ބާމިންހަމް (ޖެނުއަރީ 16) - ބަދަލު ކުޅުންތެރިއެއްގެ ގޮތުގައި ކުޅެން އަރައި ފިލިއްޕޭ ކުޓީނިއޯ ޖެހި ގޯލުން އެސްޓަން ވިލާ އިން މިރޭ އިނގިރޭސި ޕްރިމިއާ ލީގުގައި ފަހަތުން އަރައި 2-2 އިން މެންޗެސްޓާ ޔުނައިޓެޑާ އެއްވަރުކޮށްފި އެވެ.

ބާސެލޯނާގެ ލޯން އެއްބަސްވުމެއްގެ ދަށުން އެސްޓަން ވިލާ އަށް ކުޅެން އެެއްބަސްވި ކުޓީނިއޯ މިރޭ ފުރަތަމަ ފަހަރަށް އެ ޓީމުގެ ޖޯޒީގައި ކުޅެން ނުކުތީ މެޗުގެ 68 ވަނަ މިނިޓްގަ އެވެ. އޭރު ލީޑުގައި އޮތީ 2-0 އިން ޔުނައިޓެޑް އެވެ. އެސްޓަން ވިލާ އިން މެޗުގެ 77 ވަަނަ މިނިޓްގައި ޖޭކަބް ރާމްސީ ގޯލު ޖެހީ ކުޓީނިއޯ ތަނަވަސްކުރި އެޓޭކެއްގަ އެވެ. އޭގެ ހަތަރު މިނިޓް ފަހުން ރާމްސީ ދިން ބޯޅައަކުން ކުޓީނިއޯ ވަނީ ގޯލެއް ޖަހައި އެސްޓަން ވިލާ އަށް އެއްވަރުކޮށްދީފަ އެވެ.

ކުޓީނިއޯ މި ވަނީ ތިން ޓީމަކަށް ކުޅެމުން ޔުނައިޓެޑް ކޮޅަށް ގޯލު ޖަހައިފަ އެވެ. މީގެ ކުރިން ލިވަޕޫލަށް ކުޅެމުންނާއި ބާސެލޯނާ ޖޯޒީގައި ޔުނައިޓެޑް ކޮޅަށް ގޯލު ޖެހި އެވެ.

ޔުނައިޓެޑުން މިރޭގެ މެޗަށް ނުކުތީ އަނިޔާގެ ސަބަބުން ކްރިސްޓިއާނޯ ރޮނާލްޑޯ އާއި މާކަސް ރެޝްފޯޑް ނެތި އެވެ. ޔުނައިޓެޑްގެ ދެ ގޯލު ޖެހީ ވެސް މިރޭ ކެޕްޓަން ބޭންޑް އަޅައިގެން ކުުޅުނު ބްރޫނޯ ފެނާންޑޭސް އެވެ. މެޗުގެ ހަ ވަނަ މިނިޓްގައި އޭރިއާބޭރުން ފެނާންޑޭސް ޖެހި ބޯޅަ ހިފަން އުޅުމުގެ ތެރޭގައި އެސްޓަން ވިލާ ކީޕަރު އެމިލިއާނޯ މާޓީނޭޒް އަތުގައި ޖެހިފައި ވަނީ ގޯލަށެވެ.

އެސްޓަން ވިލާ އިން ނަތީޖާ ހަމަހަމަކުރަން ފޮނުވާލި ގިނަ ބޯޅަތަކެއް ޔުނައިޓެޑްގެ ކީޕަރު ޑޭވިޑް ޑެހެއާ ވަނީ މަތަކޮށްފަ އެވެ. އެމީ ބުއެންޑީއާ އާއި ލޫކަ ޑީނިއާ އަދި ރަމްސީ ޖެހި ބޯޅަތައް ޑެހެއާ ހުއްޓުވިފަހުން މެޗުގެ 67 ވަނަ މިނިޓްގައި ފެނާންޑޭސް ވަނީ ޔުނައިޓެޑަށް ދެ ގޯލުގެ ލީޑެއް ނަގައިދީފަ އެވެ.

އެކަމަކު، އެސްޓަން ވިލާގެ ކޯޗު ސްޓީވެން ޖެރާޑް ވަނީ ކުޓީނިއޯ އާއި ޒުވާން ކުޅުންތެރިޔާ ކާނީ ޗުކުމޭކާ ކުޅެން އަރުވައި މެޗުގެ އޮއެވަރު ބަދަލުކޮށްލައިފަ އެވެ. ކުޓީނިއޯ އާއި ޗުކުމޭކާ ގުޅިގެން އުފެއްދި އެޓޭކެއްގައި ރަމްސީ އެސްޓަން ވިލާގެ ފުރަތަމަ ގޯލު ޖަހައި، އޭގެ ފަހުން ރަމްސީ ވަނީ ކުޓީނިއޯ އަށް ނަތީޖާ ހަމަހަމަ ކުރި ގޯލަށް ފުރުސަތު ތަނަވަސްކޮށްދީފަ އެެވެ.

މިރޭގެ މެޗުން މޮޅުވެގެން ޔުނައިޓެޑަށް ހަ ވަނަ އަށް އެރުމުގެ ފުރުސަތު އޮތް ނަމަވެސް އެއްވަރުވުމުން އޮތީ ހަތް ވަނައިގަ އެވެ. އެއީ 20 މެޗުން 32 ޕޮއިންޓާ އެކު އެވެ. ހަ ވަނައިގައި އޮތީ 18 މެޗުން 33 ޕޮއިންޓް ހޯދާފައިވާ ޓޮޓެންހަމް ހޮޓްސްޕާސް އެވެ. ފަސް ވަނައިގައި 20 މެޗުން 35 ޕޮއިންޓާ އެކު އާސެނަލް އޮތްއިރު،. މާދަމާރޭ އާސެނަލާއި ޓޮޓެންހަމް ކުޅެން އޮތް މެޗު ވަނީ އާސެނަލުން އެދިގެން ފަސްކޮށްފަ އެވެ. އެއީ އާސެނަލްގައި ކޮވިޑް-19ގެ ހާލަތު ގޯސްވުމުންނެވެ.

ހަތަރު ވަނައިގައި އޮތް ވެސްޓް ހޭމް ޔުނައިޓެޑަށް 21 މެޗުން 37 ޕޮއިންޓް ލިބިފައިވާއިރު، މާދަމާރޭ ލީޑްސް ޔުނައިޓެޑް ބަލިކޮށް އެ މަގާމުގައި ލީޑެއް ނެގުމުގެ ފުރުސަތު އޮތީ ހުޅުވިފަ އެވެ.