ރާއްޖޭގެ އެކިއެކި އަތޮޅުތަކަށް ޓޭބަލް ޓެނިސް ފުޅާކުރުމުގެ ގޮތުން ޕްލޭނެއް އެބައޮތް ކަމަށް ޓޭބަލް ޓެނިސް އެސޯސިއޭޝަން އޮފް މޯލްޑިވްސް (ޓީޓީއޭއެމް)ގެ ނައިބު ރައީސް އިބްރާހިމް ޝިއުރީ ވިދާޅުވެއްޖެ އެވެ.

ޝިއުރީ މިހެން ވިދާޅުވީ "އަދަދު" އިން ގެނެސްދޭ ކުޅިވަރު ޕްރޮގްރާމް "ފޯރީ"ގެ ހަތަރު ވަނަ އެޕިސޯޑްގައި ވާހަަކަ ދައްކަވަމުންނެވެ. އެ ޕްރޮގްރާމްގައި ޝިއުރީ ވަނީ އަތޮޅުތަކުގައި ޓީޓީގެ ކަންކަން ކުރިއަށް ގެންދިއުމަށް މި ވަގުތު ރޭވިފައިވާ ބައެއް ކަންތައްތައް ހިއްސާކުރައްވައިފަ އެވެ.

މި ވަގުތު މާލޭގެ އިތުރުން ޓީޓީގެ ސެޓަޕެއް ހުރީ އައްޑޫ ސިޓީގަ އެވެ. ކުރިއަށް އޮތްތަނުގައި އެ ސެޓަޕްގެ ބޭނުންހިފައި އެ ސިޓީގައި ޓީޓީ ފުޅާކުރުމުގެ ވިސްނުމެއް ޓީޓީ އެސޯސިއޭޝަނުގެ އެބައޮތެވެ. މީގެ އިތުރުން ޏ. ފުވައްމުލަކާއި ތ. ތިމަރަފުށީގައި މިހާރު ހުރި ޓީޓީގެ ސެޓަޕަށް އިތުރު ފުރިހަމަކަމެއް ގެނެސް އެ ތަންތަނުގައި ވެސް ޓީޓީގެ ހަރަކާތްތައް ގިނަ ކުރެވޭތޯ އެސޯސިއޭޝަނުން އަންނަނީ ބަލަމުންނެވެ. އަދި އއ. ތޮއްޑޫ އަށް ވެސް ޓީޓީގެ ސާމާނު ފޯރުކޮށްދީ އެ ރަށުގައި ވެސް ޓީޓީގެ ކަންކަން ރޭވުމަކީ އެސޯސިއޭޝަންގެ ތަސައްވުރެކެވެ.

"ކުރިން ފާހަގަކުރިހެން (ޓީޓީގެ މިހާރުގެ ލީޑަޝިޕްގެ) މެނިފެސްޓޯގައި ފާހަގަކޮށްފައި ހުންނާނެ ފަސް ވަރަކަށް ރީޖަންގައި އެ އިންޓްރޮޑިއުސް (ތައާރަފް) ކުރަން. ހުރިހާ ރީޖަންއެއްގައި ފަހަރެއްގައި ނުވެދާނެ މި އަހަރު. އެކަމަކު، އައްޑޫ، ފުވައްމުލަކު ދެން ތިމަރަފުށީގަ އެކްޓިވިޓީތަކެއް ކުރިއަށްގެންދަން ވިސްނާފައި އޮތީ. އުންމީދަކީ މި އަހަރު ނިމުމުގެ ކުރިން އެކަން ކުރުން،" ޝިއުރީ ވިދާޅުވި އެވެ.

ރަށްރަށުގައި ޓީޓީގެ ހަރަކާތައް ގެންދަން ޓީޓީން މިހާރު އިތުރަށް އެކުލަވާލަމުން އަންނަ ޕްލޭނުގައި ވިސްނުން ހުރީ ހުނަރު އޮތް ރަށްރަށުގައި ދިގު މުއްދަތަކަށް ފެންވަރު ރަނގަޅު ކޯޗެއް ބަހައްޓައިގެން ކަންކަން ކުރިއަށް ގެންދިއުމަށެވެ. އެއީ މި ވަގުތަށް ބަލާއިރު، އެސޯސިއޭޝަންގެ ލީޑަޝިޕަށް ބުރަވެވޭ ޕްލޭނެއް ނަމަވެސް ދިމާވެފައި އޮތް ގޮންޖެހުމަކީ ބަޖެޓްގެ "ތާށި" ކަމެވެ.

"ޓީޓީ އަކީ ވަރަށް ޓެކްނިކަލް އެއްޗެއް ވީމަ އެސޯސިއޭޝަންގެ ވިސްނުން ހުންނަނީ މިސާލަކަށް ދެ އަހަރު ދުވަހުގެ ގޮތަކަށް އަޅުގަނޑުމެންނަށް ޓެލެންޓް ފެންނަ ތަނަކަށް ބޭރުން ކޯޗެއް ގެނެސް އެކޮޅުގައި ބަހައްޓައިފިއްޔާއޭ އެންމެ ރަނގަޅު ނަތީޖާއެއް ނުކުންނާނީ. އެހެންވީމަ އެ ކަހަލަ ވިސްނުމެއް ވެސް އެބަހުރި،" ޝިއުރީ ވިދާޅުވި އެވެ.

"އެކަމަކު، މި ކަަހަލަ ޕްލޭންތައް އައިސް މި ޖެހެނީ ބަޖެޓްގެ ތާށި ކަމަށް. މިއީ ހުރިހާ އެސޯސިއޭޝަނަކަށް ވެސް އޮންނަ ކަމެއް، ކިރިޔާ މި މެނޭޖްކުރެވެނީ މާލޭގައި މި އޮންނަ އެކްޓިވިޓީތަކަށް ވެސް،"

ޓީޓީގެ މިހާރު އޮތް ލީޑަޝިޕް އެސޯސިއޭޝަނުގެ މަސައްކަތާ ހަވާލުވީ 2020 ވަނަ އަހަރުގެ ސެޕްޓެމްބަރު މަހު ބޭއްވި އިންތިހާބު ކާމިޔާބުކޮށްފަ އެވެ. ކޮވިޑް-19ގެ ސަބަބުން ކަމެއް ނުކުރެވި ގިނަ ދުވަސްތަކެއް ހޭދަކުރަން ޖެހުނުކަން ޝިއުރީ ފާހަގަކުރެއްވި އެވެ. މިހާރު ކުރަން ރޭވިފައި ހުރި ކަންތައްތަކުގެ ތެރެއިން އަތޮޅުތެރެއަށް ޓީޓީ ފުޅާކުރުމުގެ ކަންކަން ކުރާއިރު، އޮތް ބަޖެޓްގެ ތާށިކަމަށް ހައްލެއް ހޯދަން ކުރިއަށް އޮތްތަނުގައި މިނިސްޓްރީއާ މަޝްވަރާކުރާނެ ކަމަށް ޝިއުރީ ވިދާޅުވި އެވެ.

"ކޯޗުން އެކޮޅަށް ގޮސްފައި އެ ސެޓަޕް ހަދާއިރު، އެކްސްޕެންސްތަކެއް އެބަދޭ. އެ އެކްސްޕެންސަކީ ސަރުކާރު ސައިޑުން ސަޕޯޓް ލިބިގެންކުރެވޭނެ ކަންތައްތައް. އެސޯސިއޭޝަންގެ ވިސްނުން އެބަހުރި އެ ޕްރޮގްރާމްގެ ޕްލޭން ޑިވެލޮޕްކޮށްފައި މިނިސްޓްރީއާ އެކު މަޝްވަރާ އަށް ގޮސް ފަންޑްސް ހޯދައިގެން، އެއްޗަކަށް ވާ ކަހަލަ ގޮތަކަށް އެކަން ކުރުމުގެ ވިސްނުން،" ޝިއުރީ ވިދާޅުވި އެވެ.

"ފައިނޭންޝިއަލް ސަޕޯޓް ލިބިއްޖިއްޔާ މިކަން ކުރެވޭނެ،"

ޓީޓީ އަކީ މިދިޔަ ހަތަރު ވަރަކަށް އަހަރަށް ބަލާއިރު، ރާއްޖޭގެ ކުޅިވަރުގައި ކާމިޔާބީގެ ގިނަ ސޮފުހާތަކެއް ލިޔެފައިވާ ކުޅިވަރެކެވެ. އެ ކުޅިވަރު އަނެއް ލެވަލަށް ގެންދަން ބަލާއިރު، ބަދަލުވާން ޖެހޭ ކަންކަން އެބަހުއްޓެވެ. ކުރަން ހުރި މަސައްކަތްތައް ރަނގަޅަށް ގެންދަން ޝިއުރީ އިލްތިމާސެއް ކުރެއްވީ ބެލެނިވެރިންނާއި ސްކޫލްތަކާއި ރަށްރަށުގެ ކައުންސިލާއި ކްލަބް ޖަމިއްޔާ ތަކަށެވެ.

އެ ގޮތުން ޝިއުރީ ވިދާޅުވީ ސްކޫލްތަކުން އެކި ކުޅިވަރުތަކުގެ އިންޓަ ސްކޫލް މުބާރާތަށް ދޭ ފޯކަސް ޓީޓީގެ އިންޓަ ސްކޫލް މުބާރާތަށް ވެސް ދޭން ޖެހޭ ކަމަށާއި ކުދިންގެ ބެލެނިވެރިން ވެސް ޓީޓީ އަށް ޝައުގުވެރިކަން ހުންނަ ކުދިންނަށް ކެރިއަރެއް ކުރިއަށްގެންދެވޭ ވަރަށް އެހީވެދިނުމަށް އެދޭ ކަމަށެވެ. އަދި ރަށްރަށުގެ ކައުންސިލްތަކާއި ކްލަބް ޖަމިއްޔާތަކުން ޓީޓީ އެސޯސިއޭޝަނާ ގުޅިގެން އެ ރަށްރަށުގައި ތިބި ޓީޓީ އަށް ޝައުގުވެރިވާ ކުޅުންތެރިން ދާއިރާ އިން ކުރިއަށްދެވޭނެ މަގުފަހިކޮށްދޭން އެކި ކަންކަން ރޭވުމަށް ޝިއުރީ އެދިލެއްވި އެވެ.

"އެންމެން ގުޅިގެން މަސައްކަތް ކޮށްފިއްޔާ ޓީޓީ މި އަށް ވުރެ ކުރިއަރައިގެން ދާނެ،" ޝިއުރީ ވިދާޅުވި އެވެ.