ލިވަޕޫލް (ޑިސެމްބަރު 11) - އިނގިރޭސި ޕްރިމިއާ ލީގުގައި މިރޭ ލިވަޕޫލް ދަނޑުގައި ކުޅޭ މެޗަށް ނުކުންނާނީ އެސްޓަން ވިލާ މޮޅުކޮށްދޭން ކަމަށް އެ ޓީމުގެ ކޯޗު އަދި ލިވަޕޫލްގެ ކުރީގެ ކެޕްޓަން ސްޓީވެން ޖެރާޑް ބުނެފި އެވެ.

ސަތާރަ އަހަރު ލިވަޕޫލަށް ކުޅުނު ޖެރާޑް ވަނީ އެ ޓީމަށް 710 މެޗުން 186 ގޯލު ޖަހައިފަ އެވެ. ޖެރާޑަކީ ޔާގެން ކްލޮޕަށް ފަހު ލިވަޕޫލްގެ ކޯޗުކަމާ ހަވާލުވާނެ ކަމަށް ބެލެވޭ ކޯޗެވެ. އެކަމަކު، މި ވަގުތު އޭނާ ހުރީ އެސްޓަން ވިލާ ބެންޗުގައި އެ ޓީމުގެ ކޯޗުގެ މަގާމާ ހަވާލުވެ އެވެ. ޖެރާޑް، އެސްޓަން ވިލާއާ ހަވާލުވި ފަހުން އެ ޓީމުން ވަނީ ކުޅުނު ހަތަރު މެޗުގެ ތެރެއިން ތިން މެޗުން މޮޅުވެފަ އެވެ.

ޖެރާޑް ބުނީ ލިވަޕޫލް ކަހަލަ ގިނަ އަހަރުތަކެއް ވަންދެން ކުޅުނު އަމިއްލަ ޓީމަކާ ދެކޮޅަށް ކުޅެން ޖެހުމުން ހަނދާނަށް އަންނަ ބައެއް ކަންތައްތަކުގެ ސަބަބުން ވަރަށް ބޮޑު ހިތްހަމަޖެހުމެއް ލިބޭ ކަމަށެވެ. ލިވަޕޫލަށް އަބަދުވެސް ސަޕޯޓްކުރާނެ ކަމަށާއި އެކަމަކު، މިރޭ 90 މިނިޓަށް އެކަން ބަދަލުވާނެ ކަމަށް ޖެރާޑް ބުނެފައިވެ އެވެ.

"މި ހުރިހާ ހިތްހަމަޖެހުމަކާ އެކީ ދެން އަހަންނަށް އޮތް ކަމަކީ ވަރަށް މޮޅު ޓީމަކާއި ވަރަށް މޮޅު ކޯޗަކާ ދެކޮޅަށް ކުޅެގެން މޮޅެއް ހޯދުން. އެއީ މި ވަގުތަށް އޮތް ހަމައެކަނި ފޯކަސް އަކީ،" ޖެރާޑް ބުންޏެވެ. "އަހަރެން މި މެޗުން މޮޅުވެގެން އެނބުރި ޓީމު ބަހުގައި ބާމިންހަމް އަށް އަންނައިރު، ޔަގީން އަހަންނަކީ އެންފީލްޑް (ލިވަޕޫލް ދަނޑު)ގައި ތިބި މީހުންނަށް އެންމެ ކަމުދާނެ މީހާއެއް ނޫން ނޫން. އެކަމަކު، މި މެޗުގައި އެއީ މައްސަލަ އެއް ނޫން،"

ޖެރާޑް ކޯޗިން ކެރިއަރު ފެށީ ލިވަޕޫލް ޔޫތު ޓީމުންނެވެ. އެކަމަކު، ފަހުން ސްކޮޓްލެންޑްގެ ރޭންޖާސްއާ ހަވާލުވެ، އެ ޓީމަށް ސްކޮޓްލެންޑްގެ ލީގު ޗެމްޕިއަންކަން ހޯދައިދިނެވެ.

ލިވަޕޫލްގެ ކޯޗު ޔާގެން ކްލޮޕް ބުނީ ޖެރާޑަކީ މިހާރު ތަޖުރިބާހުރި ކޯޗެއް ކަމަށާއި މެޗެއް ކުޅެން އެހެން ޓީމެއް ގޮވައިގެން ޖެރާޑް ލިވަޕޫލް ދަނޑަށް އައި ކަމުގައި ވިޔަސް އޭނާއާ މެދު ލިވަޕޫލުން ގެންގުޅޭނީ ޕްރޮފެޝަނަލް އުސޫލު ކަމަށެވެ.

"އަހަރެން މި ޓީމަށް އައި ފަހުން ޖެރާޑާ ބެހޭގޮތުން ގޯސް އެއްޗެއް އަޑެއް ނާހަން. އެކަމަކު، އޭނަ (ޖެރާޑް) މި ދަނޑަށް އެ އަންނަނީ ޓީމެއް ގޮވައިގެން ފުޓްބޯޅަ މެޗަކުން މޮޅުވާން. މެޗުގެ ކުރިން ސަލާމް ކުރާނަން. މެޗަށް ފަހު ވެސް ސަލާމް ކުރާނަން. އެކަމަކު، އެ ދެ ސަލާމުގެ ދެމެދުގައި އަހަރެމެން ތިބޭނީ ވަރަށް ވަރުގަދަ ޖޯޝެއްގައި މޮޅުވާން،" ކްލޮޕް ބުންޏެވެ.

ކްލޮޕް ބުނީ ޔަގީންކަމާ އެކު އޭނާ އަށް ބުނަން އެނގޭ އެއް ކަމަކީ ޖެރާޑްގެ ކޯޗިން ކެރިއަރުގެ ކޮންމެ ވެސް ހިސާބަކުން އޭނާ ލިވަޕޫލާ ހަވާލުވާނެ ކަމަށެވެ. ޖެރާޑް މީގެ ކުރިން ދިން އިންޓަވިއުއެއްގައި ވަނީ ލިވަޕޫލަށް ކޯޗުކޮށްދިނުމުގެ ޝައުގުވެރިކަން ނެތް ކަމަށް އޭނާ ބުނެފިނަމަ އެކަން ގަބޫލުކުރާނެ މީހެއް ނުހުންނާނެ ކަމަށް ބުނެފަ އެެވެ.

ލިވަޕޫލާއި އެސްޓަން ވިލާ ކުޅޭ މެޗު ފަށާނީ މިރޭ ރާއްޖެ ގަޑިން 8 ޖަހާއިރު އެވެ.