ބޭރަށް ހިންގުމާއި ހޮޑުލުން މިދުވަސްވަރު އިތުރުވަމުންދާތީ އެކަމަށް ސަމާލުވާން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފި އެވެ.
މިއަދު ސޯޝަލް މީޑިއާގައި ކުރި ޕޯސްޓެއްގައި އެޗްޕީއޭއިން ވަނީ ބޭރަށް ހިންގައި ހޮޑުލެވޭ ނަމަ ކުރެވިދާނެ ބައެއް ކަންކަން ހިއްސާކޮށްފަ އެވެ.
އެޗްޕީއޭއިން ވަނީ، ބޭރަށް ހިންގުމާއި ހޮޑުލުމުގެ އެއްވެސް އަލާމާތެއް ފެންނަ ނަމަ ގިނަގިނައިން ލޮނު ޕެކެޓް، ސޫޕް ފަދަ ދިޔާ ތަކެތި ބޭނުން ކުރުމާއި ފާހާނާ ކުރުމަށްފަހު ކާބޯތަކެތީގައި އަތްލުމުގެ ކުރިން އަތް ދޮވުމާއި ފާހާނާ ބޭނުން ކުރުމަށްފަހު ސެނިޓައިޒް ކުރުމާއި ފަސޭހަވުމަށްފަހު އެއް ދުވަހު ގޭގައި މަޑު ކުރަން އިލްތިމާސްކޮށްފަ އެވެ.
އޭގެ އިތުރުން، ބޭރަށް ހިންގުމާއެކު ހޮޑުލެވޭ ނަމަ، ވަރުދެރަވެ ދިޔާތަކެތި ބޭނުން ނުކުރެވޭ ނަމަ، ބޮލަށް އެނބުރުން އަރާ ނަމަ، އާދަޔާ ހިލާފަށް ކަރު ހިއްކާ ނަމަ، އާދަޔާ ހިލާފަށް ބަނޑުގައި ރިއްސާ ނަމަ، ކުޑަކަމުދެވޭ މިންވަރު މަދުވެއްޖެ ނަމަ އަދި ހޮޑުގައި ނުވަތަ ބޮޑުކަމުދާތަކެތީގައި ލޭގެ އަސަރު ހުރެއްޖެ ނަމަ ޑޮކްޓަރަށް ދައްކަން ވެސް އެޗްޕީއޭއިން އެދެ އެވެ.
މީގެ ކުރިން ރާއްޖެއިން ނައްތާލާފައިވާ ހިމަބިހި ވެސް ރާއްޖޭގައި ދަނީ ފެތުރެމުންނެވެ. އެޗްޕީއޭއިން ބުނެފައި ވަނީ މިއަހަރުގެ މިހާތަނަށް 240 އަށް ވުރެ ގިނަ މީހުންނަށް ހިމަބިހި ޖެހިފައިވާ ކަމަށެވެ. ހިމަބިހިން ރައްކާތެރިވާން ޖަހާ ވެކްސިން ދިނުމުގެ ޕްރޮގްރާމެއް މިހާރު ދަނީ ހިންގަމުންނެވެ.
