ދުނިޔޭގެ އެންމެ ބާރުގަދަ އެއް ގައުމު ކަމަށް ރަޝިޔާއިން ޔޫކްރެއިނު ހިފުމަށް އެގައުމަށް އަރައި، ހަނގުރާމަ ކުރަމުންދާތީ ރަޝިޔާގެ ދައުލަތާއި މުއްސަނދިންނަށް އަމާޒުކޮށްގެން އެމެރިކާ އަދި ހުޅަނގުގެ ގައުމުތަކުން އަޅާފައިވާ ދަތިކުރުމުގެ ފިޔަވަޅުތަކާއެކު ދިވެހިރާއްޖޭގެ ޓުއަރިޒަމަށް އެތައް ސަތޭކަ މިލިއަން ޑޮލަރުން ގެއްލުންވާން ފަށައިފި އެވެ.
މިދިޔަ ފަސް އަހަރުގެ ތަފާސްހިސާބުތަކަށް ބަލާއިރު ރާއްޖެއަށް އަންނަ ފަތުރުވެރިންގެ މިންވަރު 50 ޕަސެންޓާ ގާތް ކުރެ އެވެ. އަދި މިހައަހަރުގެ މިހާތަނަށް ވެސް އެންމެ ގިނައިން ރާއްޖެ އައީ ރަޝިޔާ ފަތުރުވެރިންނެވެ. ހިސާބުތަކުން ދައްކާ ގޮތުގައި ނިމިދިޔަ ފެބްރުއަރީ މަހުގެ ނިޔަލަށް ރަޝިޔާގެ 43،519 ފަތުރުވެރިން ރާއްޖެ އައިސްފައިވެ އެވެ.
"ހަނގުރާމަ ފެށުނު ފަހުން މިހާތަނަށް ވެސް 200 މިލިއަން ޑޮލަރު ގެއްލުންވެދާނެ. މަދުވެގެން އެ ވަރުގެ ގެއްލުންވެފައި ހުންނާނީ،" ރާއްޖެއަށް އެންމެ ގިނަ ރަޝިޔާ ފަތުރުވެރިން ގެންނަ އެއް ފަރާތް ކަމަށްވާ ރިސޯޓް ލައިފް މޯލްޑިވްސްގެ ސީއީއޯ މުހައްމަދު ޝާޒް ވަލީދު ވިދާޅުވި އެވެ.
ވަލީދު ވިދާޅުވީ، މިހާރު އެންމެ ބޮޑު ގެއްލުމެއްވަމުންދާނީ، ޕްރީ ބުކިންސް ނުވަތަ ކުރިން ހައްދާފައި ހުރި ބުކިންތައް ކެންސަލް ކުރަން ފެށުމުން ކަމަށެވެ. އަދި ފަތުރުވެރިންނަށް، ފައިސާ ދެއްކެން އޮތް މަގުތައް ބަންދު ކުރުމުން ވެސް ބޮޑެތި ގެއްލުންތަކެއްވަމުންދާނެ ކަމަށް ވަލީދު ލަފާ ކުރެއްވި އެވެ. އޭގެ އިތުރުން ރަޝިޔާގެ ފައިސާގެ އަގު ދަށްވުމުން ވެސް އޭގެ އަސަރު ރާއްޖެއަށް ކުރާނެ ކަމަށް ވަލީދު ވިދާޅުވި އެވެ.
"ދިވެހިރާއްޖެ އިގްތިސާދަށް ވަރަށް ބޮޑަށް ގެއްލުންވާނެ. ލަގްޒަރީ ރިސޯޓުތަކަށް އަންނަ ގިނަ މީހުންނަކީ ވެސް ރަޝިޔާ މީހުން. ފަތުރުވެރިންގެ މާކެޓުގެ ގާތްގަނޑަކަށް 40 ޕަސެންޓަކީ ރަޝިޔާ މީހުން. އެހެންވީމަ ވަރަށް ބޮޑު އަސަރެއް ކުރާނެ އަޅުގަނޑުމެންނަށް،" އޭނާ ކިޔައިދެއްވި އެވެ.
ރަޝިޔާ/ޔޫކްރެއިން ހަނގުރާމައިގެ ސަބަބުން ދިވެހިރާއްޖޭގެ ފަތުރުވެރިކަމަށް ގެއްލުންވާނެ ކަމަަށް ޓުއަރިޒަމް މިނިސްޓަރު ޑރ. އަބްދުﷲ މައުސޫމް ވެސް ފެބްރުއަރީ 24، ގައި ވިދާޅުވި އެވެ. ރާއްޖޭގެ ނޫހަކަށް ދެއްވި އިންޓަވިއެއްގައި މިނިސްޓަރު ވިދާޅުވީ ޔޫކްރެއިން ހަނގުރާމަ ފެށުމަކީ ރާއްޖެއަށް "ރިހޭ ފައި މައްޗަށް ފޮތް ވެއްޓުން" ފަދަ ހާދިސާއެއް ކަމަށެވެ.
"ރަޝިޔާގެ ފައިނޭންޝިއަލް ސިޓުއޭޝަނަށް އަންނަ ބަދަލުތަކުން އެމީހުންގެ ކަރަންސީ ވަރަށް ބޮޑުތަން ދަށްވެއްޖެ މިހާރު ވެސް. އެހެންވީމަ ހިތްވަރު ލާފަ އަންނަން ބޭނުންވާ މީހާއަށް ވެސް ވަރަށް އަގު ބޮޑުވާނެ ރާއްޖެ،" މައުސޫމް ވިދާޅުވެފައިވެ އެވެ.
ނަމަވެސް ރަޝިޔާ/ޔޫކްރެއިން ހަނގުރާމައިގެ ސަބަބުން ރާއްޖެއަށް ލިބެމުންދާ ގެއްލުންތަކާ ގުޅޭ ގޮތުން މި ނޫހުން ސުވާލު ކުރުމުން ޑރ. މައުސޫމް އެއްޗެއް ވިދާޅެއްނުވި އެވެ. އަދި ޓުއަރިޒަމް މިނިސްޓްރީން ރަސްމީކޮށް ބުނީ، ރަޝިޔާ ހަނގުރާމައާ ގުޅޭ ގޮތުން އެ އޮފީހުން އަދި ދައްކާނެ ވާހަކައެއް ނެތް ކަމަށެވެ.
