17 މޭ 2022 - 10:43 0
މުހައްމަދު އުޝާމް
ސީމާ އެކައުންޓިން ޕްރޮގްރާމްތައް ވިލާ ކޮލެޖްގައި ލޯންޗު ކުރުމުގެ ރަސްމިއްޔާތުގައި އޮޑިޓަ ޖެނެރަލް ވާހަކަ ދައްކަވަނީ -- ފޮޓޯ: މުހައްމަދު ޝާބިިން
17 މޭ 2022 - 10:43 0
ރާއްޖޭގައި ޕްރޮފެޝަނަލް އެކައުންޓުންނާއި އޮޑިޓަރުން އުފައްދަން ވިލާ ކޮލެޖުން ނެގި ލީޑާޝިޕަކީ އެ މަސައްކަތުގައި އަދާ ކުރި ބޮޑު ދައުރެއް ކަމަށް އޮޑިޓަ ޖެނެރަލް ހުސައިން ނިޔާޒީ ރޭ ވިދާޅުވެއްޖެ އެވެ.
އިނގިރޭސިވިލާތުގެ ޗާޓަޑް އިންސްޓިޓިއުޓް އޮފް މެނޭޖްމަންޓް އެކައުންޓެންޓްސް (ސިމާ) ގެ ޕްރޮގްރާމްތައް ރާއްޖެ ގެންނަން ކުރި ދިގު އިންތިޒާރު ނިމުމަކަށް އައިސް ވިލާ ކޮލެޖްގައި ރޭ ވަނީ ޕްރޮގްރާމްތައް ލޯންޗުކޮށްފަ އެވެ.
ސިމާގެ ކައުންޓީ މެނޭޖަރު ޒަހަރާ އަންސާރީ ހިމެނޭހެން އިސް އޮފިޝަލުންގެ ޓީމެއް ވެސް ޒޫމް މެދުވެރިކޮށް އޮންލައިންކޮށް ބައިވެރިވި އެ ރަސްމިއްޔާތުގައި ނިޔާޒީ ވިދާޅުވީ މިއީ ގިނަ މަސައްކަތްތަކަށް ފަހު ހާސިލް ކުރެވުނު ނަތީޖާއެއް ކަމަށެވެ.
"އަޅުގަނޑުމެން ދިޔައީ ގިނަ މަސައްކަތްތަކެއް ކުރަމުން، ސިމާއިން ރާއްޖޭގެ ތައުލީމީ އިދާރާތަކާ ޕާޓްނާޝިޕެއް އުފައްދަން ބާރުއަޅަން،" ނިޔާޒީ ވިދާޅުވި އެވެ.
ނިޔާޒީގެ އެންމެ ހާއްސަ ޝުކުރެއް އަދާ ކުރި ފަރާތަކީ ވިލާ ކޮލެޖެވެ. އޭނާ ވަނީ މި ކަން ހާސިލްކުރަން ވިލާ ކޮލެޖްގެ މެނޭޖްމަންޓް އިން ދެއްކި ލީޑާޝިޕަށް މަރުހަބާ ދަންނަވައިފަ އެވެ.
"ވިލާ ކޮލެޖަކީ، ރާއްޖޭގައި ޕްރޮފެޝަނަލް އެކައުންޓެންޓުން އުފައްދަން ކުރާ މަސައްކަތުގައި، ވަރަށް ވެސް މުހިންމު ދައުރެއް އަދާ ކުރާ ބައިވެރިއެއް،" ނިޔާޒީ ވިދާޅުވި އެވެ.
މި ކަން ހާސިލް ކުރެވުނީ މީގެ ކުރިން އޮޑިޓަ ޖެނެރަލްގެ މަގާމު ފުރުއްވި ހުރިހާ ބޭފުޅުންގެ ގިނަގުނަ ބުރަ މަސައްކަތުން ކަމަށް ނިޔާޒީ ވިދާޅުވި އެވެ.
ހާއްސަކޮށް ކުރީގެ އޮޑިޓަ ޖެނެރަލް އިސްމާއީލް ފަތުހީގެ މަސައްކަތް ނިޔާޒީ ފާހަގަ ކުރެއްވި އެވެ. މިދިޔަ އަހަރު، ކޮވިޑް ބަލީގައި އަހަވާރަވި ފަތުހީއަކީ ދިވެހި އެކައުންޓެންޓުންގެ ބައްޕަ ގޮތުގައި ސިފަކުރެއްވި އެވެ.
އެންމެ ފަހުން އޮޑިޓަ ޖެނެރަލްއަކަށް ހުންނެވި ހުސައިން ޒިޔަތުގެ މަސައްކަތް ވެސް ނިޔާޒީ ފާހަގަ ކުރެއްވި އެވެ. އޭނާ ވިދާޅުވީ އެ ކަން ހާސިލް ކުރަން ގިނަ މަޝްވަރާތަކެއް އޭރު ހިންގުނު ކަމަށެވެ.
"ފެށިގެން މި ދިޔަ ޕްރޮގްރާމްތަކާ އެކު ރާއްޖޭގެ އެކައުންޓިން އިންޑަސްޓްރީއަށް، އިގްތިސޯދަށް ވެސް ކުރިއެރުންތަކެއް އަންނާނެ، ވިޔަފާރިއާއި އިގްތިސޯދަކީ މި ދާއިރާއާ ގުޅިލާމެހިފައި އޮތް ކަމެއް،"
ވިލާ ކޮލެޖްގައި ސިމާގެ ޕްރޮގްރާމްތައް ރަސްމީކޮށް ލޯންޗު ކުރަނީ - ފޮޓޯ: މުހައްމަދު ޝާބިން | އަދަދު
ސިމާގެ ޕްރޮގްރާމްތަކަކީ އަމިއްލަ ވިޔަފާރި ހިންގަން ބޭނުންވާ ފަރާތްތަކާއި، ފައިނޭންސްއާއި ވިޔަފާރި ދާއިރާއިން ކުރިއަށްދާން ބޭނުންވާ ފަރާތްތަކައި އެ ދާއިރާއިން ތައުލީމު ހާސިލް ކުރަމުންދާ ދަރިވަރުންނަށް އަމާޒުކޮށް މެނޭޖްމަންޓް އެކައުންޓިންގެ ތަމްރީންތައް ދެވޭ ޕްރޮގްރާމްތަކެކެވެ.
ސިމާގެ ޕްރޮގްރާމްތައް ވިލާ ކޮލެޖްގައި ލޯންޗު ކުރުމުން، އެ އިންސްޓިޓިއުޓް ސެޓިފިކެޓް އިން ބިޒްނަސް އެކައުންޓިން ލެވެލް (ސީބީއޭ) އާއި، ފައިނޭންޝަލް ލީޑާޝިޕް ޕްރޮގްރާމް (އެފްއެލްޕީ) ގެ އޮޕަރޭޝަނަލް ލެވެލް، މެނޭޖްމަންޓް ލެވެލް އަދި ސްޓްރެޓެޖިކަލް ލެވެލްގައި ބައިވެރިވެވޭނެ އެވެ.
މި ދާއިރާއާ ގުޅުން ހުރި ދާއިރާއެއްގެ ފުރަތަމަ ޑިގްރީގެ ދެވަނަ އަހަރު ކިޔަވަމުންދާ ދަރިވަރުންނަށް އެފްއެލްޕީގެ އޮޕަރޭޝަނަލް ލެވެލްގައި ބައިވެރިވެވޭނެ ކަމަށް ވިލާ ކޮލެޖުން ބުންޏެވެ. އަދި ޑިގްރީއާއި މާސްޓާސް ހާސިލް ކުރަންވާއިރަށް އެ ޕްރޮގްރާމް އެއްކޮށް ހާސިލްކުރެވޭނެ ކަމަށް ބުންޏެވެ.
ވިލާ ކޮލެޖުން ބުނީ ސީބީއޭ އާއި އެފްއެލްޕީގެ އޮޕަރޭޝަނަލް ލެވެލްގެ ޕްރޮގްރާމްތައް ވަނީ ސަރުކާރުން ދޫކުރި އިންކަމް ސަޕޯޓް ޕްރޮޖެކްޓްގެ ތެރެއިން ސަރުކާރުން އެއްކޮށް ފަންޑު ކޮށްދީފައި ކަމަށެވެ. އަދި އޭގެ އިތުރަށް އޭގައި ބައިވެރިވެގެން މަހަކު 5،000 ރުފިޔާގެ އިނާޔަތެއް ލިބެން އޮންނާނެ ކަމަށް ވެސް ބުންޏެވެ.
މި ލިޔުމާ ގުޅޭ ލިޔުންތައް
Comment