ބްރެޒިލްގައި އޮންލައިންކޮށް ޖުވާކުޅުން މަނާކުރުމަށް އެ ގައުމުގެ ރައީސް ލުއިޒް އިނާސިއޯ ލޫލާ ދަ ސިލްވާ ނިންމަވައިފި އެވެ.
މި ނިންމެވުން އިއުލާނު ކުރައްވާފައި މިވަނީ، ރައީސްކަމުގެ ހަތަރުވަނަ ދައުރަކަށް ވާދަކުރައްވާ އިންތިޚާބަށް މަދު ދުވަސްކޮޅަކަށް ވެފައި ވަނިކޮށެވެ.
ޖަލަށްލާފައިވާ ބްރެޒިލްގެ ކުރީގެ ރައީސް ޖައިރް ބޮލްސޮނާރޯގެ ދަރިކަލުންނާ ވާދަކުރައްވާ ލޫލާ، ހުކުރު ދުވަހު ވަނީ "ކުޅިވަރުގެ ބެޓިންތަކާއި އޮންލައިން ކެސީނޯތައް" މަނާކުރާ ވަގުތީ އަމުރެއްގައި ސޮއިކުރައްވާފަ އެވެ.
ބްރެޒިލްގައި އޮންލައިން ޖުވާކުޅުމަކީ 2018 ވަނަ އަހަރުން ފެށިގެން ގާނޫނީ ގޮތުން ހުއްދަ ކަމެކެވެ. ނަމަވެސް، އޭގެ ސަބަބުން ގިނަ ބަޔަކު ދެވިހިފާ، އާއިލާތަކުގެ އާމްދަނީއަށް ބޮޑެތި ގެއްލުންތަކެއް ވަމުންދާ ކަމުގެ ޝަކުވާ ވަނީ ބޮޑުވެފަ އެވެ.
މި ނިންމެވުން އިއުލާނު ކުރައްވަމުން ރައީސް ލޫލާ ވަނީ ޖުވާކުޅުމުގެ ސިނާއަތަކީ "ކެންސަރެއް" ގެ ގޮތުގައި ސިފަކުރައްވާފަ އެވެ. އަދި އެ "ޓިއުމަރު" ނައްތާނުލައިފި ނަމަ، އޭގެ ސަބަބުން މުޅި ގައުމު ހަލާކުވެދާނެ ކަމަށް އެމަނިކުފާނު ވިދާޅުވި އެވެ.
މި ފިޔަވަޅު އަޅާފައި މިވަނީ ބްރެޒިލްގެ ރިޔާސީ އިންތިޚާބުގެ ފުރަތަމަ ބުރުގެ ވޯޓުލުމަށް ހަފުތާއަކަށް ވުރެ ކުޑަ ދުވަސްކޮޅަކަށް ވެފައި ވަނިކޮށެވެ. އެންމެ ފަހުގެ ހިޔާލު ހޯދުމުގެ ވޯޓުތަކުން ދައްކާގޮތުގައި، އުމުރުފުޅުން 80 އަހަރުގެ ލޫލާ އާއި ފްލާވިއޯ ބޮލްސޮނާރޯއާ ދެމެދު އޮތީ ވަރަށް ކުޑަ ތަފާތެކެވެ.
މި އައު ފިޔަވަޅުތައް ދާއިމީ ގޮތެއްގައި ދެމެހެއްޓުމަށްޓަކައި، ކުރިއަށް އޮތް 120 ދުވަހުގެ ތެރޭގައި ބްރެޒިލްގެ ކޮންގްރެސްގެ ހުއްދަ ހޯދަން ޖެހޭނެ އެވެ.
އެކްސްގައި ކުރެއްވި ޕޯސްޓެއްގައި ލޫލާ ވިދާޅުވީ، އޮންލައިން ބެޓިން ތައާރަފުވީ ކުރީގެ ރައީސް މިޝޭލް ޓެމާގެ ސަރުކާރުގައި ކަމަށް ވިޔަސް، ބޮލްސޮނާރޯގެ ވެރިކަމުގައި އެކަން ފެތުރިގެން ދިޔައީ އެއްވެސް އުސޫލެއް ނެތި ކަމަށެވެ.
ޚާއްސަކޮށް ކުޑަކުދިންނާއި ފުރާވަރުގެ ކުދިން އޮންލައިން ބެޓިންގެ ތެރެއަށް ވަނުން ހުއްޓުވުމަށް އެއްވެސް ހުރަހެއް ނެތްކަން އެމަނިކުފާނު ފާހަގަކުރެއްވި އެވެ.
ޖުވާއަށް ދެވިހިފުމުގެ ސަބަބުން ގޭގައި ހުރި ހުރިހާ މުދަލެއް ވިއްކާލަން ޖެހުނު އާއިލާތަކުގެ ވާހަކަތައް އަޑުއިވިފައިވާ ކަމަށް ވެސް ލޫލާ ވިދާޅުވި އެވެ.
އޮންލައިން ބެޓިން މަނާކުރުމުގެ އަމުރުގެ އިތުރުން، ފިކްސްޑް-އޮޑްސް ބެޓިންއާ ގުޅުންހުރި ޖިނާއީ ކުށްތަކަށް އަދަބު ދިނުމުގެ ބިލެއްގައި ވެސް ލޫލާ ވަނީ ސޮއިކުރައްވާފަ އެވެ.
މި ހަފުތާގެ ކުރީކޮޅު އދ. ގެ އާންމު މަޖިލީހުގައި ވާހަކަދައްކަވަމުން ވެސް ލޫލާ ވަނީ، ޖުވާކުޅުމުގެ ސިނާއަތުން މީހުންގެ ދެވިހިފުން ބޭނުންކޮށްގެން ނާޖާއިޒު ފައިދާ ހޯދަމުންދާ ކަމަށް ތުހުމަތު ކުރައްވާފަ އެވެ.
