މިލާން (ޖެނުއަރީ 25) - އިޓަލީ ގައުމީ ޓީމުން ވޯލްޑް ކަޕް ކޮލިފައިން ޕްލޭއޮފްގައި ކުޅެން ތައްޔާރުވަމުން އަންނައިރު، މާރިއޯ ބަލޮޓެލީ އަށް އަލުން ގައުމީ ޓީމުން ފުރުސަތު ދީފި އެވެ.

އުމުރުން 31 އަހަރުގެ ބަލޮޓެލީ އެންމެ ފަހުން އިޓަލީ ޓީމަށް ކުޅުނީ 2018 ވަނަ އަހަރުގެ ސެޕްޓެމްބަރު މަހުގަ އެވެ. އަލަށް ޕްރޮމޯޓްވި ތުރުކީގެ އެޑާނާ ޑެމިސްޕޯރް އަށް ކުޅެމުން އަންނަ ބަލޮޓެލީ ވަނީ އިޓަލީ ގައުމީ ޓީމަށް ކުޅެދިން 36 މެޗުން 14 ގޯލު ޖަހައިފަ އެވެ.

ގަތަރުގައި މި އަހަރު ފަހުކޮޅުގައި ބާއްވާ ވޯލްޑް ކަޕްގައި އެންމެ ފަހުން ޔޫރަޕްގެ ޗެމްޕިއަންކަން ހޯދި ދެ ޓީމު ކަމަށްވާ އިޓަލީ އާއި ޕޯޗުގަލްގެ ތެރެއިން ކޮންމެ ވެސް އެއް ޓީމަކަށް ނުކުޅެވޭނެކަން ވަނީ ކަށަވަރުވެފަ އެވެ.

ޕޯޗުގަލް އާއި އިޓަލީ ކޮލިފައިންގައި ވާދަކުރި ގްރޫޕްތަކުން ދިޔައީ ރަނަރަޕަށެެވެ. އެހެންވެ، ވޯލްޑް ކަޕް ޖާގައެއް ހޯދަން ދެ ޓީމު ވެސް ކުޅެން ޖެހިފައި އޮތީ ޕްލޭއޮފް ބުުރުގަ އެވެ. އިޓަލީ އާއި ޕޯޗުގަލް ލައްވާލީ އެއް ފަޅިއެއްގަ އެވެ. އިޓަލީ ޕްލޭއޮފް ފުރަތަމަ މެޗުގައި ކުޅޭނީ ނޯތު މެސެޑޯނިއާއާ އެވެ. ޕޯޗުގަލް އިން ފުރަތަމަ މެޗުގައި ތުރުކީއާ ބައްދަލުކުރާނެ އެވެ. ފުރަތަމަ ޕްލޭއޮފް މެޗުތަކުން މޮޅުވެއްޖެނަމަ ޕޯޗުގަލް އާއި އިޓަލީ ޖެހޭނީ ވޯލްޑް ކަޕްގެ ޖާގަ އަކަށް ގަދަހިފުމަކަށް ދާށެވެ.

މިދިޔަ އަހަރުގެ ޔޫރޯ ތަށި އުފުލާލި އިޓަލީ އަށް އެންމެ ފަހުން 2018 ވަނަ އަހަރު ރަޝިއާގައި ބޭއްވި ވޯލްޑް ކަޕުން ޖާގަ ނުލިިބުނީ އެ ފަހަރުގެ ޕްލޭއޮފްގައި ސްވިޑެން އަތުން ބަލިވުމުންނެވެ.

ޕްލޭއޮފްގައި ވާދަކުރަން ކޯޗު ރޮބާޓޯ މަންޗިނީގެ އިރުޝާދުގެ ދަށުން އިޓަލީން 35 ކުޅުންތެރިންނާ އެކު މާދަމާ ފަރިތަކުރުންތައް ފަށާނެ އެވެ. އިޓަލީ ސްކޮޑުގައި ވަނީ ބަލޮޓެލީގެ އިތުރުން ދާދި ފަހުން އިޓަލީ ރަށްވެއްސަކަަށްވި ޖާއޯ ޕެޑްރޯ އާއި ލުއިޒް ފިލީޕޭ އަށް ފުރުސަތު ދީފަ އެވެ.

ޕެޑްރޯ އާއި ލުއިޒް އަކީ ބްރެޒިލް އަށް އުފަން ކުޅުންތެރިންނެވެ. އެކަމަކު، ފީފާގެ މިންގަނޑަށް ބަލައިގެން އެ ދެ ކުޅުންތެރިންނަށް އިޓަލީ ތަމްސީލްކުރެވޭގޮތްވީ އެވެ. ބްރެޒިލަށް އުފަން އެމަސަން ޕަލްމިއޭރީ އާއި ޖޯޖީނިއޯ ވެސް އަންނަނީ އިޓަލީ އަށް ކުޅެމުންނެވެ.

މައުރީޒިއޯ ސާރީގެ ކޯޗުކަމުގައި ލާޒިއޯ އަށް ފިލީޕޭ ލުއިޒް އަންނަނީ މޮޅު ކުޅުމެއް ދައްކަމުންނެވެ. އަދި ޖާއޯ ޕެޑްރޯ ވަނީ ކަލިއަރީ ޓީމަށް 23 މެޗުން 10 ގޯލު ޖަހައިފަ އެވެ.

އިޓަލީ ގައުމީ ޓީމަށް ދިމާވެފައިވާ އެންމެ ބޮޑު މައްސަލަ އަކީ އެ ޓީމުގެ ތަރި ފެޑެރީކޯ ކިއޭސާ އަށް ސީރިއަސް އަނިޔާއެއްވެ ކުޅުމާ ދުރަށްދާން ޖެހިފައިވުމެވެ. ކިއޭސާގެ ވާތު ކަކުލުގެ ލިގަމެންޓަށް ލިބިފައިވާ އަނިޔާއިން ރަނގަޅުވާން އޮޕަރޭޝަން ކޮށްފައިވާއިރު، އޭނާ އަށް އަލުން ދަނޑަށް ނުކުމެވޭވަރުވާނީ 7-9 މަސް ތެރޭ ކަމަށް ރިޕޯޓްތައް ބުނެ އެވެ.