ޘުމާމާ ބިން އުޘާލް މުސްލިމުން އަސީރުކޮށްގެން ގެންގޮސް މަސްޖިދުއްނަބަވީގެ ތަނބެއްގައި ބަނދެ ހައްޔަރުކުރި އެވެ. މިހެން ހުއްޓާ މާތް ނަބިއްޔާ އޭނާގެ ކައިރިން ވަޑައިގަންނަވާ ކޮންމެ ފަހަރަކު އޭނާއާ ނުހަނު ރަނގަޅަށް މުއާމަލާތުކުރައްވަ އެވެ. އަދި އެކަލޭގެފާނުގެ ސަހާބީންނަށް އަމުރުކުރެއްވި އެވެ. އެންމެ މީރު ކާއެއްޗެއްސާއި ބޯ އެއްޗެހި އޭނާއަށް ދޭށެވެ. އޭގެ ތިން ދުވަސް ފަހުން މާތް ނަބިއްޔާ އެއްވެސް ޝަރުތެއް ވެސް ނެތި އޭނާ މިނިވަންކޮށް ދޫކޮށްލުމަށް އަމުރުކުރެއްވި އެވެ. އޭނާ ދޫކޮށްލުމުން މިސްކިތުން ނުކުމެގެން ގޮސް ފެން ހުރި ތަނެއް ހޯދައިގެން ފެންވަރައިގެން މިސްކިތަށް އެނބުރި އައިސް ދެންނެވި އެވެ.
"އޭ މުހައްމަދެވެ. ހަމަ ހުވަޔެވެ. ކަލޭގެފާނުގެ މޫނުފުޅަށްވުރެ އަހަރެން ރުޅިއަރާ ހަމަ އެކައްޗެއްވެސް މީގެ ކުރިން މި ބިންމަތީގައި ނުވެ އެވެ. މިހާރު ކަލޭގެފާނުގެ މޫނުފުޅަކީ އަހަރެން އެންމެ ލޯބިވާ މޫނުކަމުގައި ވެއްޖެ އެވެ." މިހެން ދަންނަވާފައި އޭނާ ޝަހާދަތް ކިޔާ އިސްލާމްވީ އެވެ. އޭނާއަކީ އޭނާގެ ގަބީލާގެ ބޮޑެއް ކަމުން އޭނާގެ ގަބީލާއާއި ޔަމާމާއޭ ކިޔުނު ސަރަހައްދު އެއްކޮށް އޭނާގެ ފަހަތުން އިސްލާމްވި އެވެ.
މުސްލިމުން އިސްލާމްދީން އުގެނި ދަސްކުރީ މިދެންނެވުނު މާތް ނަބިއްޔާ މުހައްމަދުގެފާނުގެ އަރިހުންނެވެ. މުސްލިމުން އިތުރު އެކަލޭގެފާނުގެ އަރިހުން ދަސްކުރި އަމަލީ އިސްލާމްދީން އިސްލާމީ އުންމަތް އޭގެ ކުރިބޯއްޓަށް އަރާފައި ދުޝްމަނުންގެ އަތުން ބަލިވެ ބަގުދާދު ފުނޑި ސުންނާފަތިވީއިރުވެސް މުސްލިމުންގެ މެދުގައި ދިރިދިރި އޮތެވެ. މީގެ މިސާލެއް ދަންނަވާނަމެވެ.
ތަތާރުން ބަގުދާދަށް އަރާ އެތަން ސުންނާފަތިކޮށް އެތަނުގައި އޮތް އިސްލާމީ ހިލާފަތު ވައްޓާލައި އެމީހުންގެ ބާރުގެ ދަށަށް ގެނައެވެ. އަދި އެތަނުގައި އެތައް ލޭ އޮހޮރުވުމަކާއި އެތައް ފަސާދައެއް ހިންގުމަށްފަހު އެމީހުންގެ ތެރެއިން އެތައް ބަޔަކު އެތަނުގައި ވަޒަންވެރިވި އެވެ. ދުނިޔޭގައި އާންމުވެ ކަންހިނގަމުން ގޮސްފައި އޮތް އުސޫލަކީ އަދި މިއަދާ ހަމައަށްވެސް ވަމުން އަންނަ ގޮތަކީ ބަޔަކު މީހުންގެ މައްޗަށް ނަސްރެއް ހޯދާ ބަޔެއްގެ ނުފޫޒު ބަލިވާ މީހުންނަށް ފޯރުމެވެ. އެކަމަކު ބަގުދާދުގައި ވަޒަންވެރިވީ ތަތާރުންގެ ކަންތައް ހިނގާދިޔައީ އެޔާ އިދިކޮޅަށެވެ.
ތަތާރުންނާއި މުގޯލުން ބަގުދާދުގެ މުސްލިމް ރައްޔިތުންނާއެކުވެ މަސްހުނިވެ އުޅެން ފެށިތާ މާގިނަ ދުވަސްތަކެއް ނުވެ މުސްލިމުންގެ މަތިވެރި އަހުލާގުގެ އަސަރުތަކުން އެބައިމީހުންގެ ހިތް އިސްލާމްދީން ފަތަހަކޮށްފި އެވެ. މަޝްހޫރު ޖެންކީޒްޚާންގެ ކާފަ ދަރި އިސްލާމްވީ އެކަމުގެ ސަބަބުންނެވެ. އެޔާއެކު މުގޯލުންގެ އެތައް ލީޑަރުންނަކާއި އެތައް ޖަމާއަތެއް އިސްލާމްވި އެވެ.
މިކަހަލަ ކިތަންމެ މިސާލެކެވެ. މީލާދީން ހަތްވަނަ ގަރުނެވެ. އަރަބި މުސްލިމުންގެ ޖަމާއަތެއް ސިލޯނަށް ދިއުމުގެ މަގުމަތީގައި ކެރެލާގެ ކޮޑަންގައްލޫރުގައި މަޑުކުރި އެވެ. އެތާގެ ރަސްގެފާނު ޗޭރަމަން ޕެރުމާލް މި މީހުންނާ ބައްދަލުކުރި އެވެ. އެ މީހުންގެ ދިރިއުޅުމުގެ ސާދާކަމާއި، ރޭގަނޑު ކުރާ އަޅުކަމާއި، ތެދުވެރި ވާހަކަތަކުގެ ސަބަބުން ރަސްގެފާނުގެ ހިތްޕުޅަށް ވަރަށް ބޮޑު އަސަރެއް ކުރި އެވެ. ނަތީޖާއެއްގެ ގޮތުން، ރަސްގެފާނު ރަސްކަން ދޫކުރައްވައި، މުސްލިމުންނާއެކު މައްކާއަށް ދަތުރުކުރައްވައި އިސްލާމްދީން ޤަބޫލުކުރެއްވި އެވެ. އިންޑިއާގައި ބިނާކުރެވުނު ފުރަތަމަ މިސްކިތް ބިނާކުރެވުނީ މި ހާދިސާއަށްފަހު އެ ރަށުގަ އެވެ. އެ މިސްކިތުގެ ނަން އެވަނީ އެރަސްގެފާނުގެ ނަންފުޅަށް ނިސްބަތްކުރެވިފަ އެވެ.
މީލާދީން ތޭރަވަނަ ގަރުނުގައި އިންޑޮނޭޝިޔާގެ ސުމަޓްރާގައި ހިނގި ހާދިސާއެއް ދަންނަވާނަމެވެ. ގައިރު މުސްލިމް ވިޔަފާރިވެރިއަކަށް އޮޅިގެން މުސްލިމް ވިޔަފާރިވެރިއެއްގެ އަތަށް މާ ގިނައިން ފައިސާ ދެވުނީ އެވެ. މުސްލިމް މީހާ އެތައް މޭލެއްގެ ދުރަށް ދަތުރުކޮށް، އެ މީހާ ހޯދައިގެން އެ ފައިސާ އަނބުރާ ރައްދުކުރީ އެވެ. މިވާހަކައެއް ރަށު ތެރޭގައި މަޝްހޫރުވިއިރު ވެސް، މުސްލިމުންގެ އަދުލުވެރިކަމުގެ ވާހަކަ އެރަށު ތެރޭގައި ފެތުރިފައި އޮތީ ނިކަން ބޮޑަށެވެ. އެރަށު މީހުންގެ ބަޔެއްގެ މެދުގައި އަރާރުމެއް ހިނގިޔަސް ތަޅާފޮޅުމެއް ހިނގިޔަސް އިންސާފު ލިބޭތޯ ގޮސް އުޅެނީ މުސްލިމް ވިޔަފާރިވެރިންގެ ގާތަށެވެ. ސަބަބަކީ އެބައިމީހުން މޫނަށް ކަނދުރާ އަށް ނުބަލާ އަދި މުސްލިމެއް ގައިރު މުސްލިމެއް ފަރަގު ނުކޮށް ތެދުވެރިކަމާއެކު ހެކިބަސްދިނުމާއި ވަކިފަރާތަކަށް ނުޖެހި ގޮތް ނިންމައިދޭތީ އެވެ. އެތާގެ ރަސްގެފާނު މަރާހު ސިލޫ އިސްލާމްވެ، ސުލްޠާން މަލިކުއްޞާލިޙްގެ ނަންފުޅުން އެތަނުގައި އިސްލާމީ ވެރިކަމެއް ފެއްޓެވީ މި ސަބަބުތަކާ ހުރެ އެވެ.
ދާދި މިދާކަށް ދުވަހު ރާއްޖެ ވަޑައިގަތް އިއްޒަތްތެރި އަންވަރު އިބްރާހީމް ބޮޑު ވަޒީރުކަން ކުރައްވާ މެލޭޝިޔާއާއި އެސަރަހައްދުގައި ހިމެނޭ ސިންގަޕޫރުގައި ވެސް އޮތީ، މީލާދީން ފަނަރަވަނަ ގަރުނަށް އެޅުނުއިރުވެސް ހިންދޫ ދީނެވެ. މިހެން މިކަން އޮއްވައި، ޔަމަނު ކަރައިންނާއި އިންޑިއާގެ ގުޖުރާތުން އަންނަ މުސްލިމް ވިޔަފާރިވެރިން މިރަށްރަށުގެ ބާޒާރުތަކުގައި ވިޔަފާރިކުރަން ފެށި އެވެ. އިސާހިތަކު މި ވިޔަފާރިވެރިންނަށް އާންމުން މާބޮޑަށް އިތުބާރުކުރަން ފަށައިފި އެވެ. އެހެން އެކަން ވީ ސަބަބެއްކަމުގައި ވަނީ، މި މީހުން މުދާ ވިއްކުމުގެ ކުރިއަށް އެތަކެތީގައި ފޮރުވިފައި ހުންނަ އައިބުތައް ކަސްޓަމަރުންނަށް ކިޔައިދޭތީއާއި، މިނެކިރުމުގައި މަކަރު ނަހަދާކަމަށް އާންމުންނަށް ގަބޫލުކުރެވޭތީ އެވެ.
އެތަނުގެ ރަސްގެފާނަކަށް އޭރު ހުންނެވި ޕަރަމޭސްވަރާ އޭނާގެ ފަރާތުން މިކަމެއް ތަހުގީގުކުރުމަށް ޕޯޓް މާސްޓަރެއް ވެސް އައްޔަންކުރައްވައިން ބެއްލެވިއިރު، މުސްލިމް ވިޔަފާރިވެރިންގެ ހަމަ އަހުލާގު މާބޮޑަށް ވެސް ރަނގަޅު ކަމުގައި ބެލެވި މިކަމާ މި ރަސްގެފާނު މާބޮޑަކަށް ގަޔާވެވަޑައިގެން އޭގެ ސަބަބުތައް ދެނެވަޑައިގެން އަމިއްލަފުޅަށް އިސްލާމްދީން ގަބޫލުކުރައްވައި، އެމަނިކުފާނުގެ ނަންފުޅު ސުލްޠާން އިސްކަންދަރު ޝާހް އަށް ބަދަލުކުރައްވައި އެއީ އިސްލާމީ ދައުލަތެއްކަމުގައި ހެއްދެވި އެވެ.
މިވާހަކަތައް ތިޔަ އިއްޒަތްތެރި ކިޔުންތެރިޔާ ތިޔަ ވިދާޅުވީ އެވެ. އެހެރަ ފެންނަނީ މާތް ނަބިއްޔާ ޘުމާމަތު ބިން އުޘާލްގެ ހާދިސާއިން ފެށިގެން އެތައް ހާދިސާއަކުން އިތުރު އެކަލޭގެފާނުގެ ނަމޫނާ ދިރިއުޅުއްވުމުން މުސްލިމުން ދަސްކުރި ފިލާވަޅުތަކުގެ އަލީގައި ދުނިޔެއަށް އިސްލާމްދީން ފަތުރާ ފުޅާކުރި ފުރިހަމަ ތަސްވީރުތަކާއި މަންޒަރުތަކެވެ.
އަހަރެމެންނަކީ ވެސް މުސްލިމުންނެވެ. އަހަރެމެންގެ ވެރިންނަކީ އިސްލާމީ ވެރިންނެވެ. އަހަރެމެންގެ ވިޔަފާރިވެރިންނަކީ އިސްލާމީ ވިޔަފާރިވެރިންނެވެ. ދުއާއަކީ، ކާބަފައިން ފަދައިން އަހަރެމެންގެ ރީތި ދިރިއުޅުމާއި އޮމާން ގުޅުންތައް ފެނި އާޝޯޚުވެގެން ގައިރު މުސްލިމުން އަހަރެމެން އުޅޭ ގޮތަށް އުޅެންވެގެން އަހަރެމެންގެ ދީނަށް ވަންނާނެ ފަދަ ތަހުޒީބަކާއި ތަމައްދުނެއް ހުރި އަސާސްތަކެއްގެ މަތީގައި ދިވެހިންގެ ދިވެހި ރާއްޖެ ބިނާވެގެންދާނެ ގޮތެއް ވެގެންދިއުމެވެ. އެކަން މިންވަރުކުރައްވައި ދަރުމަކުރައްވާށި އެވެ! އާމީން.
