ރައީސް މުހައްމަދު މުއިއްޒުގެ އާއިލީ ވަކީލު އަދި ކުރީގެ ބަންޑާރަނައިބު އާޒިމާ ޝަކޫރު ސުޕްރީމް ކޯޓަށް އިއްޔެ ވަޑައިގެންފި އެވެ.
ސުޕްރީމް ކޯޓުން ނުކުމެވަޑައިގެން އަދަދު އާ ވާހަކަ ދައްކަވަމުން އާޒިމާ ވިދާޅުވީ ކޯޓަށް ވަޑައިގަތީ އޭނާގެ މުވައްކިލެއްގެ މައްސަލައިގައި ކަމަށެވެ. އަދި ކޯޓަށް ވަޑައިގެންނެވީ ކުރިން އެޕޮއިންޓްމަންޓެއް ހައްދަވައިގެން ކަމަށް ވެސް އޭނާ ވިދާޅުވި އެވެ.
"ސުޕްރީމް ކޯޓަށް އަޅުގަނޑު ދިޔައީ އެޕޮއިންޓްމަންޓަކަށް. އެއީ ރަޖިސްޓްރީ ނުހެދިގެން އުޅޭ ކުޑަ ދެ ކުއްޖެއްގެ މައްސަލައިގައި،" އާޒިމާ ވިދާޅުވި އެވެ.
އާޒިމާ ވަނީ ރައީސް މުއިއްޒުގެ އަނބިކަނބަލުން ސާޖިދާ މުހައްމަދުގެ ފަރާތުން ސިޔާސީ އިދިކޮޅު ފަރާތްތަކެއްގެ މައްޗަށް ކުރި އަބުރުގެ ދައުވާގައި ކޯޓަށް ވަޑައިގެންފަ އެވެ. އޭގެ ފަހުން މުލީއާގޭގައި ވެސް އާޒިމާ ގެންދަވަނީ ރައީސްގެ އަނބިކަނބަލުންނާއެކު އެކި ބައްދަލުވުންތައް ބާއްވަވަމުންނެވެ.
ރައީސްގެ އާއިލީ ވަކީލެއްގެ ގޮތުގައި އާޒިމާ ހަރަކާތްތެރިވެވަޑައިގަންނަވަން ފެށި ފަހުން ނޮވެމްބަރު، 2025، ގައި ޕްރޮސެޖިއުޓާ ޖެނެރަލްގެ އޮފީހުން ވަނީ އާޒިމާގެ މައްޗަށް ކޮށްފައި އޮތް ޖިނާއީ ދައުވާތަކެއް އަނބުރާ ގެންގޮސްފަ އެވެ.
އާޒިމާގެ މައްޗަށް އުފުލީ މަނީ ލޯންޑްރިންއަށް މަގުފަހިކޮށްދިނުމާއި ރަސްމީ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާ އެވެ. އެ ދައުވާތައް ކުރަން ކްރިމިނަލް ކޯޓަށް ހުށަހެޅީ ފެބްރުއަރީ 17، 2019، ގަ އެވެ.
ޕީޖީ އޮފީހުން ބުނީ އާޒިމާގެ މައްޗަށް ކޮށްފައިވާ ދައުވާތައް އަނބުރާ ގެންދަން ނިންމީ އެ ދައުވާތައް މުރާޖައާ ކޮށްދިނުމަށް އޭނާގެ ފަރާތުން ހުށަހަޅާފައިވާ ކަންކަމަށް ރިއާޔަތް ކުރުމަށްފަހު ކަމަށެވެ.
"އާއިޝަތު އާޒިމާ ޝަކޫރުގެ މައްޗަށް ކޮށްފައިވާ ދައުވާތައް އިތުރަށް ކުރިއަށްގެންދިއުމުގެ މަސްލަހަތު އޮތްކަމަށް ނުފެންނާތީ މި ދައުވާތައް އިތުރަށް ކުރިއަށް ނުގެންދިއުމަށް މި އޮފީހުން ވަނީ ނިންމާފައި،" ޕީޖީ އޮފީހުން ބުނެފައިވެ އެވެ.
