އެ ސަރަހައްދަށް އުދަ އަރާ، ބޮޑުތަކުރުފާނު މަގަށް ވެއްޔާއި ގާ އަރާފައިވެ އެވެ. އެކަމުގެ ސަބަބުން އެ ސަރަހައްދުގައި ވެލި ބަސްތާ ޖަހާކަން ވެސް ފާހަގަކޮށްލެވެ އެވެ.

ހަމައެއާއެކު، އިންޑަސްޓްރިއަލް ޒޯނާއި، އާޓީފިޝަލް ބީޗު އަދި ކާނިވާ ސަރަހައްދަކީ ވެސް މާލެއަށް އެންމެ ގިނައިން އުދަ އަރާ ސަރަހައްދެވެ. އިންޑަސްޓްރިއަލް ޒޯނަށް އުދަ އެރުމުގެ ސަބަބުން އެ ސަރަހައްދުގައި ޕާކުކޮށްފައި ހުންނަ އާންމުންގެ ގިނަ ވެހިކަލްތަކަށް އެކިވަރުގެ ގެއްލުން ލިބެ އެވެ.

މާލެއަށް އުދައިގެ އަސަރުކޮށްފައިވާއިރު، ރާއްޖޭގެ ދެކުނުގެ ބައެއް ރަށްތަކަށް މިއަދު އުދަ އަރާނެ ކަމަށް ލަފާކޮށް މޫސުމާ ބެހޭ ރަސްމީ އިދާރާ، މެޓް އޮފީހުން ވަނީ ވައިޓް އެލާޓް ނެރެފަ އެވެ.