ރާއްޖޭން 2018 ވަނަ އަހަރުގެ ސާފް ޗެމްޕިއަންޝިޕްގެ ތަށި ހޯދިއިރު، ޓީމުގެ މެދުތެރޭގައި މޮޅު ކުޅުމެއް ދެއްކި އިބްރާހިމް ވަހީދު ހަސަން (އިއްބެ)، އޭގެ އެއް އަހަރު ފަހުން ބަދަލުވީ މާޒިޔާ ސްޕޯޓްސް އެންޑް ރެކްރިއޭޝަން އަށެވެ. މާޒިޔާގައި 2019-2020 ސީޒަން އިއްބެ ފެށީ ވަރަށް ރަނގަޅު ފޯމެއްގަ އެވެ. ސާފް ޗެމްޕިއަންޝިޕްގައި ފެނުނު އިއްބެ، މާޒިޔާގައި ވެސް ފެންނަން ފެށި އެވެ.

އެހެން ނަމަވެސް ވޯލްޑް ކަޕް ކޮލިފައިންގައި ގުއާމާ ދެކޮޅަށް ކުޅޭ މެޗަށް އެ ގައުމަށް ދާން ގައުމީ ފުޓްބޯޅަ ޓީމުން ވިސާ ހޯދަން ސްރީލަންކާގައި ކޭމްޕް ޖަހައިގެން ހުއްޓައި، އިއްބެގެ އުފަން ރަށް، ހދ. ނޮޅިވަރަންފަރުގެ ލޯންޗަކަށް ދިމާވި ހާދިސާއެއްގައި އިއްބެގެ އާއިލާގެ ފަސް މެމްބަރަކު ވަކިވެދިޔަ އެވެ. ވަގުތުން ޓީމުގެ ކޭމްޕުން ވަކިވެ، އިއްބެ ނިންމީ ރާއްޖެ އަންނާށެވެ. އޭގެ ފަހުން އަނިޔާގެ މައްސަލަ އާއި ފޯމަށް އަސަރު ކޮށްފައިވާތީ، އިއްބެގެ މޮޅު ކުޅުން ނުފެނެ އެވެ.

ސާފް ޗެމްޕިއަންޝިޕްގައި ނޭޕާލާ ދެކޮޅަށް ކުޅުނު މެޗުގެ ތެރެއިން އިއްބެ ބަދަލު ކުޅުންތެރިއެއްގެ ގޮތުގައި ކުޅެން އެރި: 2018 ވަނަ އަހަރުގެ ސާފް ޗެމްޕިއަންޝިޕްގެ ސެމީ ފައިނަލުގައި އިއްބެ ވަނީ ނޭޕާލް ކޮޅަށް ދެ ގޯލު ޖަހާފައި.-- ފޮޓޯ: ހުސެއިން ވަހީދު/ އަދަދު

މިދިޔަ ދެ ސީޒަނުގައި މާޒިޔާ އަށް ކޯޗުކޮށްދިން ދެ ބިދޭސީ ކޯޗުން ކަމަށްވާ މެސެޑޯނިއާގެ ކޯޗު މަރުޖާން ސެކުލޮސްކީ އާއި ސާބިއާގެ ކޯޗު ރިސްޓޯ ވިޑަކޮވިޗް ވެސް ވަނީ އިއްބެގެ ފޯމާ ބެހޭގޮތުން ނޫސްވެރިންގެ ބައްދަލުވުންތަކުގައި އަމާޒުވި ސުވާލަށް ޖަވާބު ދީފަ އެވެ.

ސެކުލޮސްކީ ބުނީ އިއްބެ ފޯމަކަށް އެޅިއްޖެނަމަ އެއީ "ތަފާތު ކުޅުންތެރިއެއް" ކަމަށެވެ. ވިޑަކޮވިޗް ބުނީ އިއްބެ، ޓްރެއިނިންގައި ބުރަކޮށް މަސައްކަތްކޮށް، ދަނޑު މަތީގައި ތަފާތު ދައްކަން ފަށައިފިނަމަ މާޒިޔާ ޓީމުގެ ފަށާ 11 އިން އެންމެ ކުރިން އަބަދުވެސް ޖާގަ ހޯދާނެ ކުޅުންތެރިއަކަށް އިއްބެ ވާނެ ކަމަށެވެ.

ދަ ގްރާންޑޭގެ ސައްމެ (ވ) އަތުން މާޒިޔާގެ އިއްބެ ބޯޅަ ހޯދަން މަސައްކަތްކުރަނީ.-- ފޮޓޯ: މުހައްމަދު ޝާބިން/ އަދަދު

މި ސީޒަނުގައި މާޒިޔާގެ ކޯޗުކަމާ ހަވާލުވި މުހައްމަދު ޝިޔާޒް (މޯހަން)، އެ ޓީމާ އެކު މަސައްކަތް ފަށައި، އެންމެ ފުރަތަމަ އަތުކުރި އޮޅާލާފައި ކުރި ކަމަކީ ކުޅުންތެރިންނާ ވާހަކަ ދައްކައިގެން އެ ކުޅުންތެރިއެއްގެ އެންމެ މޮޅު ކުޅުން ދެއްކޭނެ ގޮތެއް ހޯދުމެވެ. ކުޅުންތެރިންގެ ގޮންޖެހުންތައް ދެނެގަތުމެވެ. މޯހަންގެ އެ އިސްނެގުމުން ފެނުނު ބަދަލު ވެސް ރަނގަޅެވެ. އިއްބެ ފަދަ ހުނަރުވެރި ކުޅުންތެރިންގެ ބޭނުން މާޒިޔާ އިން ފުރިހަމަ އަށް ހިފައި، ނަތީޖާ ނެރުމުގެ ރެކޯޑް އޮތީ އަދި ރަނގަޅަށެވެ. ފަސް މެޗު ކުޅުނުއިރު، މާޒިޔާ އޮތީ ސައްތަ އިން ސައްތަ ރެކޯޑެއްގަ އެވެ.

މާޒިޔާ އިން މި ސީޒަނުގައި ޖުމްލަ އެއްކޮށް 17 ގޯލު ޖަހާފައިވާއިރު، އޭގެއިން ހަތަރު ގޯލު ޖެހީ އިއްބެ އެވެ. ފުރަތަމަ އެގާރައިގައި ހިމެނިގެން ގޯލު ޖެހުމުގެ އިތުރުން ބެންޗުން އަރައި ލިބޭ ފުރުސަތުގައި ވެސް އިއްބެ ގޯލު ޖަހަ އެވެ. ލަނޑު ޖަހަން އެހެން ކުޅުންތެރިންނަށް ފުރުސަތު ތަނަވަސްކޮށްދިނުމުގައި ވެސް އިއްބެގެ ރެކޯޑް ފެންނަނީ މެޗަކަށް ފަހު މެޗެއް ރަނގަޅުވާ މަންޒަރެވެ.

"ކޯޗު (މޯހަން) ހުރިހާ ކުޅުންތެރިންނާ ވަކި ވަކިން ވާހަކަ ދައްކައި ކުޅުންތެރިންނަށް ކަންކަން ހުރި ގޮތް ބަލައި އެންމެ ރަނގަޅަށް ކުޅެވޭނެ މަގާމުތައް އެހި. ދެން މިހާރު އަސްލު ކޯޗު، އެޓޭކިން އަށް އިއްބެ އެ ބޭނުންކުރަނީ، އެޓޭކިންގެ ކޮންމެ މަގާމަކަށް ވެސް ފަސޭހަ އަސްލު ކުޅެން،" މި ސީޒަނުގެ މެޗުތަކާ ބެހޭގޮތުން އިއްބެ، "އަދަދު" އަށް ބުންޏެވެ.

މާޒިޔާގެ ފެހި ޖޯޒީގައި 2019 ވަނަ އަހަރު އެންމެ ފުރަތަމަ ކުޅެން ފެށިއިރު ރަނގަޅު ފޯމެއްގައި ހުރި އިއްބެ، އަށް އޭރުގެ ލެވަލާ ގާތަށް ވެސް ކުޅެވެނީ މިހާރު އެވެ. އެކަމާ އިއްބެ ވެސް އެއްބަސްވެ އެވެ. އެކަމަކު، އިއްބެ ދެކޭގޮތުގައި އޭނާގެ އެންމެ މޮޅު ކުޅުން ދައްކަން އަދިވެސް މަސައްކަތް ކުރަން ޖެހެ އެވެ.

"އެ ލެވަލަށް ދެވޭތޯ، ހަގީގަތުގައި މަސައްކަތް މި ކުރަނީ،" އިއްބެ ބުންޏެވެ.

އިއްބެ، ލަނޑު ޖެހުމަށް ފަހު އުފާފާޅުކުރަނީ.-- ފޮޓޯ: މުހައްމަދު ޝާބިން/ އަދަދު

މިދިޔަ އަހަރު ވޯލްޑް ކަޕް ކޮލިފައިން މެޗުތަކަށް އިއްބެ ގައުމީ ސްކޮޑުގައި ހިމެނި ނަމަވެސް އޭނާ ޓީމާ އެކު ނުދާން އޭރު ނިންމީ އެކަށީގެންވާ ވަރުގެ ރަނގަޅު ކުޅުމެއް ނުދެއްކި ގައުމީ ސްކޮޑުގައި ހިމެނެން ބޭނުމެއްނުވާތީ އެވެ.

އެކަމަކު، މާލޭގައި ބޭއްވި ސާފް ޗެމްޕިއަންޝިޕާއި ސްރީލަންކާގައި ކުރިއަށްދިޔަ ފޯ ނޭޝަންސް ކަޕްގެ ސްކޮޑުން އިއްބެ އަށް ފުރުސަތު ލިބުނުއިރު، ބައެއް މެޗުތަކުގައި ބަދަލެއްގެ ގޮތުގައި ކުޅެފައިވެ އެވެ. އިއްބެ އެ ފަހަރު ޓީމަށް އެރީ ޕްރިލިމިނަރީ ސްކޮޑުގައި ހިމެނިގެން، ސިލެކްޝަނުން ހޮވިގެންނެވެ.

ކްލަބް ލެވަލްގައި މާޒިޔާ އަށް ރަނގަޅު ފޯމެއްގައި އިއްބެ ކުޅޭނަމަ އެއީ ގައުމީ ޓީމުގައި ވެސް ރަނގަޅަށް ކުޅެލަން ލިބޭނެ ހިތްވަރެކެވެ. މާޒިޔާގައި މިހާރު އިއްބެ ދައްކަމުން އަންނަ ރަނގަޅު ކުޅުން ތަކުރާރުކުރެވޭ ގޮތްވެއްޖެނަމަަ އެއީ އަނެއްކާ ވެސް އިއްބެގެ ކެރިއަރު ރަނގަޅު ލެވަލެއްގައި މައްޗަށް ޖައްސާލަން ފަހިވެގެންދާނެ ފުރުސަތެކެވެ.