ގައުމީ ފުޓްބޯޅަ މުބާރާތް ނުވަތަ ޕްރެޒިޑެންޓްސް ކަޕް ކާމިޔާބު ކުރެވުމަކީ ކޮންމެ ފުޓްބޯޅަ ކުޅުންތެރިއަކަށް ވެސް ލިބޭނެ ވަރަށް ބޮޑު ޝަރަފެއް ކަމަށް އެ މުބާރާތުގެ އެންމެ ކާމިޔާބު އެއް ކުޅުންތެރިޔާ އަދި ރާއްޖޭގައި އުފެދުނު އެންމެ މޮޅު ގޯލްކީޕަރު އިމްރާން މުހައްމަދު ބުނެފި އެވެ.

ރާއްޖޭގެ ފުޓްބޯޅަ ސީޒަނުގައި މި ފަހަރު އެންމެ ފުރަތަމަ ބާއްވާނީ ޕްރެޒިޑެންޓްސް ކަޕެވެ. މި ފަހަރު ޕްރެޒިޑެންޓްސް ކަޕް މި ބާއްވަނީ ހަތަރު ވަރަކަށް އަހަރުގެ މެދުކެނޑުމަކަށް ފަހު އެވެ. އެންމެ ފަހުން ޕްރެޒިޑެންޓްސް ކަޕް ބޭއްވީ 2017 ވަނަ އަހަރު އެވެ. އެ ފަހަރު ޗެމްޕިއަންކަން ހޯދީ އިމްރާންގެ ކެޕްޓަން ކަމުގައި ކުޅުނު ނިއު ރޭޑިއަންޓުންނެވެ.

އިމްރާން ބުނީ އޭނާގެ ނަޒަރުގައި ރާއްޖޭގައި ބޭއްވޭ ފުޓްބޯޅަ މުބާރާތްތަކުގެ ތެރެއިން އެންމެ ޝަރަފުވެރި މުބާރާތަކީ އަދިވެސް ގައުމީ މުބާރާތް ކަމަށެވެ.

"އެހެންވީމަ ޕްލޭޔަރެއްގެ ހައިސިއްޔަތުން އެ މުބާރާތުގެ ތަށި ކާމިޔާބު ކުރުން އެއީ އެ ކުޅުންތެރިއަކަށް ލިބޭނެ ވަރަށް ބޮޑު ހިތްހަމަޖެހުމެއް. އަދި ވަރަށް ބޮޑު ޝަރަފެއް. އަޅުގަނޑަކީ ފުޓްބޯޅަ ހަޔާތުގައި ގައުމީ މުބާރާތުގެ ތަށި 12 ފަހަރު ކާމިޔާބުކުރި ކުޅުންތެރިއެއް. އެ ތަށި ކާމިޔާބު ކުރުމުން އެ ލިބޭ ހިތްހަމަޖެހުމަކީ ވަރަށް ބޮޑު ހިތްހަމަޖެހުމެއް. ވަރަށް ބޮޑު އުފަލެއް،" ކުރިން ނިއު އާއި ވިކްޓްރީ އަދި ވީބީއާ އެކު ޕްރެޒިޑެންޓްސް ކަޕް ކާމިޔާބުކުރި އިމްރާން ބުންޏެވެ.

އެންމެ މަތީ ފެންވަރުގައި 20 އަހަރު ކުޅުމަށް ފަހު ފުޓްބޯޅަ ކެރިއަރު ނިންމާލިއިރު، އިމްރާން ވަނީ ފުރަތަމަ ޑިވިޝަނުގައި ހަ ކްލަބަށް ކުޅެފަ އެވެ. ކްލަބް އީގަލްސް އިން ކެރިއަރު ފަށައި އޭގެ ފަހުން ވިކްޓްރީ، ވީބީ، ނިއު، މާޒިޔާ އަދި އެންމެ ފަހުން އިމްރާން ފެނުނީ ޓީސީ ޖޯޒީގަ އެވެ.

އިމްރާން މި ވަގުތު ގައުމީ ޓީމުގެ އެސިސްޓަންޓް ގޯލްކީޕަރު ކޯޗެއްގެ މަގާމުގައި ހުރިއިރު، ކުރިއަށް އޮތް ޕްރެޒިޑެންޓްސް ކަޕާ މެދު އޭނާ ހުރީ ހާއްސަ އުއްމީދެއްގަ އެވެ.

"އަޅުގަނޑު އެދެނީ ގައުމީ މުބާރާތުގެ ފޯރި ގަދަވެ، މި ތަށި ކާމިޔާބު ކުރުމަށްޓަކައި ޓީމުތަކުންނާއި ކުޅުންތެރިން ވަރަށް ބުރަ މަސައްކަތެއް ކޮށް، ރަނގަޅު ފެންވަރުގެ ފުޓްބޯޅައެއް ފެނިގެންދާނެ ކަމަށް،" އިމްރާން ބުންޏެވެ.

ހަތަރު ވަރަކަށް އަހަރު ތެރޭ ފުރަތަމަ ފަހަރަށް ޕްރެޒިޑެންޓްސް ކަޕްގައި ކުޅޭ ފުރަތަމަ މެޗު އޮންނާނީ މި މަހު 19 ވަނަ ދުވަހު އެވެ. މުބާރާތް ކުރިއަށްދާނީ ލީގު ފޯމެޓަށް އެއް ބުރަށެވެ. މާނަ އަކީ މިދިޔަ ސީޒަނުގައި ދިވެހި ޕްރިމިއާ ލީގުގައި ކުޅުނު އަށް ޓީމު ޕްރެޒިޑެންޓްސް ކަޕުން ފެންނާނެ އެވެ. ލީގު ބުރުގެ އެންމެ ކުރި ހޯދާ ދެ ޓީމާ އެކު މުބާރާތުގެ ފައިނަލް މެޗު ކުޅޭނީ އަންނަ މަހު 23 ވަނަ ދުވަހު އެވެ.

ރާއްޖޭގެ ފުޓްބޯޅަ ސީޒަން ފަށާނީ މި މަހު 15 ވަނަ ދުވަހު މާޒިޔާ އާއި ވެލެންސިއާ ބައްދަލުކުރާ އެފްއޭ ޗެރިޓީ ޝީލްޑް މެޗުންނެވެ.