ގައުމީ ވޮލީބޯޅަ މުބާރާތުގެ ފުރަތަމަ ސެމީ ފައިނަލުގައި މިއަދު ހަވީރު ކްލަބް ވެމްކޯ އަތުން ސީދާ ތިން ސެޓުން މޮޅުވެ، ޕޮލިސް ކްލަބް މުބާރާތުގެ ތިން ވަނަ ސެމީން ފުރުސަތު ހޯދައިފި އެވެ.

މިއީ މި ފަހަރުގެ ވޮލީ ސީޒަނުގައި ވެމްކޯ އަތުން ޕޮލިހަށް ހޯދުނު ފުރަތަމަ މޮޅެވެ. ވެމްކޯ އިން ވަނީ އެސޯސިއޭޝަން ކަޕްގައި 3-1 ސެޓުން ޕޮލިސް ބަލިކޮށްފަ އެވެ. އަދި ގައުމީ ލީގުގައި ވެމްކޯ އިން ޕޮލިސް ބަލިކުރީ ފަސް ސެޓު ކުޅެގެންނެވެ.

އެކަމަކު، މިއަދު ޕޮލިހުން ވެމްކޯ ބަލިކޮށް މުބާރާތުގައި ދެމިއޮތްއިރު، މި މެޗުން ބަލިވެ، ވެމްކޯ އަށް ސީޒަން ނިމުނީ އެވެ. މާދަމާރޭ ކުޅޭ ތިން ވަނަ ސެމީ ފައިނަލުގައި ޕޮލިސް ކުޅޭނީ މިރޭ ދެ ވަނަ ސެމީގައި ސްޕޯޓްސް ކްލަބް ސިޓީ އާއި އެންމެ ފަހުގެ ގައުމީ ޗެމްޕިއަން, ދިވެހި ސިފައިންގެ ކްލަބް ކުޅެގެން ބަލިވާ ޓީމަކާ އެވެ. މިރޭ ސިޓީ އާއި ސިފައިން ކުޅެގެން މޮޅުވާ ޓީމަކަށް ފައިނަލުގެ ސީދާ ޖާގަ ލިބޭނެ އެވެ.

ޒުވާނުންގެ މަރުކަޒު އެތެރެ ކޯޓުގައި މިއަދު ހަވީރު ކުޅުނު މެޗުން ޕޮލިސް ސެޓުތައް ގެންދިޔައީ، 25-19، 25-21 އަދި 25-20 އިންނެވެ.

މިއަދުގެ މެޗު ފަށައިގެން ޕޮލިހުން ދިޔައީ ރަނގަޅު ރޫހެއްގައި ކުޅެމުންނެވެ. އެ ގޮތުން ފުރަތަމަ ސެޓުގައި އެ ޓީމުގެ މާއިޝް އަހުމަދު އާއި އިންޑިއާގެ ތިން ކުޅުންތެރިން ކަމަށްވާ، ސެޓަރު، މުއްތުސާމީ އަޕަވޫ، ސެންޓަ ބްލޮކަރު، އަކިން އައްމާލް އަދި އެޓޭކަރު، އަނޫ ޖޭމްސްގެ ހަމަލާތައް ފެންނަން ފެށި އެވެ. ވެމްކޯގެ ސާވިސް އާއި ޑިފެންސް ދަށްވުމުގެ ފައިދާ ވަރަށް ރަނގަޅަށް މި މެޗުގައި ޕޮލިހުން ނެގި އެވެ.

މިއަދުގެ މެޗުގެ ތެރެއިން ޕޮލިހުގެ ސެޓަރު، މުއްތުސާމީ (ކ) އާއި ލިބަރޯ ނައިންޓެ އުފާފާޅުކުރަނީ.--- ފޮޓޯ: އިމޭޖަސް.އެމްވީ/ އިސްމާއިލް ތޯރިގު

ބަދަލުގައި، ޕޮލިހުގެ ޑިފެންސްގައި މި މެޗުގައި ވެސް ޓީމުގެ ލިބަރޯ، މުހައްމަދު ނައީމް (ނައިންޓެ) ވަނީ މޮޅަށް ކުޅެފަ އެވެ. ނައިންޓެގެ ކުޅުން ރަނގަޅުވުމަކީ، ސެޓަރު، މުއްތުސާމީ އަށް އެޓޭކްގައި ކުޅުންތެރިން ބައިވެރިކުރަން ފަސޭހަ ވުމުގެ އަސްލެވެ.

ފުރަތަމަ ސެޓު ގެއްލުމުން ވެމްކޯ އިން ދެ ވަނަ ސެޓު ފަށައިގެން ކޮންމެ ވެސް ވަރަކަށް ކުުޅުން ރަނގަޅުކުރި އެވެ. އެކަމަކު، ސެޓުގެ މެދެއްހާ ހިސާބުން ވެމްކޯ އަށް އަމިއްލަ އަށް ހެދޭ ގޯސްތައް އިތުރުވެ، މުހިންމު ޕޮއިންޓްތައް ގެއްލުނީ އެވެ. ވެމްކޯގެ ކެޕްޓަން، އިސްމާއިލް ސާޖިދު (ކުޑަކާއްޓެ) އާއި އިންޑިއާ ސެންޓަ ބްލޮކަރު، އަޝްވަލް ރާއީގެ އަސްލު ލެވަލަށް ބަލާއިރު މި މެޗުގައި އެ ދެ ކުޅުންތެރިންނަށް އެންމެ މޮޅަށް ޕާފޯމް ނުކުރެވުނެވެ. ބަދަލުގައި، ޕޮލިސް ރަނގަޅު ރޫހެއްގައި ކުޅެ ސީދާ ތިން ސެޓުން މެޗު ނިންމާލީ އެވެ.

ވެމްކޯގެ ކޯޗު އިބްރާހިމް ނިޒާރު (ބޮޑޭ) ބުނީ ހަގީގަތުގައި މުބާރާތްތައް ދިޔަ ގޮތަށް ބަލާއިރު، ވެމްކޯ މި ހިސާބަށް އައުން ވެސް އެއީ ހައްގު މިންވަރަށް ބަލާއިރު މޮޅެއް ކަމަށެވެ. އަނިޔާގެ މައްސަލަ އާއި ރޯގާގެ ކަންކަން ކުޅުންތެރިންނަށް ކުރިމަތިވިއިރު، އެސޯސިއޭޝަން ކަޕް ފެށިތަނާ އިންޑިއާގެ ކުޅުންތެރިޔާ، އަމިތުސިންހްގެ ކަކުލަށް އަނިޔާވެގެން އެ ތަން ފޫބައްދަން ބާކީ މެޗުތަކުގައި ކުރަން ޖެހުނު މަސައްކަތުގެ ސަބަބުން ގޮންޖެހުން އިތުރުވިކަން ނިޒާރު ފާހަގަކުރި އެވެ.

ވެމްކޯގައި ތިބި ކުޅުންތެރިންނަކީ ރާއްޖޭގެ ގައުމީ ލެވަލްގައި ގިނަ ކާމިޔާބީތަކެއް ހޯދި ކުޅުންތެރިންތަކެއް ކަމުގައި ވިޔަސް، އެ ކްލަބަކީ އަދި މުޅިން އަލަށް ފިރިހެން ވޮލީ އަށް ނުކުމެ އުޅޭ ޓީމަކަށްވާތީ، އެސޯސިއޭޝަން ކަޕުން ފެށިގެން ގައުމީ މުބާރާތާ ހަމައަށް އައުމަކީ އެ ކްލަބަށް ފެށުމެއްގެ ގޮތުގައި ނިޒާރު ވަނީ ބުނެފަ އެވެ.

ޕޮލިހުގެ ކޯޗު ފަތުހުﷲ ވަހީދު (ފައްލޯ) ބުނީ ޒުވާން ކުޅުންތެރިންތަކެއް ލައިގެން ދަސްކުރަމުން ތަޖުރިބާތަކެއް ހޯދައިދެމުން ކުރާ މަސައްކަތެއްގައި ގައުމީ މުބާރާތުގައި މި ގޮތަށް ވަރުގަދަ ޓީމެއް އަތުން މޮޅުވުމަކީ ބޮޑު ކާމިޔާބެއް ކަމަށެވެ.

ވެމްކޯ އަތުން ސީދާ ތިން ސެޓުން މޮޅުވުމަކީ ދެން އޮތް ތިން ވަނަ ސެމީ އަށް ދާއިރު، ޓީމުގެ ހިތްވަރު ރަނގަޅުވާނެ ސަބަބެއް ކަމަށް ފައްލޯ ވަނީ ބުނެފަ އެެވެ.

ސެމީގެ ދެ ވަނަ މެޗުގައި މިރޭ ސިފައިންނާއި ސިޓީ ބައްދަލުކުރާ މެޗު ފަށާނީ 21:00 ގަ އެވެ.