26 ޖަނަވަރީ 2022 - 15:42 0
މަރިޔަމް އަރީން އީސާ
ކޮވިޑް ޖެހުމުން ކުޑަކުދިންގެ ފަރާތުން ފެންނަ ބައްޔެއް ކަމުގައިވާ މިސްކް ބަލީގެ އަލާމަތްތައް ކުޑަކުދިންގެ ފަރާތުން ފެންނަމުންދޭ -- ފޮޓޯ: އަދަދު
26 ޖަނަވަރީ 2022 - 15:42 0
ކޮވިޑަށް ޕޮޒިޓިވްވެ އެޑްމިޓް ކުރާ ބައެއް ކުޑަކުދިންގެ ފަރާތުން މިސްކު ބަލީގެ އަލާމާތްތައް ފެނި އެ ކުދިންނަށް ފަރުވާ ދެމުން ދާކަމަށް މޯލްޑިވްސް ޓެކްނިކަލް އެޑްވައިޒަރީ ގްރޫޕް އޮފް އިމިއުނައިޒޭޝަންގެ ޗެއާޕާސަން އަދި ކުޑަކުދިންގެ ހާއްސަ ޑރ. އަހުމަދު ފައިސަލް ވިދާޅުވެއްޖެ އެވެ.
މަލްޓި ސިސްޓަމް އިންފްލެމޭޓޮރީ ސިންޑްރޯމް އިން ޗިލްޑްރެން ނުވަތަ މިސްކް އަކީ ކުޑަކުދިންގެ ހަށިގަނޑުގެ އެކި ސިސްޓަމްތަކަށް ޖެހޭ ބައްޔަކަށް ކިޔާ ނަމެކެވެ. މި ބަލި ޖެހުމުން ހަށިގަނޑުގެ އެކި ގުނަވަންތައް ރަތްވެ ދުޅަ އެވެ. މި ބަލީގެ އަލާމާތްތަކުގެ ތެރޭގައި ބަނޑުގައި ރިއްސުމާއި، ލޯ ރަތްވުމާއި، ބޭރަށް ހިންގުމާއި، ހޮޑުލެވި ވަރުބަލިވުން، ހަންގަޑުގައި ބިހި ނެގުން، ބޯ އެނބުރުމާއި ބޮލުގައި ރިހުން ފަދަ ކަންކަން ހިމެނެ އެވެ.
މި ބައްޔަކީ ގައިން ގަޔަށް އަރާ ބައްޔެއް ނޫންކަމަށް ޑރ. ފައިސަލް މައުލޫމާތު ދެއްވި އެވެ. މިއީ ކޮވިޑް ޖެހުމާ އެކު ކުޑަކުދިންގެ ފަރާތުން ފެންނަ ބައްޔެކެވެ. މި ބަލީގެ އަލާމާތްތައް އާންމުކޮށް ފެންނަނީ ކުޑަކުދިންނަށް ކޮވިޑް ޖެހޭތާ ދެ ހަފްތާ ނުވަތަ ތިން ހަފްތާ ފަހުން ކަމަށްވެސް ޑރ. ފައިސަލް މައުލޫމާތު ދެއްވި އެވެ.
ރާއްޖޭގައި ކޮވިޑަށް ޕޮޒިޓިވްވާ މީހުންގެ އަދަދު ދަނީ ދުވަހުން ދުވަހަށް އިތުރު ވަމުންނެވެ. އެންމެ ފަހުން އެޗްޕީއޭ އިން އާންމުކޮށްފައިވާ ތަފާސްހިސާބު ތަކުން ދައްކާ ގޮތުގައި މި ބައްޔަށް ޕޮޒިޓިވްވީ މީހުންގެ ތެރެއިން 57 މީހުންނަށް ދަނީ ހޮސްޕިޓަލުތަކުގައި ފަރުވާ ދެވެމުންނެވެ. އޭގެތެރޭގައި 15 ކުޑަކުދިންވެސް ހިމެނެ އެވެ.
މި ވަގުތު އެޑްމިޓްކޮށްގެން ނުވަ ކުއްޖަކަށް ފަރުވާ ދެމުން އަންނަ ކަމަށް ޑރ. ފައިސަލް ވަނީ ހާމަކުރައްވާފަ އެވެ. އަދި ހޮސްޕިޓަލުގައި ފަރުވާ ދެމުން ދާ ކުދިންގެ ތެރެއިން އެއް ކުއްޖަކީ މިސްކް ގެ އަލާމާތްތަކަށް ފަރުވާ ދެމުންދާ ކުއްޖެއް ކަން ވެސް ޑރ. ފައިސަލް ފާހަގަކުރެއްވިއެވެ.
ކޮވިޑުގެ އަލާމަތްތައް ވަރަށް ކުޑަކޮށް ފެނުނު ނަމަވެސް މިސްކް ގެ އަލާމާތްތައް ކުއްޖާގެ ހަށިގަނޑުން ފެނުން އެކަށީގެންވާކަމަށް ޑރ. ފައިސަލްގެ ޓްވީޓުގައި ލިޔެފައިވެ އެވެ.
"މި ބަލި ކޮންޓްރޯލް ކުރަން ބޭނުމިއްޔާ ކޮވިޑް ކޮންޓްރޯލް ކުރަންވީ" ޑރ. ފައިސަލް "އަދަދު" އަށް މިކަމާ ގުޅިގެން މައުލޫމާތު ދެއްވަމުން ވިދާޅުވި އެވެ.
އިއްޔެ އެޗްޕީއޭ އިން އާންމުކޮށްފައިވާ ތަފާސް ހިސާބުތަކުން ދައްކާ ގޮތުގައި 2607 މީހުން ވަނީ ކޮވިޑަށް ޕޮޒިޓިްވެފަ އެވެ. އެއީ މާލޭ ސަރަހައްދުން 1427 މީހުންނާއި، ރާއްޖެ ތެރޭ ރަށްރަށުންނާއި ރިސޯޓުތަކުން 892 މީހުންނެވެ. ރާއްޖޭގައި ކޮވިޑަށް ޕޮޒިޓިވްވާ މީހުންގެ އަދަދު މި މަހު 17 ވަނަ ދުވަހުން ފެށިގެން ކޮންމެ ދުވަހަކުވެސް އުޅެނީ 1000 އިން މަތީގަ އެވެ.
Comment