ލިވަޕޫލް (ޖުލައި 10) - ލިވަޕޫލް ދޫކޮށް ފްރާންސްގެ ޕީއެސްޖީ އަށް ބަދަލުވި މިޑްފީލްޑަރު ޖިއޮޖީނިއޯ ވައިނަލްޑަމް ނެތްތަނަށް ލިވަޕޫލުން ގެންނަން ބޭނުންވަނީ އެތުލެޓިކޯ މެޑްރިޑްގެ ސައުލް ނިގޭޒް ނޫނީ ލިލް އަށް ކުޅޭ ރެނާޓޯ ސަންޗޭސް ކަމަށް މީޑިއާ ރިޕޯޓްތައް ބުނެފި އެވެ.

ވައިނަލްޑަމް ލިވަޕޫލާ އެކު ހެދި އެއްބަސްވުން ހަަމަވެ ހިލޭ ޓްރާންސްފާއެއްގެ ދަށުން ބަދަލުވާނެ ކަމަށް ފުރަތަމަ ބެލެވުނީ ސްޕެއިނުގެ ބާސެލޯނާ އަށެވެ. އެކަމަކު، ބާސެލޯނާ އަށް ވުރެ މުސާރަ ބޮޑު ކޮންޓްރެކްޓެއް ދީގެން ވައިނަލްޑަމްގެ ސޮއި ހޯދީ ޕީއެސްޖީންނެވެ.

ލިވަޕޫލުން ވައިނަލްޑަމް ނެތްތަނަށް ފުރަތަމަ ގެންނަން ބެލީ ލެސްޓާ ސިޓީ އަށް ކުޅޭ ބެލްޖިއަމްގެ މިޑްފީލްޑަރު ޔޫރީ ޓީލަމަންސް އެވެ. އެކަމަކު، ލެސްޓާ އިން ޓީލަމަންސް ވިއްކާލަން ކިޔާ އަގުބޮޑުވެ، ލިވަޕޫލުން އެހެން ކުޅުންތެރިންނަށް ފާރަލާން ފެށީ އެވެ. އެ ގޮތުން ލިވަޕޫލަށް ފާހަގަކުރެވުނީ ސްޕެނިޝް ލީގުގައި މިދިޔަ އަހަރުތަކުގައި އެތުލެޓިކޯ އަށް މޮޅު ކުޅުމެއް ދެއްކި ސައުލް އާއި މި ފަހަރު ޔޫރޯގައި ތަފާތު ކުޅުމެއް ދެއްކި ރެނާޓޯ އެވެ.

އުމުރުން 23 އަހަރުގެ ރެނާޓޯ ވަނީ މީގެ ކުރިން ބަޔާން މިއުނިކާއި އިނގިރޭސި ޕްރިމިއާ ލީގުގެ ސްވަންސީ ސިޓީ އަށް ކުޅެފަ އެވެ. އެކަމަކު، އެ ދެ ޓީމުގައި ވެސް އޭނާ ޕޯޗުގަލްގައި ދައްކާ މޮޅު ކުޅުން ނުދެއްކުނެވެ. ލިލް އަށް 2019 ވަނަ އަހަރު ބަދަލުވެ، ރެނާޓޯ އަންނަނީ މޮޅު ކުޅުމެއް ދައްކަމުންނެވެ. އަދި މިދިޔަ ސީޒަނުގައި ލިލް އަށް ފްރާންސްގެ ޗެމްޕިއަންކަން ހޯދައިދޭން ރެނާޓޯ ޓީމުގެ މެދުތެރޭގައި ތަފާތު ދެއްކި އެވެ.

ރެނާޓޯ ގަންނަން ބޭނުންނަމަ ލިވަޕޫލުން 45 މިލިއަން ޑޮލަރުގެ ޓްރާންސްފާ ފީއެއް ދައްކަން ޖެހޭނެ އެވެ. އޭނާ ހޯދަން އާސެނަލުން ވެސް އަންނަނީ މަސައްކަތް ކުރަމުންނެވެ. ދާދި ފަހުން ލިލްގެ އޮފިޝަލަކު ފްރާންސް ނޫހަކަށް ބުނީ މި ފަހަރުގެ ޓްރާންސްފާ މާކެޓް ނިމުމުގެ ކުރިން ރެނާޓޯ އެހެން ކްލަބަކަށް ބަދަލުވުމުގެ ފުރުސަތު ބޮޑު ކަމަށެވެ.

މީގެ ކުރިން ވެސް ސައުލް އިނގިރޭސި ކްލަބަކަށް ގުޅެން އުޅޭ ކަމަށް މީޑިއާގައި ވާހަކަ ދެކެވުނެވެ. އެކަމަކު އޭރު އެތުލެޓިކޯ އިން ސައުލް ވިއްކާލަން ކިޔާ އަގު ބޮޑުވުމުން އެއްވެސް ކްލަބަކުން އެ ވަރުގެ ބޮޑު ޓްރާންސްފާ ފީ އެއް ދައްކާފައި ސައުލް ގެންނަން ބޭނުމެއް ނުވެ އެވެ. އެތުލެޓިކޯ އިން މިދިޔަ އަހަރުތަކުގައި ސައުލް ވިއްކާލަން ބޭނުންވީ 75 މިިލިއަން ޑޮލަރަށެވެ.

އެތުލެޓިކޯ އިން މި ފަހަރުގެ ޓްރާންސްފާ މާކެޓްގައި އުމުރުން 26 އަހަރުގެ ސައުލް އެ ޓީމު ދޫކޮށްދާނެ ކަމަށް ބަލައި ވަނީ އިޓަލީގެ އުދިނޭޒީ އަށް ކުޅޭ އާޖެންޓީނާ ގައުމީ ޓީމުގެ ރޮޑްރީގޯ ޑެ ޕޯލް ގެންނަން ނިންމައިފަ އެވެ. ކޮޕަ އެމެރިކާ އަށް ފަހު ޑެ ޕޯލް އެތުލެޓިކޯއާ ގުޅުމުގެ ހުރިހާ ކަމެއް ނިމިގެންދާނެ އެވެ.

ސްޕެއިނުގެ މީޑިއާ ރިޕޯޓްތައް ބުނާގޮތުން ސައުލް ހޯދުމުގެ ރޭހުގައި މި ވަގުތު އެންމެ ކުރީގައި އޮތީ ލިވަޕޫލް އެވެ. އަދި އެތުލެޓިކޯ އިން މިހާރު ސައުލް ވިއްކާލަން ކިޔާ އަގު 45 މިލިއަން ޑޮލަރަށް ކުޑަކޮށްފައިވާއިރު، ލިވަޕޫލުން އެ ވަރުގެ ބިޑެއް ސައުލް ހޯދަން ކުރާނެ ކަމަށް ސްޕެއިނުގެ ނޫސްތަކުން ވަނީ ރިޕޯޓްކޮށްފަ އެވެ.

މީޑިއާ ރިޕޯޓްތައް ބުނާގޮތުން ލިވަޕޫލުން އަންނަނީ ވުލްވްސްގެ ސްޕެނިޝް ވިންގް އެޑަމާ ޓްރައޮރޭ އާއި ޕޯޓޯގެ ބްރެޒިލް މިޑްފީލްޑަރު އޮޓާވިއޯ އަށް ވެސް ފާރަލަމުންނެވެ. އެކަމަކު އޭގެއިން އެއްވެސް ކުޅުންތެރިއަކު ހޯދަން ސީރިއަސްކޮށް މަސައްކަތްކުރާނީ މި ފަހަރުގެ ޓްރާންސްފާ މާކެޓްގައި ލިވަޕޫލުން ވިއްކާލެވޭ ކުޅުންތެރިންނަށް ބެލުމަށް ފަހު އެެވެ.

ވައިނަލްޑަމް ނެތްތަނަށް ކުޅުންތެރިއަކު ނުލިބިއްޖެނަމަ ލިވަޕޫލްގެ ވިސްނުމަކީ އެ ޓީމުގެ ޒުވާން ތަރި ކާޓިސް ޖޯންސް އަށް ފުރަތަމަ ޓީމުން ދޭ ފުރުސަތު މިދިޔަ ސީޒަނަށް ވުރެ އަންނަ އަހަރު އިތުރު ކުރުމެވެ.