ހޮންގް ކޮންގުގައި ކުރިއަށްދިޔަ 14 ވަނަ އޭޝިއާގެ ނެޓްބޯޅަ މުބާރާތުގެ ރޭންކިން މެޗުގައި އިންޑިއާ ބަލިކޮށް، ރާއްޖޭން ފަސް ވަނައިގައި އޮވެ، މުބާރާތް ނިންމާލައިފި އެވެ.
ހޮންގް ކޮންގުން އޭޝިއާގެ ނެޓްބޯޅަ މުބާރާތް މި ހޯސްޓްކުރީ 1993 ވަނަ އަހަރުގެ ފަހުން ފުރަތަމަ ފަހަރަށެވެ.
އޭޝިއާގެ ނެޓްބޯޅަ މުބާރާތުގައި މި ފަހަރު ޖުމްލަ 11 ގައުމަކުން ވާދަކުރި އެވެ. އެއީ، ކަޕް ކެޓަގަރީގައި ހަ ޓީމާއި ޕްލޭޓް ކެޓަގަރީގައި ފަސް ޓީމެވެ. ކަޕް ކެޓަގަރީގައި ހިމެނުނީ، ސިންގަޕޫރު، ސްރީ ލަންކާ، މެލޭޝިއާ، ހޮންގް ކޮންގް، ރާއްޖެ އަދި އިންޑިއާ އެވެ. އަދި، ޕްލޭޓް ކެޓަގަރީގައި އޮތީ ޗައިނީސް ޓައިޕޭ، ޖަޕާން، ޕާކިސްތާން، ތައިލެންޑް އަދި ދެކުނު ކޮރެއާ އެވެ.
ރާއްޖޭން މުބާރާތުގެ ކަޕް ކެޓަގަރީގެ ލީގު ބުރުގައި ކުޅުނު މެޗުތަކަށް ބަލާއިރު، ފުރަތަމަ މެޗުން، ސިންގަޕޫރު އަތުން 81-19 އިން ބަލިވީ އެވެ. ދެ ވަނަ މެޗުގައި މެލޭޝިއާއާ ކުޅެގެން، 78-32 އިން ބަލިވިއިރު، ތިން ވަނަ މެޗުން އިންޑިއާ އަތުން 60-41 އިން މޮޅުވި އެވެ. ހަތަރު ވަނަ މެޗުގައި ހޮންގް ކޮންގާ ކުޅެގެން 55-34 އިން ބަލިވިއިރު، ލީގު ބުރުގެ ފަހު މެޗުގައި، ސްރީ ލަންކާ އަތުން ބަލިވީ 78-33 އިންނެވެ.
ލީގު ބުރަށް ފަހު ކުޅުނު ރޭންކިން މެޗުގައި، އިންޑިއާއާ ކުޅެގެން، 53-39 އިން ރާއްޖެ ކުރިހޯދި އެވެ. މުބާރާތުގައި ރާއްޖޭން ކުޅުނު ހަ މެޗުގެ ތެރެއިން މޮޅުވީ އިންޑިއާއާ ކުޅުނު ދެ މެޗުންނެވެ.
އޭޝިއާ ނެޓްބޯޅަ މުބާރާތުގެ ފައިނަލްގެ ޖާގަ ހޯދައި، ނެޓްބޯޅަ ވޯލްޑް ކަޕްގެ ފުރުސަތު ހޯދީ ސިންގަޕޫރާއި ހޮންގް ކޮންގުންނެވެ. ފައިނަލް މެޗުގައި ހޮންގް ކޮންގް 57-33 އިން ބަލިކޮށް، ސިންގަޕޫރުން ވަނީ ޗެމްޕިއަންކަން ހޯދައިފަ އެވެ. މި ޑިވިޝަނުގެ ތިން ވަނަ ހޮވި މެޗުގައި، މެލޭޝިއާ އަތުން ސްރީ ލަންކާ ވަނީ 60-65 އިން މޮޅުވެފަ އެވެ.
ޕްލޭޓް ބައިގެ ޗެމްޕިއަންކަން ހޯދީ، ތައިލެންޑް އަތުން 55-49 އިން މޮޅުވި ޕާކިސްތާން އެވެ. މި ޑިވިޝަންގެ ތިން ވަނަ ހޯދީ ޗައިނީސް ޓައިޕޭ އިންނެވެ. އެއީ، ޖަޕާން އަތުން 57-54 އިންނެވެ.
މި ފަހަރުގެ ކުރިން، އެންމެ ފަހުން، އޭޝިއަން ނެޓްބޯލް ޗެމްޕިއަންޝިޕް ބޭއްވީ 2024 ވަނަ އަހަރު ސިންގަޕޫރުގަ އެވެ. އެ ފަހަރުގެ މުބާާރާތުގައި ޖުމްލަ އެކު 14 ޓީމަކުން ވާދަކުރިއިރު، ރާއްޖެ ނިންމާލީ އަށް ވަނައިގަ އެވެ. މި ފަހަރުގެ އޭޝިއާ މުބާރާތަށް ދިއުމުގެ ކުރިން، ގައުމީ ނެޓްބޯޅަ ޓީމުން ވަނީ ސްރީ ލަންކާގައި ކޭމްޕްކޮށްފަ އެވެ.
