ގަތަރު، ދޯހާ (ސެޕްޓެމްބަރު 13) - އަންނަ މަހު ކުޅެން ޝެޑިއުލްކޮށްފައިވާ ސާފް ޗެމްޕިއަންޝިޕަށް ތައްޔާރުވުމުގެ ކުރިން ގަތަރުގައި މިހާރު ގައުމީ ފުޓްބޯޅަ ޓީމުން ކުރިއަށްގެންދާ ޓްރެއިނިން ކޭމްޕްގެ އެހީގައި ފޯކަސް ގެއްލުވާނުލައި ޓްރެއިނިން ކުރިއަށް ގެންދިއުމުގެ ފުރުސަތު ހުރިހާ ކުޅުންތެރިންނަށް ލިބިގެންދާނެ ކަމަށް ޓީމުގެ އެސިސްޓަންޓް ކޯޗު އިސްމާއިލް މަހްފޫޒް (އިންމަ) ބުނެފި އެވެ.

ގައުމީ ކޯޗު އަލީ ސުޒޭން ކޮވިޑަށް ޕޮޒިޓިވްވެފައިވާތީ ޓްރެއިނިން ކޭމްޕްގައި އަދި ބައިވެރިނުވެ އެވެ. ހާލަތު ބެލުމަށް ފަހު ކޮވިޑަށް ޓެސްޓްކޮށް ނެގެޓިވްވެއްޖެނަމަ ސުޒޭން ޓީމާ ގުޅެން ފުރާނެ އެވެ. ސުޒޭން ޓީމާ ގުޅެން ދެން ޓީމު ލީޑުކުރުމުގެ ޒިންމާއާ ހަވާލުވެ ހުރީ އިންމަ އެވެ.

ގަތަރުގައި ރޭ ކުރިއަށްގެންދިޔަ ޓްރެއިނިން ސެޝަން ނިންމާލުމަށް ފަހު އިންމަ ބުނީ ޓްރެއިނިން ކޭމްޕްގެ އެންމެ އިސް ބަޔަކީ ޓީމް ބިލްޑިން ކަމަށާއި އެ ކަމަށް މި ޓްރެއިނިން ކޭމްޕްގެ ބޭނުން ރަނގަޅަށް ހިފޭނެ ކަމަށެވެ.

"މި ފުރުސަތުތަކަކީ އަޅުގަނޑު މެންނަށް ލިބުނު ވަރަށް މުހިއްމު ފުރުސަތެއް. އަޅުގަނޑުމެންގެ ޕްލޭޔަރުން މި އުޅެނީ އެއް ތަނެއްގައި. އުޅޭ ކަމަށްވަންޏާ ވީހާވެސް ބޮޑަށް ދަނެ، ފުޓްބޯޅައިގެ ފީލްޑްގައި ދަސްކުރުމުގެ އިތުރުން ޕާސަނަލީ ޕްލޭޔަރުން އެކަކު އަނެކަކަށް ދަސްވެ އަންޑަސްޓޭންޑް ވުމުގެ ވަރަށް ބޮޑު ފުރުސަތެއް މިއީ. މީގެ ބޭނުން ވީހާވެސް އެންމެ ރަނގަޅަށް ބޭނުން ކުރާނަން،" އިންމަ ބުންޏެވެ.

ގަތަރު ޓްރެއިނިން ކޭމްްޕްގައި ގައުމީ ޓީމުން މެޗުތަކެއް ކުޅެން ވަނީ ހަމަޖެހިފަ އެވެ. މިހާރު އޮތްގޮތުން ސްރީލަންކާ ގައުމީ ޓީމާ ކުޅޭ މެޗު ހިމެނޭ ގޮތަށް އަދި އިތުރު ދެ މެޗެއް ކުޅެން ވަނީ ނިންމައިފަ އެވެ.

އިންމަ ބުނީ މުޅި ޓްރެއިނިން ކޭމްޕާއި އެ މެޗުތަކުގެ ވެސް މައިގަނޑު ފޯކަސް އަކީ ސާފް ޗެމްޕިއަންޝިޕް ކަމަށާއި އެހެން ކަމުން އެ މެޗުތަކުގެ ކަންކަން ރޭވިގެންދާނީ ވެސް ސާފްގެ ތައްޔާރުވުމުގެ ވިސްނުން ބަހައްޓައިގެން ކަމަށެވެ.

"އަޅުގަނޑުމެންގެ (ޓްރެއިނިން) މެޗުތަކުގެ ފޯކަސް ވެސް މީދީ ސާފް ޗެމްޕިއަންޝިޕަށް. އެ މުބާރާތުގެ ނަތީޖާ އަށް،" ކުރިން ގައުމީ ޓީމުގެ އެސިސްޓަންޓް ކޯޗެއްގެ ގޮތުގައި ހުރެ ދެ މެޗެއްގައި ޓީމުގެ ހެޑް ކޯޗެއްގެ މަގާމު ވެސް ފުރި އިންމަ ބުންޏެވެ.

"އަޅުގަނޑުމެންގެ ރިކަވަރީ އަށް ވިސްނައިގެން ގިނަ ކުޅުންތެރިންނަށް ފުރުސަތު ދެވޭތޯ ބަލާނަން،"

މުބާރާތުގެ ފުރަތަމަ މެޗުގައި ރާއްޖޭން އަންނަ މަހު އެއް ވަނަ ދުވަހު ނުކުންނާނީ ނޭޕާލާ ދެކޮޅަށެވެ. އެ މެޗާ ދެމެދު މިހާރު މި އޮތީ ގާތްގަނޑަކަށް ތިން ހަފްތާއެއްހާ ދުވަހެވެ. ޓްރެއިނިން ކޭމްޕްގައި ކުރިއަށްދަނީ ޓީމުގެ މެޗު ފިޓްނަސް އާއި އިންޓެންސިޓީ މައްޗަށް ޖައްސާލުމުގެ ކަންކަމެވެ. އިންމަ ވެސް ވަނީ އެކަން ފާހަގަކޮށް މީގެ ވިސްނަން ޖެހޭ ކަންކަމަށް ސަމާލުކަން ދޭނެ ކަަމަށް ބުނެފ އެވެ.

"މި ގޮތަށް އިންޓެންސިޓީ ގެންގުޅޭ ވަރަށް ރިކަވަރީ އަށް ވެސް އަޅުގަނޑުމެން ބަލައިގެން މިދަނީ. ހުރިހާ ޕްލޭޔަރުން ވެސް އެއް ރޫހެއްގައި ހަމަ ނަތީޖާ ނެރެން. އެ ރޫހުގައި ވަރަށް ރަގަޅަށް ޕްލޭޔަރުންގެ ތިބީ ނަތީޖާ ނެރެން. އުއްމީދު ބޮޑު ޕްލޭޔަރުންނާ މެދު،" އިންމަ ބުންޏެވެ.

ރާއްޖޭން މި ފަހަރުގެ ސާފް ޗެމްޕިއަންޝިޕާ ކުރިމަތިލާނީ އެންމެ ފަހުގެ ޗެމްޕިއަނުންގެ ގޮތުގަ އެވެ. ރާއްޖޭން އެންމެ ފަހުން 2018 ވަނަ އަހަރުގެ ސާފް ޗެމްޕިއަންޝިޕް ކާމިޔާބުކުރި ސްކޮޑުގައި ހިމެނޭ ގިނަ ކުޅުންތެރިންތަކެއް ވެސް މި ފަހަރުގެ ޓީމުގައި ހިމެނެ އެެވެ. މި މަހު 28 ގެ ނިޔަލަށް ގަތަރު ޓްރެއިނިން ކޭމްޕް ނިންމާލުމަށް ފަހު މުބާރާތަށް ފައިނަލް ކުރާނީ 23 ކުޅުންތެރިންގެ ސްކޮޑެކެވެ.