ރައީސް އޮފީހުގައި މުހައްމަދު މުއިއްޒު މިއަދު ބޭއްވެވި ނޫސްވެރިންގެ ބައްދަލުވުމަށްފަހު، އެ އޮފީހުގެ އެމްއެންޑީއެފް ސެކިއުރިޓީން ނޫސްވެރިއެއްގެ ފޯނު ޗެކުކޮށްފި އެވެ.
އަދަދު އަށް އެނގިފައިވާ ގޮތުގައި ރައީސް އޮފީހުގެ ސެކިއުރިޓީން ޗެކުކުރީ ރާއްޖެ ޓީވީގެ ނޫސްވެރިޔާ ޝައިހާން ޒަރީރުގެ ފޯނެވެ. އޭނާގެ ފޯނު އަތުލައި ޗެކުރީ ނޫސްވެރިންގެ ބައްދަލުވުން ކުރިއަށް ދަނިކޮށް ވީޑިއޯކުރި ކަމަށް ތުހުމަތުކޮށެވެ.
ޝައިހާންގެ އިތުރުން ބައެއް އެހެން ނޫސްވެރިންގެ ފޯނު ދެއްކުމަށްވެސް އެމްއެންޑީއެފްގެ ސެކިއުރިޓީން އެދުނެވެ. އެކަމަކު އެ ނޫސްވެރިން ސެކިއުރިޓީންނަށް ފޯނު ދައްކާފައެއް ނުވެ އެވެ.
މިކަމާ ގުޅިގެން ރައީސް އޮފީހުގެ ތަރުޖަމާން މުހައްމަދު ހުސައިން ޝަރީފް (މުންދު) އަދަދު އަށް ވިދާޅުވީ ނޫސްވެރިންގެ ބައްދަލުވުމުގައި ހާއްސަ ގަވާއިދެއް އޮންނަ ކަމަށާއި އެ ގަވާއިދުގައި ކުރެވޭނެ ކަންކަމާއި ނުކުރެވޭނެ ކަންކަން ހުންނާނެ ކަމަށެވެ.
މުންދު ވިދާޅުވީ ރައީސް އޮފީހުގެ ސެކިއުރިޓީ ކަންކަން އެމްއެންޑީއެފްއިން ބަލަމުންދާ ކަމަށެވެ. އެގޮތުން އެކަމާ ގުޅޭގޮތުން އެމްއެންޑީއެފްއާ ސުވާލުކުރަން މުންދު އެދިވަޑައިގެންނެވި އެވެ. އެކަމާ ގުޅޭ އިތުރު ތަފްސީލެއް މުންދު ނުދެއްވަ އެވެ.
ރައީސުލްޖުމްހޫރިއްޔާގެ އޮފީހުން ބާއްވާ ނޫސްވެރިންގެ ބައްދަލުވުންތަކަށް ހާޒިރުވުމާއި، އެ ބައްދަލުވުންތައް ކަވަރުކުރުމުގައި އަމަލުކުރާނެ ގޮތުގެ އުސޫލެއް މިދިޔަ މާޗު 31، ގައި ރައީސް އޮފީހުން ވަނީ ނެރެފަ އެވެ.
އެ އުސޫލުގައި ބުނެފައިވަނީ ނޫސްވެރިންގެ ބައްދަލުވުމުގައި ފޮޓޯ ނެގުމާއި، ވީޑިއޯ ކުރުމާއި، އޯޑިއޯ ރިކޯޑުކުރުމަށް މޯބައިލް ފޯނު ބޭނުން ނުކުރެވޭނެ ކަމަށާއި މޯބައިލް ފޯނު ބެނުންކުރެވޭނީ ހަމައެކަނި ނަން ނޯޓުކުރުމަށް ކަމަށް ވަނީ ބުނެފަ އެވެ.
ރައީސް އޮފީހުގެ ސެކިއުރިޓީން ނޫސްވެރިޔާ ޝައިހާންގެ ފޯނު އަތުލައި ޗެކުކުރި މައްސަލައާ ގުޅިގެން އެމްއެންޑީއެފްގެ ބަހެއް މިހާތަނަށް ލިބިފައެއް ނުވެ އެވެ.
މިއަދުގެ ނޫސްވެރިންގެ ބައްދަލުވުމުގައި މުއިއްޒަށް ޖިންސީ ކުށުގެ ތުހުމަތުތަކެއް އަމާޒުވެފައިވާތީ އެކަމާ ގުޅޭ ގޮތުން ސުވާލު ކުރުމުން އަދަދު ނޫހުގެ ނޫސްވެރިޔާ މުހައްމަދު ޝަހުޒާން ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުން ބޭރުކޮށްލި އެވެ.
ރައީސް އޮފީހުގެ ސެކިއުރިޓީ ބަލަހައްޓާ ސިފައިންގެ އޮފިސަރުން ބޭނުންކޮށްގެން ރައީސް އޮފީހުގެ ޕްރެސް މާލަމުން ޝަހުޒާން ނެރުނު މަންޒަރު ބައެއް ނޫސްވެރިން ވީޑިއޯކުރި އެވެ. އެ މާލަމުން ޝަހުޒާން ބޭރުކޮށްލަން އެންގެވީ ސީދާ މުއިއްޒު އެވެ.
ނޫސްވެރިޔާގެ ސުވާލަށް ޖަވާބު ދިނުމުގެ ބަދަލުގައި މުއިއްޒު ވިދާޅުވީ، އެމަނިކުފާނަށް ތުހުމަތު ކުރާ މީހާގެ ބަސް ހިމަނައިގެން އަދަދު ނޫހުން ގެނެސްދިން ޑޮކިއުމެންޓަރީ އާއި ޑޮކިއުމެންޓަރީގެ ވާހަކަ ދެއްކުން މަނާކޮށް ކްރިމިނަލް ކޯޓުން ނެރެފައިވާ އަމުރާ ޝަހުޒާން ހިލާފުވެފައިވާ ކަމަށެވެ.
ރައީސް އެހެން ވިދާޅުވުމުން ވެސް ޝަހުޒާން ވަނީ އިތުރު ސުވާލުތަކެއްކޮށްފަ އެވެ. އެކަމަކު އެ ސުވާލުތަކަށް ވެސް މުއިއްޒު ޖަވާބެއް ނުދެއްވަ އެވެ.
"އައިޝާ" ޑޮކިއުމެންޓަރީ އާއި އޭގެ ވާހަކަ ދެއްކުން ކްރިމިނަލް ކޯޓުން މަނާ ކުރީ، އެ ޑޮކިއުމެންޓަރީގެ މައްސަލައިގައި އަދަދު ނޫހުގެ ސީއީއޯ ހުސެއިން ފިޔާޒް މޫސާ އާއި އެޑިޓަރު ހަސަން މުހައްމަދުގެ މައްޗަށް ގަޒުފުކުރުމުގެ ދައުވާ ދައުލަތުން އުފުލުމުންނެވެ. އެ މައްސަލައިގެ ޝަރީއަތް ކުރިއަށްގެންދަން ކޯޓުން ނިންމާފައި ވަނީ ސިއްރުކޮށްގެންނެވެ.
އެ މައްސަލައިގައި ކޯޓުން އަމުރު ނެރުނީ އެންމެހާ ރައްޔިތުން އެއަށް އަމަލު ކުރުން ލާޒިމުވާ ގޮތަށެވެ. އަދި އެ އަމުރު ވަނީ ސިޔާސީ ޕާޓީތަކާއި މީޑިއާތަކަށް ވެސް ފޮނުވައިފަ އެވެ.
