ދުނިޔޭގެ އެންމެ މަގުބޫލު ފަތުރުވެރިކަމުގެ މަންޒިލުގެ ގޮތުގައި ފާއިތުވި ހަ އަހަރު ދުވަހު ވެސް ހޮވުނު ދިވެހިރާއްޖޭގެ ފަތުރުވެރިކަން އިޝްތިހާރު ކުރުމަށް އަންނަ އަހަރު ބޭނުންކުރަން ނިންމާފައިވާ "އައިލެންޑްސް އާ އަސް" ޝިއާރުގައި އެއްވެއް އަމިއްލަވަންތަކަމެއް، އީޖާދީކަމެއް ނެތުމުން މަލާމާތާއި ފާޑުކިޔުން ވިޒިޓް މޯލްޑިވްސްއަށް އަމާޒުވެއްޖެ އެވެ.
އަންނަ އަހަރަކީ ރާއްޖޭގެ ޓޫރިޒަމަށް 55 އަހަރު ފުރޭ އަހަރު ކަމަށްވާއިރު މި ސަރުކާރުން ވަނީ އަންނަ އަހަރަކީ "ވިޒިޓް މޯލްޑިވްސް އިޔާ 2027" ގެ ގޮތުގައި ކަނޑައަޅާފަ އެވެ. މި ޝިއާރަކީ ރާއްޖޭގެ ފަތުރުވެރިކަން އިޝްތިހާރު ކުރުމުގެ ޒިންމާ މަތިކޮށްފައިވާ ވިޒިޓް މޯލްޑިވްސްގެ ފަރާތުން މި ޝިއާރު ލޯންޗުކުރީ އޮގަސްޓު 13، ގައި ބޭއްވި މޯލްޑިވްސް އިންޓެލިޖެންސް ބްރީފިންގަ އެވެ.
މިހާތަނަށް ލޯންޗުކޮށްފައިވަނީ ހަމައެކަނި ޝިއާރެވެ. މި ޝިއާރުގެ ބްރޭންޑިން ލޯންޗުކުރާނީ އޮކްޓޯބަރު 3، ގަ އެވެ. އެއީ ގައުމީ ފެންވަރުގައި ފާހަގަކުރާ ފަތުރުވެރިކަމުގެ ދުވަހެވެ.
"ރާއްޖެއަކީ ހަމައެކަނި ރަށްތަކެއްގެ މައްޗަށް އެކުލެވިގެންވާ ގައުމެއް ނޫން. ރާއްޖޭގެ އަމިއްލަވަންތަކަން ބައްޓަންވެފައިވަނީވެސް އެ ރަށްތަކުގެ ސަބަބުންން. ރަށްފުށުގެ ދިރިއުޅުން ވަނީ ދިވެހިންގެ އިޖުތިމާއީ ފޭރާމަށާއި، އާދަކާދަތަކަށާއި، އާމްދަނީ ހޯދުމަށް ކުރާ މަސައްކަތްތަކަށާއި، ކަނޑާ އޮތް ގުޅުމުގެ އިތުރުން މެހެމާންދާރީ އަދާކުރުމުގެ ސަގާފަތަށް ބޮޑެތި ނުފޫޒުތަކެއް ފޯރުވާފައި،" އެ ޝިއާރާ ގުޅޭ ގޮތުން ވިޒިޓް މޯލްޑިވްސްގެ ވެބްސައިޓުގައި ބުނެފައިވެ އެވެ.
މި ޝިއާރަށް އެންމެ ބޮޑު ފާޑުކިޔުމެއް އަމާޒުވީ އެމެރިކާގެ ކުންފުންޏެއް ކަމަށްވާ "ޓޮއިސް އާ އަސް" އާ ވަރަށް ބޮޑު އެއްގޮތް ކަމެއް ނަމުގައި ހުރުމުންނެވެ. މިއީ އެ ކުންފުނީގެ ނަމަށް ބަލައިގެން ތައްޔާރުކޮށްފައިވާ ޝިއާރެއް ކަމަށް ބައެއް މީހުން ވަނީ ތުހުމަތުކޮށްފަ އެވެ.
"އެއްވެސް އުފެއްދުންތެރިކަމެއް ނެތް. އެއްވެސް އިހުސާސެއް، ޖާދޫއެއް ނެތް. ދުނިޔޭގެ ސަމާލުކަން ދަމައިގަންނާނެ އެއްވެސް ބާރެއް ނެތް. ރާއްޖެ ފަދަ އެތައް ބިލިއަން ޑޮލަރެއްގެ ފަތުރުވެރިކަމުގެ ބްރޭންޑަކަށް، ސޭލް އަޅާފައިވާ ކައުންޓަރަކުން ފެންނަ ކަހަލަ އާދައިގެ ޝިއާރަކަށް ވުރެ މާ ފުރިހަމަ ޝިއާރެއް ހައްގުވޭ،" އިނާ މޯލްޑިވްސްގެ ސީއީއޯ މުހައްމަދު ފިރާގު އެކްސްގައި ލިޔުނެވެ.
ސޯޝަލް މީޑިއާގައި ހިޔާލު ފާޅުކުރި ބައެއް މީހުން ބުނެފައިވާ ގޮތުގައި މީގެކުރިން ރާއްޖެ އިޝްތިހާރުކުރުމަށް ބޭނުންކޮށްފައިވަނީ ދިވެހި ފަތުރުވެރިކަން ވަރަށް ބޮޑަށް ރަމްޒުކޮށްދޭ ފަދަ އޮރިޖިނަލް ޝިއާރުތަކެކެވެ.
"މިއީ ފަތުރުވެރިކަމުގެ ޝިއާރެއް ނޫން. މިއީ ހުޅުމާލޭގައި ހުޅުވާ ކުޅޭ އެއްޗެހި ވިއްކާ ފިހާރައެއްގެ ނަމާ މާ ބޮޑަށް ވައްތަރު ނަމެއް. ބިލިއަން ޑޮލަރުގެ މި މަންޒިލަށް ހައްގުވަނީ އުފެއްދުންތެރިކަން، ކޮޕީ ޕޭސްޓް ކުރުމެއް ނޫން،" ހިޔާލު ފާޅުކުރި މީހަކު ލިޔެފައިވެ އެވެ.
"ސަނީ ސައިޑް އޮފް ލައިފް" އަދި 2011 ގައި ބޭނުންކުރަން ފެށި "އޯލްވޭސް ނެޗުރަލް" ފަދަ ޝިއާރުތަކަކީ ދިވެހިރާއްޖޭގެ ސިފަތައް ވަރަށް ފުރިހަމައަށް ބަޔާންކޮށްދޭ ޝިއާރުތަކެއް ކަމަށް މީހުން އަންނަނީ ބުނަމުންނެވެ.
"ޓޯއިސް އާ އަސް" ގެ ނަމާ އެއްފަދަ ޝިއާރެއް ރާއްޖެއިން ބޭނުންކުރަން ނިންމާފައިވާއިރު އެ ކުންފުނިން ވަނީ މީގެކުރިން މިފަދަ ނަންތަކާއި ޝިއާރުތައް ބޭނުންކުރި ބައެއް ފަރާތްތަކާ ދެކޮޅަށް ދައުވާވެސް ކޮށްފަ އެވެ.
ދުނިޔޭގެ މަޝްރަހު ގޯސްވެ މީހުން ދަތުރުކުރާ މިންވަރު މަދުވަމުންދާތީ ރާއްޖޭގެ ޓޫރިޒަމަށް ވެސް އަންނަނީ ލޮޅުންތަކެއް އަރަމުންނެވެ. އެ ކަމުން އަރައިގަތުމަށް އެކަށީގެންވާ ވަރަށް ރާއްޖެ އިޝްތިހާރު ނުކުރެވޭކަމުގެ ކަންބޮޑުވުން ފަތުރުވެރިކަމުގައި ހަރަކާތްތެރިވާ ބައެއް މީހުން އަންނަނީ ކުރަމުންނެވެ.
