އޭޕްރިލް 27، ގައި އަދަދު ނޫހުގެ އޮފީހުން ފުލުހުންގެ ބެލުމުގެ ދަށަށް ގެންދިޔަ އެއްވެސް ލެޕްޓޮޕެއްގެ ޕާސްވޯޑު ފުލުހުންނަށް ނުދޭން އެ ނޫހުން ނިންމައިފި އެވެ.
ފުލުހުންގެ ބެލުމުގެ ދަށަށް ގެންގޮސްފައިވާ އިލެކްޓްރޯނިކް ވަސީލަތްތަކުގެ ޕާސްވޯޑުތައް ދިނުމަށް ފުލުހުން އެދުނީ ކޯޓު އަމުރެއްގެ ދަށުންނެވެ. އެ ކޯޓު އަމުރުގެ ދަށުން މިއަދު މެންދުރުފަހު 2:00 ގައި އަދަދު ގެ ސީއީއޯ، ހުސެއިން ފިޔާޒު މޫސާ ފުލުސް އޮފީހަށް ހާޒިރުކުރި އެވެ.
ފުލުހުންނަށް ޖަވާބުދާރީވުމަށްފަހު ނޫސްވެރިންނާ ވާހަކަދައްކަވަމުން، ފިޔާޒުގެ ގާނޫނީ ވަކީލު، އަލީ ހުސެއިން ވިދާޅުވީ އެއްވެސް މީހެއްގެ މައްޗަށް ފިޔާޒު ގަޒުފު ކޮށްފައި ނުވާނެ ކަމަށް ފުލުހުންނަށް ދަންނަވާފައިވާނެ ކަމަށެވެ.
"[އަޅުގަނޑުމެން ވާނީ] މަސްދަރު ހާމަކުރެވެން ނެތް ކަމަށް ބަޔާން ކޮށްފައި، އެއީ ޕާސްވޯޑުތައް ދީފި ކަމަށްވަންޏާމުން މަސްދަތުތައް ހާމަ އެބަވޭ، އެހެންވީމާ މަސްދަރުތައް ހާމަވެދާނެތީ މައުލޫމާތު ދީފައިވާ..، އަދި، މި މައްސަލައާ ގުޅިގެނެއް ނޫން، އެހެން މައްސަލަތަކާ ގުޅިގެން ވެސް މައުލޫމާތު ދީފައި ހުރި ފަރާތްތަކުގެ، އެއީ ކޮންބައެއްކަން އެނގިދާނެތީ ހާމަވެދާނެތީ ހަގީގަތުގައި ޕާސްވޯޑު ދީފައި ނުވަނީ،" އަލީ ހުސެއިން ވިދާޅުވި އެވެ.
އެ ނިންމުން ނިންމީ، އަދަދު ނޫހާ ދެކޮޅަށް ފުލުހުން ތަހުގީގެއް ހިންގަނީ ވަކި ބައެއްގެ ނުފޫޒުން ކަމަށް ފެންނާތީ އާއި މަސްދަރު ހާމަނުކުރަމަކީ ގާނޫނުއަސާސީން ލިބިދޭ ހައްގަކަށް ވާތީ ކަމަށް އަލީ ހުސެއިން ވިދާޅުވި އެވެ.
ގާނޫނުއަސާސީގެ 28 ވަނަ މާއްދާގައި ބަޔާންކޮށްފައި ވަނީ މީހަކު ފަތުރާ ނުވަތަ ޝާއިއުކުރާ ހަބަރާއި މައުލޫމާތާއި އެމީހަކަށް ފެންނަ ގޮތްތަކާއި ހިޔާލުތަކާ ގުޅިގެން އެއްވެސް މީހަކަށް އެ މައުލޫމާތުގެ މަސްދަރު ހާމަކުރަން މަޖުބޫރުކޮށްގެން ނުވާނެ ކަމަށެވެ.
ހެއްކާ ބެހޭ ގާނޫނުގެ 136 ވަނަ މާއްދާގެ (ށ) ގައި ނޫސްވެރިޔާގެ މަސްދަރު ހާމަކުރަން މަޖުބޫރުވާނެ ހާލަތްތައް ބަޔާންކޮށްފައި ވަނީ ވެސް ޓެރަރިޒަމްގެ ކުށްތަކާއި ގައުމީ ސަލާމަތާ ގުޅުންހުރި މައްސަލަތަކުގަ އެވެ.
ފުލުހުން އެދުނުގޮތަށް ޕާސްވޯޑުތައް ނުދީފިނަމަ، ބައެއްކަހަލަ ކަންކަމާ ކުރިމަތިލާން ޖެހިދާނެކަމުގެ އިންޒާރު ފުލުހުން މިއަދު ދިން ކަމަށް ވެސް އަލީ ހުސެއިން ވިދާޅުވި އެވެ.
"ދެން މިކަމާ ގުޅިގެން ފުލުހުން ވިދާޅުވެފައި ވަނީ މީގެ ކޮންސީކުއެންސަސް ހުރެދާނެ ކަމަށް، ދެން އަޅުގަނޑުމެންނަށް ވެސް އެބަ އެނގޭ ގާނޫނީގޮތުން މިގޮތަށް ޕާސްވޯޑުތައް ނުދީފި ކަމަށްވަންޏާ އަޅުގަނޑުމެންނަށް ވެސް އެބަ އެނގޭ ދައުވާ ކުރެވޭނެ ގޮތްތަކާޢި އެ ހުރިހާކަމެއް އެބަހުރިކަން،" އަލީ ހުސެއިން ވިދާޅުވި އެވެ.
"އެހެން ނަމަވެސް، ދައުވާ ކުރިޔަސް، ޖަލަށްލިޔަސް އަޅުގަނޑުގެ ކްލައިންޓު ފިޔާޒު އެ ބުނަނީ އަޅުގަނޑުމެން މި ދަންނަވަނީ އަޅުގަނޑުމެން މިތިބީ މަސްދަރު ކާމަކުރާ ގޮތަކަށް ނޫނޭ."
ފުލުހުން މި ނޫހުގެ އޮފީހަށް ވަދެ ކުރިއަށްގެންދިޔަ ހަތަރު ގަޑިއިރުގެ ސާޗް އޮޕަރޭޝަނަކަށް ފަހު ލެޕްޓޮޕްތަކާއި ހާޑް ޑިސްކުތަކާއި ބައެއް މެމޮރީ ކާޑު ހިމެނޭ ގޮތަށް 20 ޑިވައިސްއެއް ގެންދިޔަ އެވެ.
ނަމަވެސް، އަދަދު ނޫސް ބަލައިފާސްކުރުމަށް ފުލުހުން ދެއްކި ކޯޓު އަމުރުގައި، އެއްވެސް އެއްޗެއް ހިފެހެއްޓުމުގެ އަމުރެއް ނެތެވެ. އެ ކޯޓު އަމުރުގައި އޮތީ ހަމައެކަނި ބަލައިފާސްކުރުމުގެ އަމުރެކެވެ.
މި އޮފީހަށް ފުލުހުން ވަނީ ރައީސް މުހައްމަދު މުއިއްޒުއާ ކައިވެނިން ބޭރުން ގުޅުމެއް ހިންގި ކަމަށް ތުހުމަތު ކުރި އެ ރައީސް އޮފީހުގެ ކުރީގެ މުވައްޒަފެއްގެ ބަސް ގެނެސްދީ މި ނޫހުން ޝާއިއު ކުރި "އައިޝާ" ޑޮކިއުމެންޓަރީގެ ސަބަބުންނެވެ.
