މެންޗެސްޓާ (އޮކްޓޫބަރު 26) - އިނގިރޭސި ޕްރިމިއާ ލީގުގައި އެންމެ ފަހުން ވާދަވެރި ލިވަޕޫލް އަތުން އަމިއްލަ ދަނޑުގައި ލަދުވެތި ގޮތަކަށް މެންޗެސްޓާ ޔުނައިޓެޑް ބަލިވުމުން އެ ޓީމުގެ ކޯޗު އޮލެ ގުނަ ސޯލްޝެއާ މަގާމުން ވަކިކުރާނެ ކަމަށް ބެލެވިފައިވަނިކޮށް، ޔުނައިޓެޑްގެ އެންމެ ކާމިޔާބު ކޯޗު އެލެކްސް ފާގަަސަންގެ ސަޕޯޓާ އެކު ސޯލްޝެއާ އަށް ކްލަބުން އިތުރު ފުރުސަތެއް ދޭނެ ކަމަށް ރިޕޯޓްތައް ބުނެފި އެވެ.

ޔުނައިޓެޑްގެ ދަނޑު އޯލްޑް ޓްރެފޯޑްގައި އެ ޓީމު އަތުން ލިވަޕޫލް މޮޅުވީ 5-0 އިންނެވެ. މިއީ ޔުނައިޓެޑްގެ ތާރީހުގައި މިދިޔަ ބައި ގަރުނުގެ ތެރޭގައި އަމިއްލަ ދަނޑުގައި ލަނޑެއް ނުޖެހި މިހާ ތަފާތުކޮށް ބަލިވި ފުރަތަމަ މެޗެވެ.

ޔުނައިޓެޑްގެ ބޯޑުން ވަނީ ސޯލްޝެއާ ވަކިކުރުމާ މެދު ވަރަށް އަވަހަށް ގޮތެއް ނިންމަން ގިނަ ބައްދަލުވުންތަކެއް ބާއްވައިފަ އެވެ. އެކަމަކު، އެ ބައްދަލުވުމުގައި ބޯޑް މެމްބަރުންގެ މެޖޯރިޓީ އަށް އެއްގޮތަކަށް އެއްބަސްނުވެވޭތީ ވަކި ގޮތެއް ނުނިންމުނެވެ.

ފަހަކަށް އައިސް ޔުނައިޓެޑުން ކްލަބްގެ މުހިއްމު ނިންމުންތައް ނިންމާފައި ހުރީ އެ ކްލަބްގެ ތާރީހުގައި އެންމެ ކާމިޔާބު ކޯޗު ފާގަސަންގެ ލަފަޔާ އެކު އެވެ.

ރިޕޯޓްތައް ބުނާގޮތުން ފާގަސަން އެދުނީ ސޯލްޝެއާ އަށް އިތުރު ފުރުސަތެއް ދިނުމަށެވެ. ޔުނައިޓެޑުން މިއަދު ޕްރެކްޓިސްތައް ފެށިއިރު، ސޯލްޝެއާއާ އެކު ފާގަސަން ވެސް ޓްރެއިނިން ދަނޑަށް ދިޔަ ކަމަށް ރިޕޯޓްތައް ބުނެ އެވެ.

ސޯލްޝެއާ ވަކިކޮށްފިނަމަ ޔުނައިޓެޑުން ގެންނަން ބޭނުންވާ ކޯޗުންގެ ލިސްޓުގައި މި ވަގުތު އޮތީ ތިން ނަމެކެވެ. އެއީ ކުރިން ޗެލްސީ އަށް ކޯޗުކޮށްދިން އެންޓޯނިއޯ ކޮންޓޭ އާއި ރެއާލް މެޑްރިޑްގެ ކުރީގެ ކޯޗު ޒިނެދިން ޒިދާން ނޫނީ މި ވަގުތު ލެސްޓާ ސިޓީގައި ހުރި ކޯޗު ބްރެންޑަން ރޮޖާސް އެވެ.

އިޓަލީގެ މީޑިއާ ރިޕޯޓްތައް ބުނާގޮތުން މިދިޔަ ސީޒަނުގައި އިންޓަ މިލާނަށް އިޓަލީގެ ލީގު ކާމިޔާބު ކޮށްދިން ކޮންޓޭ ހުރީ ޔުނައިޓެޑްގެ ފުރުސަތު ލިބިއްޖެނަމަ ބޭނުން ހިފާގޮތަށެވެ. އެކަމަކު، ކޮންޓޭ ގެނައުމާ މެދު ޔުނައިޓެޑްގެ ބޯޑުގެ ވިސްނުން އޮތީ ދެކަފިވެފަ އެވެ. އެއީ މުސްތަގުބަލަށް ރަނގަޅު މަސައްކަތެއް ކުރަން ބަލާއިރު، ކޮންޓޭ އަކީ އެންމެ ރަނގަޅު ކޯޗެއް ނޫން ކަމަށް ބުނެ އެވެ.

އިނގިރޭސި މީޑިއާ ރިޕޯޓްތައް ބުނާގޮތުން އަންނަ ހޮނިހިރު ދުވަހުގެރޭ ޓޮޓެންހަމް ހޮޓްސްޕާސް ދަނޑުގައި ކުޅޭ މެޗުގައި ޔުނައިޓެޑްގެ ކޯޗަކަށް ހުންނާނީ ސޯލްޝެއާ އެވެ.

އެންމެ ފަހުން ޔުނައިޓެޑުން ކުޅުނު ނުވަ މެޗުގެ ތެރެއިން ފަސް މެޗުން ވަނީ ބަލިވެފަ އެވެ. ލީގުގައި އެންމެ ފަހުން ކުޅުނު ހަތަރު މެޗުން ވެސް ޔުނައިޓެޑަށް މޮޅެއް ނުލިބެ އެވެ. ޔުނައިޓެޑުުން މީގެ ކުރިން ސޯލްޝެއާ އަށް 100 ޕަސެންޓް އިތުބާރު އޮތް ކަމަށް ބުނެފައިވީ ނަަމަވެސް ޓޮޓެންހަމް މެޗަކީ ޔުނައިޓެޑްގައި އޭނާގެ ހާލަތު ބަދަލުކުރަން ލިބޭ ފަހު ފުރުސަތު ކަމަށް ރިޕޯޓްތައް ބުނެ އެވެ.

ޔުނައިޓެޑްގެ ކޯޗުކަމާ 2018 ވަނަ އަހަރު ޑިސެމްބަރު މަހު ހަވާލުވި ސޯލްޝެއާ ވަނީ މި ސީޒަން ފެށުމުގެ ކުރިން ޔުނައިޓެޑާ އެކު ހަދާފައިވާ ކޮންޓްރެކްޓް އިތުރު ތިން އަހަރަށް އާ ކޮށްފަ އެވެ.