މޯލްޑިވް ގޭސްގެ އަންހެން މުވައްޒަފަކަށް އެތަނުގެ ކުރީގެ ޑެޕިއުޓީ މެނޭޖިން ޑިރެކްޓަރު އަލީ އިކްރާމް ޖިންސީ ފުރައްސާރަކުރި ކަމަށް ތުހުމަތުކުރާ މައްސަލައިގައި ހެއްކެއް ނެތް ކަމަށް ނިންމައި މައްސަލަ މި ހަފުތާގައި ފައިލްކޮށްފި އެވެ.

ޖިންސީ ފުރައްސާރައިގެ އިތުރުން ކޮރަޕްޝަންގެ ތުހުމަތު ކުރެވުމާ އެކު މަގާމުން އިސްތިއުފާ ދެއްވި އިކްރާމްގެ މައްސަލަ ފުލުސް އޮފީހާއި ޖެންޑާ މިނިސްޓްރީއަށް ހުށަހެޅި އެވެ.

ފުރައްސާރައިގެ މައްސަލަ ތަހުގީގުކޮށް ބެލިއިރު ކުށުގެ އަމަލެއް ހިނގާފައިވާ ވަރުގެ ހެއްކާއި ގަރީނާ ނެތް ކަމަށް ފުލުހުން މި މައްސަލަ ތަހުގީގުކޮށް ނިމުނު ގޮތުގެ ލިއުމުގައި ވެ އެވެ. އެހެންވެ މައްސަލަ ފައިލް ވެސް ކޮށްފި އެެވެ.

އިކްރާމާ ދެކޮޅަށް މައްސަލަ ހުށަހެޅި އަންހެން މުވައްޒަފު ބުނެފައި ވަނީ އޭނާ އަށް ފޮށިހަދާވަރުން އެތަނުގައި މަސައްކަތް ކުރަން ވެސް އުނދަގޫވި ކަމަށެވެ. އަންހެން މުވައްޒަފަށް އޭނާ ފޮނުވި މެސެޖްތައް ސޯޝަލް މީޑިއާގައި އާއްމުކޮށްފައި ވެސް ވެ އެވެ. އެ ޗެޓު ލޮގު ފުލުހުންގެ ތަހުގީގަށް އަންހެން މުވައްޒަފު ދިނެވެ.

އިކްރާމް ކުރިން ވިދާޅުވެފައި ވަނީ ޗެޓް ލޮގަކާ އެކު އޭނާއާ ދެކޮޅަށް މައްސަލައެއް ހުށަހެޅި ނަމަވެސް ފުރައްސާރައިގެ މެސެޖެއް ނުކުރައްވާ ކަމަށެވެ.

ޖިންސީ ފުރައްސާރައިގެ މައްސަލައިން އިކްރާމް ސަލާމަތްވި ނަމަވެސް އޭނާއާ އަށް ތުހުމަތުކުރެވޭ ހިޔާނާތުގެ މައްސަލައެއް ރައްޔިތުންގެ މަޖިލީހުގެ އެސްއޯއީ ކޮމިޓީން ވަނީ އެންޓި ކޮރަޕްޝަން ކޮމިޝަނަށް ހުށަހަޅައިފަ އެވެ.

އެއީ، ކޮވިޑް ފެސިލިޓީތަކަށް 4،128 އޮކްސިޖަން ސިލިންޑަރު ގަތުމުގައި 16 މިލިއަން ރުފިޔާގެ ހިޔާނާތެއް ހިންގަވާފައިވާ ކަމުގެ ތުހުމަތެކެވެ. އިކްރާމްގެ އަތެއް އޮވެ، އޮކްސިޖަން ސިލިންޑަރުތައް ގަންނަން ހަވާލުކުރީ އެންމެ ބޮޑު އަގު ހުށަހެޅި ސިންގަޕޫރުގެ ޕްރޯ ބިޒް ކުންފުންޏާ ކަމަށް އެސްއޯއީގެ ރިޕޯޓުގައިވެ އެވެ.

އެ ކުންފުނީގެ ޚަރަދުގައި ސިންގަޕޫރަށް ދަތުރެއް ކުރެއްވި ކަމުގެ ތުހުމަތު ވެސް އޭނާގެ މައްޗަށް ކުރެ އެވެ. އެކަމަކު އެއީ ސިޔާސީ ގޮތުން އަބުރު ކަތިލުމުގެ ތުހުމަތެއް ކަމަށް ވިދާޅުވެ އިކްރާމް ވަނީ ހުރިހާ ތުހުމަތެއް ދޮގުކުރައްވައިފަ އެވެ.