ވިޔަފާރިވެރިޔާ މުހައްމަދު އަލީ ޖަނާހުގެ މޯލްޑިވްސް ޕްރިމިއާ ބޭންކުގެ ފުރަތަމަ ބްރާންޗު މިއަދު ހުޅުވައިފި، އެ ބޭންކު ރަސްމީކޮށް މިއަދު އިފުތިތާހުކޮށްފި އެވެ.
ހ. ސަންލީތު، ބޮޑުތަކުރުފާނު މަގުގައި މިއަދު އެ ބޭންކު ހުޅުވައިދެއްވީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު، އަހުމަދު މުނައްވަރު އެވެ.
އެ ބޭންކުގެ ޗެއާޕާސަންއަކީ ޖަނާހުގެ ދަރިކަނބަލުން އައިޝާ ނޫރައިން ޖަނާހު އެވެ. އޭނާއަކީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޗެއާމަންވެސްމެ އެވެ.
ޕްރިމިއާ ބޭންކަކީ ރާއްޖޭގައި އޮޕަރޭޓުކުރަން ފެށި ނުވަވަނަ ކޮމާޝަލް ބޭންކެވެ. އެ ބޭންކަށް ދޫކޮށްފައި ވަނީ ޓިއާ 1 ގެ ބޭންކެއްގެ ގޮތުގައި އޮޕަރޭޓު ކުރުމުގެ ހުއްދަ އެވެ.
ޕްރިމިއާ ބޭންކުގެ ހިއްސާދާރެއްގެ ގޮތުގައި ބިޒްނަސް ރެޖިސްޓްރީން ދައްކަނީ ހަމައެކަނި ޖަނާހު އެވެ. އެ ބޭންކުގެ ބޯޑުގައި ނޫރައިންގެ އިތުރުން ތިއްބަވަނީ އިސްމާއިލް އަލީ މަނިކު، ރަހީމާ ސަލީމް، މަރިޔަމް ޝާހިދާ މުހައްމަދު، މުހައްމަދު ހުސައިން މަނިކު އަދި ޕެންޝަން އޮފީހުގެ ސީއީއޯކަމުން މިދިޔަ ފެބްއަރުަރީގައި އިސްތިއުފާދެއްވި ސުޖާތާ ހަލީމް އެވެ.
މިނިސްޓަރެއްގެ ފެންވަރުގައި މުއިއްޒުގެ ޓްރޭޭޑް އެޑްވައިޒަރަކަށް ހަމަޖައްސާފައިވާ ޖަނާހު ވިޔަފާރި ފެށްޓެވީ އެލިސެން ސާވިސަސް ޕްރައިވެޓު ލިމިޓެޑާ އެކު 1987 ގަ އެވެ. ކުދިކުދި މަސައްކަތްތަކުން ފެށި ކެރިއަރުގައި މިއަދު މުހައްމަދު އަލީ ޖަނާހު (ޖަނާ) އަކީ 52 ރިސޯޓު ޕްރޮޖެކްޓެއްގައި މަސައްކަތް ކޮށްފައިވާ ރާއްޖޭގެ ކޮންސްޓްރަކްޝަނާއި ފަތުރުވެރިކަމުގެ ސިނާއަތުގައި ވަރުގަދަ ނަމެކެވެ.
ދުނިޔޭގެ އެންމެ ބޮޑެތި ބްރޭންޑުތައް ކަމަށްވާ ސޮނެވާ, ފޯ ސީޒަންސް އަދި ޝަންގްރިއްލާ ފަދަ ބްރޭންޑުތަކުގެ މިލިއަން ޑޮލަރުގެ އިންވެސްޓުމަންޓުތައް ހަގީގަތަކަށް ހެދުމުގައި އޭނާ ވަނީ އިސް ދައުރެއް އަދާކުރައްވާފަ އެވެ.
ކޮންސްޓްރަކްޝަން އިންޑަސްޓްރީގައި 30 އަށްވުރެ ގިނަ އަހަރު ދުވަހުގެ ތަޖުރިބާއާ އެކު އޭނާ ވަނީ ކޮންސްޓްރަކްޝަން ވިޔަފާރިވެރިންގެ ޖަމިއްޔާގެ ރައީސްކަން ހަ ދައުރެއްގައި ކުރައްވާފަ އެވެ. އެ މަގާމުގައި މިއަދު ވެސް ހުންނެވީ ޖަނާހު އެވެ. މުއިއްޒުގެ އެޑްވައިޒަރެއްގެ ގޮތުގައި ޖަނާހު ހަމަޖެއްސީ ނޮވެމްބަރު 17، 2023 ގަ އެވެ.
