އިންޑިއާގެ ސީނިއާ ނޫސްވެރިއެއްގެ ވޯޓުލުމުގެ ހައްގާއި ޕާސްޕޯޓް އާކުރުމުގެ ހައްގު ހިފަހައްޓާފައިވާ ކަމަށް ބުނެ، އެ ގައުމުގެ ނޫސްވެރިންގެ އެންމެ ބޮޑު ޖަމިއްޔާއިން އެކަން ކުށްވެރިކޮށްފި އެވެ.
"ދަ ޓެލެގްރާފް" ނޫހުގެ ކުރީގެ އެޑިޓަރު އާރް ރާޖަގޯޕާލް ވިދާޅުވި ގޮތުގައި، ހުޅަނގު ބެންގޯލްގެ ވޯޓުލާ މީހުންގެ ލިސްޓަށް ގެނައި އިސްލާހުތަކަކާ ގުޅިގެން އޭނާގެ ނަން ލިސްޓުން އުނިކުރުމުން، ޕާސްޕޯޓް އާކުރުމުގެ މަސައްކަތް ވަނީ ހުއްޓިފަ އެވެ.
"ސްޕެޝަލް އިންޓެންސިވް ރިވިޝަން" (އެސްއައިއާރު) ގެ ނަމުގައި އިންޑިއާގެ އިލެކްޝަން ކޮމިޝަނުން ކުރިއަށްގެންދާ މި ހަރަކާތަކީ ވޯޓުލުމުގެ ޝަރުތު ހަމަނުވާ މީހުން ދެނެގަތުމަށް ހިންގާ މަސައްކަތެކެވެ. ނަމަވެސް، ފާޑުކިޔާ ފަރާތްތަކުން ބުނާ ގޮތުގައި މި މަސައްކަތުގެ ތެރެއިން ޝަރުތު ހަމަވާ އެތައް މިލިއަން މީހުންގެ ނަން ވަނީ ނުބައިކޮށް ލިސްޓުން އުނިކޮށްފަ އެވެ. އެހެން ނަމަވެސް، އިލެކްޝަން ކޮމިޝަނުން މި ތުހުމަތުތައް ދޮގުކުރެ އެވެ.
އެޑިޓާސް ގިލްޑް އޮފް އިންޑިއާއިން އާދިއްތަ ދުވަހު ނެރުނު ބަޔާނެއްގައި ބުނެފައިވަނީ، ރާޖަގޯޕާލްގެ މައްސަލައިން ހާމަވަނީ އެސްއައިއާރުގެ ސަބަބުން އިންޑިއާގެ އެތައް މިލިއަން ރައްޔިތުންނަކަށް ކުރިމަތިވަމުންދާ ތަކުލީފުތައް ކަމަށެވެ.
އެ ޖަމިއްޔާއިން އިތުރަށް ބުނި ގޮތުގައި، ރާޖަގޯޕާލް ފަދަ ނުފޫޒުގަދަ ޝަޚުސިއްޔަތެއްގެ ވޯޓުލުމުގެ ހައްގު ނިގުޅައިގަނެވޭ ނަމަ، އާންމު ރައްޔިތުންގެ ހާލަތު މިއަށްވުރެ މާ ބޮޑަށް ގޯސްވާނެ ކަމަށް ބެލެވެ އެވެ.
ނޮވެމްބަރު 4، 2025 ގައި އިންޑިއާގެ 12 ސްޓޭޓަކާއި މަރުކަޒީ ސަރުކާރުން ބަލަހައްޓާ ސަރަހައްދުތަކުގައި އެސްއައިއާރުގެ މަސައްކަތް ފެށި ފަހުން، ވޯޓުލާ މީހުންގެ ލިސްޓުން މިހާތަނަށް ގާތްގަނޑަކަށް 60 މިލިއަން މީހުންގެ ނަން ވަނީ އުނިކޮށްފަ އެވެ.
