އެސްޖޭ ކޮންސްޓްރަކްޝަން އިން ހއ. ދިއްދޫގައި ތަރައްގީކުރި 75 ރޯހައުސްގެ މަސައްކަތް ނިންމާލައިފި އެވެ.
އެސްޖޭ ކޮންސްޓްރަކްޝަން އިން ބުނީ ރޯހައުސްގެ މަސައްކަތް ނިންމައި މިހާރު ކުރިއަށްދަނީ ހައުސިން މިނިސްޓްރީއާ އެތަންތަން ހަވާލުކުރުމުގެ މަސައްކަތް ކަމަށެވެ. އެގޮތުން ބައެއް ރޯހައުސްތައް މިހާރު ހަވާލުކޮށްފައިވާ ކަމަށް ވެސް އެ ކުންފުނިން ބުންޏެވެ.
ނިމިދިޔަ އެމްޑީޕީގެ ސަރުކާރުގައި ތަރައްގީކުރަން ފެށި 75 ރޯހައުސްގެ ތެރެއިން ކޮންމެ ރޯހައުސްއެއް ހަދާފައިވަނީ ޖާގަ ތަނަވަސްކޮށް ދެ ފަންގިފިލާއަށެވެ.
މި ރޯހައުސްތަކުގައި ތިން ކޮޓަރި އާއި ތިން ފާހާނާ އާއި ސިޓީން ރޫމާއި ބަދިގޭގެ އިތުރުން ކާގެއާއި ލޯންޑްރީ އަދި ސްޓޯ ރޫމް ހިމެނެ އެވެ.
ރޯހައުސްތައް ތަރައްގީކުރި ސަރަހައްދުގައި ކުޑަ ޕާކެއްވެސް ވަނީ ތަރައްގީކޮށްފަ އެވެ.
ރޯހައުސް އެޅުމުގެ މަޝްރޫއު އެސްޖޭއިން ފެށީ 2022 ވަނަ އަހަރުގެ ތެރޭގަ އެވެ. މި މަޝްރޫއު އެ ކުންފުންޏާ ހަވާލުކުރީ 120 މިލިއަން ރުފިޔާއަށެވެ.
5،000 އަށްވުރެ ގިނަ މީހުން ދިރިއުޅެމުން އަންނަ ދިއްދޫގައި އިމާރާތްކުރި ރޯހައުސްތަކަށް ކުރިމަތިލުމުގެ ފުރުސަތު 2023 ވަނަ އަހަރު މިނިސްޓްރީން ހުޅުވާލި އެވެ. ރޯހައުސްތަކަށް ކުރިމަތިލުމުގެ މުއްދަތު ހަމަވި ފަހުން ރޯހައުސްތައް ލިބޭ ރައްޔިތުން މިނިސްޓްރީން މިހާތަނަށް ކަނޑައަޅާފައި ނުވެ އެވެ.
