އަންނަ ޖުލައި މަހުގެ 28 އިން އޮގަސްޓް 8 އަށް އިނގިރޭސިވިލާތުގެ ބާމިންހަމްގައި ކުރިއަށްގެންދާ ކޮމަންވެލްތު ގޭމްސްގެ ބީޗްވޮލީބޯޅަ އިވެންޓުން ރާއްޖެ އަށް ފުރުސަތު ދޭން، ވޮލީބޯޅައިގެ ދުނިޔޭގެ މައި އިދާރާ، އެފްއައިވީބީން ނިންމައިފި އެވެ.
މިދިޔަ މަހު ސްރީ ލަންކާގައި ބޭއްވި ކޮމަންވެލްތު ކޮލިފައިންގައި ވާދަކޮށް، ރާއްޖޭގެ އިސްމާއިލް ސާޖިދު (ކުޑަކާއްޓެ) އާއި އާދަމް ނަސީމްގެ ޕެއާ ވަނީ ރިހި މެޑަލް ހޯދައިފަ އެވެ. ކޮލިފައިން ދެ ވަނަ އަށް ދިއުމުން ކޮލިފައިން ސްލޮޓެއްގެ ތެރެއިން ރާއްޖެ އަށް ކޮމަންވެލްތުގެ ފުރުސަތު އޭރު ގެއްލުނީ އެވެ.
އެކަމަކު، އެފްއައިވީބީން މިއަދު އާންމުކުރި ބަޔާނުގައިވަނީ ކޮމަންވެލްތު ގޭމްސް އިން އެކި ކްރިއައިޓީރިއާތަކުން ޖާގަ ބެހިފައިވާ ގޮތަށް ބަލާއިރު، އިންވިޓޭޝަން ފުރުސަތެއްގެ ގޮތުގައި ބީޗްވޮލީބޯޅައިގެ ފިރިހެން ބައިން ރާއްޖެ އަށް ފުރުސަތު ދޭން ނިންމައިފަ އެވެ.
މި ގޮތަށް އިންވިޓޭޝަން ފުރުސަތު ދޭން ނިންމަނީ އެ ގައުމަކުން ބީޗްވޮލީބޯޅައިގައި ކުރަމުން އަންނަ މަސައްކަތާއި ރޭންކިން އަށް ބަލައިފަ އެވެ. މިއީ، އެފްއައިވީބީން ބަލާ ހާއްސަ މިންގަނޑުތަކުގެ ތެެރެއިން ދޭ ފުރުސަތެކެވެ. ރާއްޖޭގެ
ބީޗްވޮލީބޯޅަ ކުރިއަރުވަން ދުނިޔޭގެ ފެޑެރޭޝަން، އެފްއައިވީބީން ހަމަޖައްސައިދިން ދެ އަހަރު ދުވަހުގެ ކޯޗިން ސަޕޯޓް ޕްރޮގްރާމްގެ މަސައްކަތް މިހާތަނަށް ކުރިއަށްދާ ގޮތާ މެދު އެފްއައިވީބީން ވަނީ ހިތްހަމަޖެހުން ފާޅުކޮށްފަ އެވެ.
މިދިޔަ އަހަރު އެފްއައިވީބީގެ ރައީސް، ބްރެޒިލްގެ އަރީ ގްރާސާ ރާއްޖެ އަށް ކުރެއްވި ދަތުރުފުޅުގައި ރާއްޖޭގެ ވޮލީ އަށް ގިނަ ފުރުސަތުތަކެއް ހޯދައިދެއްވާނެ ކަމަށް ވަނީ ވިދާޅުވެފަ އެވެ.
އެ މަސައްކަތުގެ ތެރެއިން ތަޖުރިބާކާރު ބީޗްވޮލީބޯޅަ ކޯޗު ބްރެޒިލްގެ ވިނީޝިއުސް މާޓިން ޖިއޯނީ ވަނީ ޖެނުއަރީ ނުވަ ވަަނަ ދުވަހު ރާއްޖެ އައިސް ޓްރެއިނިންތައް ފަށައިފަ އެވެ. ވިނީޝިއުސްގެ ކޯޗުކަމުގައި ރާއްޖޭން ވަނީ މިހާތަނަށް ދެ މުބާރާތެއްގައި ވާދަކޮށްފަ އެވެ. އެ ގޮތުން ފެބްރުއަރީ މަހުގެ ތެރޭގައި ސްރީ ލަންކާގެ ނިގަމްބޯގައި ކުރިއަށްދިޔަ އޭޝިއަން ސެންޓްރަލް ޒޯން ފުރަތަމަ ބީޗްވޮލީބޯޅަ މުބާރާތުގައި ރާއްޖޭގެ ހަތަރު ޕެއާ (އަންހެން ދެ ޕެއާ އާއި ފިރިހެން ދެ ޕެއާ) ވަނީ ވާދަކޮށްފަ އެވެ. އަދި މިދިޔަ މަހު ކޮމަންވެލްތު ގޭމްސް ކޮލިފައިންގަައި ވެސް ބީޗްވޮލީބޯޅަ ޓީމު ވަނީ ރަނގަޅު މަސައްކަތްތަކެއް ކޮށްފަ އެވެ.
ވީއޭއެމްގެ ރައީސް މުހައްމަދު ރަނޭޝް (ރަނޭ)ގެ ލީޑަޝިޕާ އެފްއައިވީބީން އެކުގައި މަސައްކަތް ކުރަމުން އަންނާތީވެ، އެކަމުގެ ސަބަބުން ރާއްޖޭގެ ވޮލީ އަށް ގިނަ ފުރުސަތުތަކެއް އަންނަނީ ލިބެމުންނެވެ. އެ ގޮތުން މި އަހަރު އެފްއައިވީބީގެ ބީޗްވޮލީ ޕްރޯ ޓުއާގެ މުބާރާތެއް ރާއްޖޭގައި ބާއްވާ ގޮތަށް ވަނީ ހަމަޖެހިފަ އެވެ.
މެދުކެނޑުމަކަށް ފަހު ރާއްޖޭން ކޮމަންވެލްތު ގޭމްސްގައި ވާދަކުރާއިރު، ރާއްޖޭގެ ފިރިހެން ޓޭބަލް ޓެނިސް ޗެމްޕިއަން މޫސާ މުންސިފް އާއި އަންހެން ޓީޓީ ޓީމު ވެސް ވަނީ ގޭމްސް އަށް ކޮލިފައިވެފަ އެވެ. މީގެ އިތުރުން، ބެޑްމިންޓަނާއި އެތުލެޓިކްސް އަދި ސްވިމިން އިން ވެސް ރާއްޖޭގެ އެތުލީޓުން ކޮމަންވެލްތު ގޭމްސްގައި ވާދަކުރާނެ އެވެ.
