ކެބިނެޓުން އިސްތިއުފާދެއްވި 10 މިނިސްޓަރުން ސަރުކާރުން ފެނިދާނެކަމުގެ އިޝާރާތެއް ސަރުކާރުގެ ތަރުޖަމާނު މުހައްމަދު ހުސެއިން ޝަރީފް (މުންދު) ރޭ ދެއްވައިފި އެވެ.
ޕީއެސްއެމްގެ ރާއްޖެމިއަދު ޕްރޮގްރާމުގައި މުންދު ވިދާޅުވީ މިނިސްޓަރުކަމުން އިސްތިއުފާ ދެއްވި ބޭފުޅުންނަކީ އަދިވެސް ސަރުކާރުގެ ބޭފުޅުން ކަމަށާއި އެކަން ކުރިއަށް އޮތް ދުވަސްތަކުގައި ސާފުވެގެންވެސް ދާނެ ކަމަށެވެ.
"ދޭދޭ ފަރާތުގެ އޮތް އިތުބާރުގެ ދެމެދުގައި ކަމެއް ނޫން މިއީކީ. އެބޭފުޅުންނަކީ، މިސާލަކަށް އަޅުގަނޑު ޕާސަނަލީ އެބޭފުޅުން އަޅުގަނޑާ ރަހުމަތްތެރިން އަދިވެސް. އަދި އެބޭފުޅުންނަކީ އަޅުގަނޑުމެންގެ ވެސް ބޭފުޅުން އެނގޭތޯ. އެކަން ދެން ސާފުވެގެން ވެސް ދާނެ ކަންނޭނގޭ ވަރަށް އަވަހަށް. މިއީ ދެން ވަރަށް ބޮޑު އެއްޗެއް ކަންނޭނގޭ މިބުނީ އެނގޭތޯ،" މުންދު ވިދާޅުވި އެވެ.
މުންދު ވިދާޅުވީ މުއިއްޒު އަންގަވައިގެން މިނިސްޓަރުން އިސްތިއުފާ ދެއްވީ ހެޔޮނިޔަތެއްގައި މިހާރު ގެންނަމުންދާ އިސްލާހުތަކަށް މަގުފަހިކޮށްދިނުމަށް ކަމަށެވެ.
"ވަޒީރުންގެ މަޖިލީހުން އިސްތިއުފާ ދެއްވި ބޭފުޅުން އިސްތިއުފާ ދެއްވީ ހެޔޮ ނިޔަތެއްގައޭ. އެބޭފުޅުން އަރިހުން އިސްތިއުފާ ދެއްވަން އެދިވަޑައިގަތީމަ އެބޭފުޅުން އިސްތިއުފާ ދެއްވަނީ ކީއްވެ. އެބޭފުޅުން އިސްތިއުފާ ދެއްވީ މިދެންނެވި މިދަމުންދާ އިސްލާހުތަކަށް މަގުފަހިކޮށްދޭން. އެނގިވަޑައިގަންނަވާނެ އެގޮތަށް ހަމަ ވަރަށް ސާފުކޮށް އަޅުގަނޑުމެން އޮންނާނެ ބަޔާންވެސް ކޮށްފައި،" އޭނާ ވިދާޅުވި އެވެ.
މުންދު ވިދާޅުވީ މިނިސްޓަރުން މަގާމުން އިސްތިއުފާ ދެއްވުމަކީ އިތުބާރާ ގުޅޭ ކަމެއް ނޫން ކަމަށާއި އެއީ ނިމިދިޔަ ލޯކަލް ކައުންސިލް އިންތިހާބުގައި ރައްޔިތުން ސަރުކާރަށް ދިން މެސެޖަކަށް އިޖާބަ ދިނުމުގެ ގޮތުން ކަންކަން އިސްލާހުކުރުމަށް ގެނައި ބަދަލުތަކެއް ކަމަށެވެ.
"އެބޭބޭފުޅުންގެ ހިދުމަތް ހަމަ ވަރަށް ޝުކުރުވެރިކަމާ އެއްކޮށް އަޅުގަނޑުމެން ބަލައިގަންނަމޭ. އެހެންވީމަ ކޮންމެ ބޭފުޅަކު ވެސް އެއީ އިތުބާރާ ގުޅޭ ކަމެއް ނޫނޭ. ރައްޔިތުން ބުނި އެއްޗަކަށް، ރައްޔިތުން ދިން މެސެޖަކަށް އިޖާބަދެއްވާ ސަރުކާރެއް ހިންގަންޖެހޭނީ ސީދާ ރައްޔިތުން އެދިވަޑައިގަންނަވާ ގޮތަށްކަން ގަބޫލުފުޅުކުރައްވާތީ އެ އިސްލާހު ގެނައުމުގެ މަސައްކަތުގެ ތެރެއިން އައި ބަދަލެއް މިއީ،" އޭނާ ވިދާޅުވި އެވެ.
ކެބިނެޓުން އިސްތިއުފާދެއްވި މިނިސްޓަރުން
- ޑިފެންސް މިނިސްޓަރު، މުހައްމަދު ޣައްސާން މައުމޫން
- ފޮރިން މިނިސްޓަރު، އެފެއާޒް އަބްދުﷲ ހަލީލް
- ހެލްތު މިނިސްޓަރު، އަބްދުﷲ ނާޒިމް
- ޓޫރިޒަމް އެންޑް އެންވަޔަރަމަންޓު މިނިސްޓަރު، ޠާރިޤު އިބްރާހީމް
- ސޯޝަލް އެންޑް ފެމިލީ ޑިވެލޮޕްމަންޓް މިނިސްޓަރު، އައިޝަތު ޝިހާމް
- ދިވެހި ލެންގުއޭޖް މިނިސްޓަރު، އާދަމް ނަސީރު އިބްރާހީމް
- އެގްރިކަލްޗާ އެންޑް އެނިމަލް ވެލްފެއާ މިނިސްޓަރު، މަރްޔަމް މާރިޔާ
- ޔޫތު، އިންފޮމޭޝަން އެންޑް އާޓްސް މިނިސްޓަރު، އިބްރާހީމް ވަހީދު
- ސިޓީސް މިނިސްޓަރު، އާދަމް ޝަރީފު އުމަރު
- ހަޔާ އެޑިޔުކޭޝަން އެންޑް ލޭބާ މިނިސްޓަރު، އަލީ ހައިދަރު
ކައުންސިލް އިންތިހާބާއި ފެންނަ ނުފެންނަ ވޯޓުން ސަރުކާރަށް ބޮޑުތަނުން ރައްޔިތުން ނޫނެކޭ ބުނުމާ ގުޅިގެން ކަންކަން އިސްލާހުކުރުމަށް މުއިއްޒު މަސައްކަތް ކުރައްވަމުންދާ ކަމަށް ސަރުކާރުން ބުނި ނަމަވެސް، އިސްލާހުކުރަން އުޅެނީ ކޮންކޮން ކަމެއްކަން ހާމައެއް ނުކުރެ އެވެ.
