މީޑިއާނެޓްގެ އާ އޮރިޖިނަލް ސީރީޒް "ލަފްޒު" ސްޓްރީމް ކުރަން ފެއްޓުމުން ދެކަމެއް ޔަގީންވި އެވެ - މީޑިއާނެޓުން ބެލުންތެރިން މާގިނަ ދުވަހަށް ފޫހިކޮށްފައި ނުބައިތިއްބާނެ އެވެ. ދިވެހި އޮރިޖިނަލް "ސަޅި" ކޮންޓެންޓު ގެނެސްދިނުމުގައި މާޔޫސްކޮށްނުލާނެ އެވެ.
ސަބަބަކީ ހޮނިހިރު ދުވަހުގެ ރޭ، މީޑިއާނެޓުން ވީޑިއޯ ކްލަބަށް ނެރުނު 15 އެޕިސޯޑުގެ ސީރީޒް އަކީ ދިވެހި އުފެއްދުންތަކަށް ލޯބިކުރާ މީހުންނަށް ބޭނުންވާނެ ހުރިހާ ޖަޒުބާތަކާއި ރަހައެއް ގެނެސްދޭނެ ވަރުގެ އުފެއްދުމެއް ކަން ފުރަތަމަ އެޕިސޯޑުން ވެސް ޔަގީން ވާތީ އެވެ.
"ލަފުޒް" އަކީ "ދެކެދެކެވެސް" ކުޑައިގެ ދަށުން، ކާމިޔާބު ޕްރޮޑިއުސަރު މުހައްމަދު އަބްދުﷲ އާއި އަހުމަދު ނިމާލްގެ ވަރަށް ހާއްސަ މަސައްކަތެކެވެ. ޑްރާމާގައި ދައްކުވައިދެނީ ޒުވާން އަންހެން ކުއްޖަކު ބައްޕައެއްގެ ލޯބި ހޯދުމަށް ކުރާ ދަތުރުގައި ކުރާ ތަފާތު ތަޖުރިބާތަކެކެވެ. އެކަމަށްޓަކައި ވާ ގުރުބާނީ ތަކާއި ކުޑައިރު ލޯބިން މަހުރޫމް ވެފައިވާ އެކަނިވެރި ހަޔާތަށް ދިރުމާއި އުފަލާއި ލޯބި ހޯދަން ހުރަސްކުރާ ގޮންޖެހުންތަކެވެ.
ލީޑް ރޯލުން ފެންނަނީ ކުރިއަރަމުން، މަގުބޫލުވަމުން އަންނަ ޒުވާން އަންހެންތަރި މަރިޔަމް ޝިފާ އެވެ. އޭނާއާ އެކު ފިރިހެން ލީޑުން ފެންނަނީ އަލީ އާޒިމް (ދޮން އައްޔަ) އެވެ. ސްކްރީން ޕްލޭ ލިޔެފައިވަނީ މަރިޔަމް މޫސާ އެވެ.
ސީރީޒުން ފިލްމީ ދާއިރާއަށް ވަރަށް އާ މޫނުތަކެއް ވެސް ތައާރަފްވާނެ އެވެ. މިއީ ވެސް ސީރީޒް އިތުރަށް ޝައުގުވެރިވާނެ އެއް ސަބަބެވެ.
"ހަމަޔަގީނުން ވެސް އެންމެ އެޕިސޯޑެއް ބަލައިގެން ވާގޮތެއް ނޭނގޭނެ. އެހާވެސް ހިތްގައިމުކޮށް މޮޅުކޮށް ސްކްރީން ޕްލޭ ލިޔެފައި އޮތީ. ޔަގީނުން ވެސް ބުނެވޭނީ ޑްރާމާ އެއްގައި ހުންނަންވާ ހުރިހާ ކުލައެއް، ރަހައެއް މީގައި ހުންނާނެ ކަން،" ސީރީޒްގެ މަސައްކަތާ ބެހޭ ގޮތުން ޕްރޮޑިއުސަރު މުހައްމަދު އަބްދުﷲ ބުންޏެވެ.
ކުރިއަށް މި އޮތް ދެ މަސް ދުވަހަށް ބަހާލައިގެން ފުރަތަމަ ސީޒަން ގެނެސްދޭނީ ކޮންމެ ހޮނިހިރު ދުވަހެއްގައި އާ އެޕިސޯޑެއް ސްޓްރީމް ކުރާ ގޮތަށެވެ. ވީޑިއޯކްލަބް މެދުވެރިކޮަށް އެމްއެސްޓީވީ، އެމްއެސް ލައިޓް އަދި އެމްއެސް މީޑިއާ ނެޓް އެޕްލިކޭޝަނުން ވެސް ސީރީޒްތައް ބަލައިލެވޭނެ އެވެ.
މީޑިއާނެޓުން ބުނެފައިވަނީ، "ލަފްޒް" އަކީ މުނިފޫހިފިލުވުމުގެ ދިވެހި ކޮންޓެންޓް ގިނަކުރުމަށް ކުރާ މަސައްކަތުގެ ތެރެއިން ކުރެވުނު ވަރަށް ފުރިހަމަ މަސައްކަތެއް ކަމަށެވެ.
