ރައީސުލްޖުމްހޫރިއްޔާ މުހައްމަދު މުއިއްޒުގެ ޖިންސީ ޝިކާރައަކަށްވި ކަމަށް ތުހުމަތު ކުރާ ރައީސް އޮފީހުގެ ކުރީގެ މުވައްޒަފެއްގެ ވާހަކަ ގެނެސްދިން "އައިޝާ" ޑޮކިއުމެންޓްރީގެ މައްސަލައިގައި ފުލުހަށް ހާޒިރުކުރި އެ އޮފީހުގެ ކުރީގެ މުވައްޒަފަށް ދިފާއުގެ ވާހަކަދެއްކުމުގެ ފުރުސަތު ނުދީ ފުލުހުން ހުރަސްއަޅައިފި އެވެ.
ފުލުހުން ކުރިއަށް ގެންދާ ތަހުގީގުގެ ބޭނުމަށް ސުވާލުކުރުމަށް މިއަދު ހަވީރު 4:00 ގައި އެ މުވައްޒަފު ފުލުސް އޮފީހަށް ހާޒިރުކުރި އެވެ. ފުލުހުންނަށް ބަޔާން ދިނުމަށްފަހު، ނޫސްވެރިންނަށް މައުލޫމާތު ދެއްވަމުން އެ މުވައްޒަފުގެ ވަކީލު، ހުސެއިން ޝަމީމް ވިދާޅުވީ، އޭނާގެ މުވައްކިލުގެ ދިފާއީ ވާހަކަތައް ދެއްކުމުގެ ފުރުސަތު ފުލުހުން ނުދިން ކަމަށެވެ.
"އަޅުގަނޑުމެން ދިފާއުގައި ވާހަކަދައްކަން ފުރުސަތަކަށް އެދުނީމަކާ ދިފާއުގައި ވާހަކަދައްކާކަށް ފުރުސަތެއް ނުއެއްދެއްވާ، ހަމަ އެއްގޮތަކަށް ވެސް ދިފާއުގައި ވާހަކަދައްކާކަށް ފުރުސަތެއް ނުދެއްވާ، ދެން އަޅުގަނޑުމެން ދެންނެވިން އިޖުރާއީ ގޮތުން ވެސް ތި ގޯސްވާނެނޫންހޭ ޕީޖީ އޮފީހަށް ދިޔައީމާ ވެސް އެ ސުވާލު ކުރާނެޔޭ ޝަރުއީ ކޯޓުން ވެސް އެ ސުވާލު ކުރިމަތި ކުރާނެޔޭ،" ޝަމީމް ވިދާޅުވި އެވެ.
ޝަމީމް ވިދާޅުވީ، އިޖުރާއީ ގޮތުން ދީފާއުގެ ވާހަކަ ދެއްކުމުގެ ފުރުސަތު ދޭންޖެހުނު ނަމަވެސް، އެ ފުރުސަތު ދިނުމުގެ ހުއްދައެއް އެ މައްސަލަ ތަހުގީގު ކުރާ ފުލުހުންނަށް ނެތް ކަމަށެވެ.
"ދެން އެ ބޭފުޅުން ބަޔާނުގައި ލިޔުއްވައިދެއްވި އަނެއްހެން ދިފާއުގައި ވާހަކަ ދައްކަން ފުރުސަތު ނުދޭ ކަމަށް،"ޝަމީމް ވިދާޅުވި އެވެ.
ދިފާއުގައި ފުލުހުންނަށް ކިޔައިދޭން ބޭނުންވީ، ފުލުހުން ސުވާލުކުރާ ރައީސް އޮފީހުގެ މުވައްޒަފު، މީހެއްގެ ޝިކާރައަކަށް ވީގޮތް ކަމަށެވެ.
"އަޅުގަނޑުމެން އިއްޔެ ވާނެ ދަންނަވާފައި އަޅުގަނޑުމެން، އަޅުގަނޑު ގަބޫލުކުރަނީ އަޅުގަނޑުމެންގެ ކްލައިންޓަކީ ވިކްޓިމްއެއް ކަމަށޭ، އެ ވިކްޓިމްއަށް ވާގޮތް އަޅުގަނޑުމެން ކިޔައިދޭންވެގެން، ދެން ތަހުގީގުގައި ވެސް ކިޔައިދޭން މަސައްކަތް ކުރީމަކާ އެ ފުރުސަތެއް ނުއެއްދެއްވި،" ޝަމީމް ވިދާޅުވި އެވެ.
އޭނާ ވިދާޅުވީ މީހެއްގެ ޝިކާރައަކަށް އެހެން މީހަކު ވާގޮތް ވަރަށް ތަފުސީލުކޮށް ދައުލަތުގެ ކަމާބެހޭ އިދާރާތަކުން ނެރުއްވާފައި ހުރި ފޮތްތަކުގައި އާއި މެގެޒިންތަކުގައި ލިޔެފައިވާ ކަމަށެވެ. އެގޮތުން ފެމިލީ ޕްރޮޓެކްޝަން އޭޖެންސީން ނެރެފައިވާ "ރިވެލި" މަޖައްލާގައި މީހެއްގެ ޝިކާރައަކަށް އެހެން މީހަކު ވާގޮތް ބަޔާންކޮށްދީފައި އޮންނަ ކަމަށް ޝަމީމް ވިދާޅުވި އެވެ.
"[އަނިޔާދޭ މީހާ އަނިޔާ ލިބޭ މީހާއަށް ކުރާ މައިގަނޑު ކަންތައްތަކެއް ހުރޭ. ނަފުސާނީ އަނިޔާދިނުން، އެކަހެރިކުރުން، ޑިޕެންޑެންސީއެއް ކްރިއޭޓުކުރުން އަދި ވަޒީފާއެއް ކަމަށްވިޔަސް ފައިސާއެއް ކަމަށްވިޔަސް ޑިޕެންޑެންސީއެއް ކްރިއޭޓުކުރުން، ބިރުދެއްކުން، އިންޒާރުދިނުން،" މީހެއްގެ ޝިކާރައަކަށް އެހެން މީހަކު ހަދާ ގޮތް ރިވެލި މަޖައްލާގައި ބަޔާންކޮށްފައިވާ ގޮތަށް ރިއާޔަތްކޮށް ޝަމީމް ވިދާޅުވި އެވެ.
"އެ މީހާގެ މަގާމުގެ ނުފޫޒު ބޭނުންކޮށްގެން، މަގާމޭ މި ދަންނަވަނީ މުޖުތަމައުގައި ހުންނަ މަގާމު ބޭނުންކޮށްގެން ބައެއްކަހަލަ ކަންތައްތައް ކުރުވުން."
ޝަމީމް ވިދާޅުވީ މީހެއްގެ ޝިކާރައަކަށް އެހެން މީހަކު ހަދާ ހާލަތްތަކުގައި ކުރާ ކަންކަން ކަމަށް، އެ މަޖައްލާގައި ބަޔާންކޮށްފައިވާ ހުރިހާ ކަމެއް ފުލުހުން މިހާރު ތަހުގީގު ކުރަމުންދާ މައްސަލައިގައި ހުރި ކަމަށެވެ. ނަމަވެސް އެ ކަންކަން ބަޔާން ކުރުމުގެ ފުރުސަތު ފުލުހުން ނުދިން ކަމަށް އޭނާ ވިދާޅުވި އެވެ.
ރައީސް އޮފީހުގެ ކުރީގެ މުވައްޒަފު ފުލުހަށް ހާޒިރުކޮށް މިއަދު ސުވާލުކުރީ، ގަޒުފުކުރުމުގެ ކުށާ ގުޅޭގޮތުން ކަމަށް ޝަމީމް ވިދާޅުވި އެވެ. ނަމަވެސް، އޭނާގެ މުވައްކިލު ގަޒުފުކޮށްފައިނުވާނެ ކަމަށް ބުނެފައިވާނެ ކަމަށް ޝަމީމް ވިދާޅުވި އެވެ.
މިއަދުގެ ބަޔާން ނެގުމާއެކު، މި ތަހުގީގުައި އެ މުވައްޒަފާ ގުޅޭގޮތުން ފުލުހުން ނަގަން ބޭނުންވާ މައުލޫމާތު ނަގައި ނިމިފައިވާކަން މިއަދު ފުލުހުން އެންގި ކަމަށް ވެސް ޝަމީމް ވިދާޅުވި އެވެ.
ފުލުހުން ތަހުގީގު ކުރަމުންދާ މައްސަލައިގައި މިއަދު ފުލުހަށް ހާޒިރުކުރި ރައީސް އޮފީހުގެ ކުރީގެ މުވައްޒަފު ފުރުން ވެސް ފުލުހުން ވަނީ މަނާކޮށްފަ އެވެ. އޭނާ ފުރުން މަނާކުރީ ފުލުހުން ކޯޓަށް ހުށަހެޅި ސިއްރު އިންޓެލިޖެންސް ރިޕޯޓަކަށް ބިނާކޮށެވެ. އޭނާ ފުރުން މަނާ ކުރި ނަމަވެސް ދިރިއުޅެމުންދާ ގެ ބަލައިފާސްކޮށްފައެއް ނުވެ އެވެ.
ޑޮކިއުމެންޓަރީގެ މައްސަލަ ބަލަން އަމުރު ކުރީ ރައީސުލްޖުމްހޫރިއްޔާ މުހައްމަދު މުއިއްޒެވެ. އެމަނިކުފާނު އެގޮތަށް އެންގިތާ މަދު ގަޑިއިރުތަކެއްގެ ތެރޭގައި ފުލުހުން ވަނީ އަދަދު ނޫހުގެ އޮފީހަށް ވަދެ ލެޕްޓޮޕްތަކާއި ހާޑްޑިސްކުތަކެއް ގެންގޮސްފަ އެވެ.
އެ މައްސަލައާ ގުޅިގެން އަދަދު ނޫހަށް ރެއިޑު ކުރުމުގެ އިތުރުން މި ނޫހުގެ ސީއީއޯ ހުސެއިން ފިޔާޒް މޫސާ އަދި މެނޭޖިން އެޑިޓަރު ހަސަން މުހައްމަދުގެ ޕާސްޕޯޓު ހިފަހައްޓަން ފުލުހުން އެދިގެން ކްރިމިނަލް ކޯޓުން ވަނީ އަމުރެއް ނެރެފަ އެވެ. އަދި އެ މައްސަލައިގެ ތަހުގީގަށް ފިޔާޒް އާއި ހަސަން ވަނީ މިދިޔަ ހަފުތާގައި ފުލުސް އޮފީހަށް ވެސް ހާޒިރުކޮށްފަ އެވެ.
