ރާއްޖޭގައި ފަހަކަށް އައިސް ބުލީގެ މައްސަލަތައް ފެންމަތިވަމުންދާ ދަނޑިވަޅެއްގައި ބުލީ ކުރުމަކީ ގާނޫނީ ކުށެއް ކަމަށް ކަނޑައެޅުމަށް "އެންޓި ބުލީ ގާނޫނު" ނަމުގައި ގާނޫނެއް ތައާރަފްކުރަން ސަރުކާރުން މަސައްކަތް ފަށާފައިވާ ކަމަށް މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މުއިއްޒު ވިދާޅުވީ އެންޓި ބުލީގެ ގާނޫނު އެކުލަވާލުމުގެ މަސައްކަތް އެޓާނީ ޖެނެރަލް އޮފީހުން ކުރަމުންދަނީ ކަމާގުޅުންހުރި ފަންނީ ބޭފުޅުންނާއެކުގައި ކަމަށާއި އެ ހުރިހާ މަސައްކަތަށްފަހު ވީހާވެސް އަވަހަށް މަޖިލީހަށް އެ ބިލު ސަރުކާރުގެ ފަރާތުން ހުށަހަޅާނެ ކަމަށެވެ.
"ބުލީކުރުން އެއީ ގާނޫނީ ކުށެއް ކަމަށް ކަނޑައެޅުމަށް އެކަމާ ގުޅޭ ހާއްސަ އެންޓި ބުލީ ގާނޫނެއް ތައާރަފުކުރަން ސަރުކާރުން މަސައްކަތް ފަށައިފިން. އެހެންވީމަ އެ މަސައްކަތް މިހާރު އޭޖީ އޮފީހުން އެބަ ކުރިއަށް ގެންދަވާ ކަމާ ގުޅޭ ފަންނީ ބޭފުޅުންނާވެސް އެކީގައި. އިރާދަކުރެއްވިއްޔާ މި ބިލު އަޅުގަނޑުމެން ފަރުމާކޮށްފައި މަޝްވަރާގެ ހުރިހާ ޕްރޮސެސްއަކާ އެކީގައި ނިންމާފައި އިރާދަކުރެއްވިއްޔާ މަޖިލީހަށް ފޮނުވާނަން އެންޓި ބުލީ ގާނޫނެއް،" މުއިއްޒު ވިދާޅުވި އެވެ.
މުއިއްޒު ވިދާޅުވީ ގާނޫނު ވުޖޫދުވުމުން ބުލީގެ މައްސަލައަށް ވަރަށް ބޮޑު ހައްލެއް ލިބިގެންދާނެ ކަމަށެވެ. އެ ގާނޫނުގައި ބުލީއާ ގުޅޭގޮތުން ވަރަށް ތަފްސީލުކޮށް ހުރިހާ ކަމެއް ބަޔާންކޮށްފައިވާ ކަމަށް އެމަނިކުފާނު ވިދާޅުވި އެވެ.
"އިރާދަކުރެއްވިއްޔާ މި ގާނޫނު އައުން ވެގެންދާނެ ވަރަށް ބޮޑު ލުޔެއް މި މައްސަލަ ހައްލުކުރުމަށް އަޅުގަނޑުމެން ލިބިގެންދާނެ ކަމަށް. އެންޓި ބުލީ ގާނޫނުގައި އިރާދަކުރެއްވިއްޔާ އަޅުގަނޑުމެން ބަޔާންކުރަން ވަރަށް ސާފުކޮށް ބުލީ ކުރުމުގެ އަމަލުތައް ކޮން ގޮތަކަށް ކުށަކަށްވާ ކަމެއްކަން. ގާނޫނު ހިނގާ ދާއިރާތައްވެސް ވަރަށް ސާފުކޮށް ކަނޑައެޅިގެންދާނެ،" މުއިއްޒު ވިދާޅުވި އެވެ.
ސްކޫލްތަކާއި ތައުލީމީ މަރުކަޒުތަކާއި އެތަންތަނުގައި ކިޔަވާ ކުދިންނާއި މަސައްކަތްކުރާ ހުރިހާ ފަރާތްތައް އަދި ވަޒީފާގެ މާހައުލުގައި އާއި ސިއްހީ ހިދުމަތް ދޭ ތަންތަނުގައި މަސައްކަތްކުރާ މުވައްޒަފުންނާއި ހިދުމަތް ލިބިގަންނަ މީހުންގެ ހައްގުތަކާއި ޒިންމާތައް ތަފްސީލްކޮށް ގާނޫނުގައި ބަޔާންކުރާނެ ކަމަށް ވެސް މުއިއްޒު ވިދާޅުވި އެވެ.
މީގެއިތުރުން އޮންލައިން ބުލީ ކުރުން ހުއްޓުވުމަށް އެކަމަށް ހާއްސަ ބައިތަކެއްވެސް އެންޓި ބުލީ ގާނޫނުގައި ހިމަނާނެ ކަމަށް މުއިއްޒު ވިދާޅުވި އެވެ. އެމަނިކުފާނު ވިދާޅުވީ ސްކޫލްތަކާއި ތައުލީމީ މަރުކަޒުތަކުގައި ބުލީ ކުރުން ހުއްޓުވުމާ ގުޅޭ ހާއްސަ ސިޔާސަތުތައް އެކުލަވާލަައި ބުލީ ކުރާ ކުދިންނަށް ފިޔަވަޅު އެޅޭނެ ނިޒާމެއްވެސް އެކުލަވާލާނެ ކަމަށެވެ.
މުއިއްޒު ވިދާޅުވީ ބުލީ ކުރުމާ ގުޅޭ މައުލޫމާތުތައް ހާއްސަ ނިޒާމެއްގެ ދަށުން ގަވާއިދުން ސެންޓްރަލް އެޖެންސީއަކަށް ރިޕޯޓުކުރެވޭނެ ގޮތާއި ސްކޫލްތަކުގެ ރަސްމީ މަންހަޖުގެ ތެރޭގައި މިކަމާ ގުޅިގެން ތަފްސީލުކޮށް މައުލޫމާތުތައް ކިޔައިދިނުންވެސް ހިމަނާނެ ކަމަށެވެ.
