ރައީސް މުހައްމަދު މުއިއްޒުގެ ރިޔާސީ ދައުރު ކުރިއަށް އޮތް ދެ އަހަރާއި ބައިގެ ތެރޭގައި ނިމުމުގެ ކުރިން ރައްޔިތުންގެ އާންމު ހާލަތު ރަނގަޅު ކުރެވޭނެ ކަމަށް ސަރުކާރުގެ ތަރުޖަމާނު މުހައްމަދު ހުސެއިން ޝަރީފް (މުންދު) ވިދާޅުވެއްޖެ އެވެ.
ޕީއެސްއެމްގެ ޕްރޮގްރާމެއްގައި ވާހަކަ ދައްކަވަމުން މުންދު ރޭ ވިދާޅުވީ ރައްޔިތުންގެ ހިތްހަމަޖެހޭ ފަދަ ބަދަލުތަކެއް ކުރިއަށް އޮތް ދެ އަހަރާއި ބައިގެ ތެރޭގައި ފެންނާނެ ކަމަށެވެ.
"އިރާދަކުރެއްވިއްޔާ ކުރިއަށް އޮތް ދެ އަހަރާއި ބައިގައި ރައްޔިތުން ހަމަ ހިތްޕުޅުހަމަޖެހިވަޑައިގަންނަވާ ވަރުގެ ނަތީޖާތަކެއް، ތިބޭފުޅުންގެ އަމިއްލަ ދިރިއުޅުމާ ގުޅޭ ގޮތުން ފެނިވަޑައިގަންނަވާނެ،" ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަ ދައްކަވަމުން މުންދު ވިދާޅުވި އެވެ.
މުއިއްޒުގެ ރިޔާސީ ދައުރު ނިމުމުގެ ކުރިން ބަދަލުތަކެއް ފެންނާނެ ކަމަށް މުންދު މި ވިދާޅުވި ނިމިދިޔަ ލޯކަލް ކައުންސިލްތަކުގެ އިންތިހާބާއި ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލަން ފެނޭތޯ ބަލަން ނެގި ވޯޓުން ސަރުކާރު ބޮޑުތަނުން ބަލިވެފައި ވަނިކޮށެވެ.
ތަރުޖަމާނު ވިދާޅުވީ ތަރައްގީގެ މަސައްކަތްތައް ނިމެމުންދާ މަންޒަރު ކޮންމެ މީހަކަށް ވެސް ކުރިއަށް އޮތް ތަނުގައި ފެންނާނެ ކަމަށެވެ.
"އަޅުގަނޑުމެންގެ މަސައްކަތް އިރާދަކުރެއްވިއްޔާ ހަލުވި ވެސް ވާނެ. ތިބޭފުޅުންގެ ލޮލުން ފެންނަ ތާނގައި އިރާދަކުރެއްވިއްޔާ ތަރައްގީގެ މަސައްކަތްތައް އިތުރަށް ކާމިޔާބުކަމާއެކު ނިމެމުން ވެސް ދާނެ،" އޭނާ ވިދާޅުވި އެވެ.
ކުރިއަށް އޮތް ދެ އަހަރާއި ބައިގެ ތެރޭގައި، ރައްޔިތުން ދައްކަންޖެހޭ ބިލުތަކަށް ވެސް ލުއިތަކެއް އަންނާނެ ކަމަށް މުންދު ވިދާޅުވި އެވެ.
"ޖުމްލަ ގޮތެއްގައި އާންމު ހާލަތު، ކިޔަމާ، އެއީ އަޅުގަނޑުމެންގެ ތަނަވަސްކަން ވިޔަސް ނުވަތަ ތަކެތީގެ ހަރަދު ކަމަށް ވިޔަސް ނުވަތަ ކޮންމެ ދިވެއްސަކު ދައްކަންޖެހޭ ބިލުތައް ވިޔަސް މިހުރި ކަންތައްތަކުގައި ހަމަ ލުއިތަކެއް އަންނާނެ،" މުންދު ވިދާޅުވި އެވެ.
ނިމިދިޔަ ލޯކަލް ކައުންސިލްތަކުގެ އިންތިހާބުގައި ރާއްޖޭގެ ފަސް ސިޓީގެ މޭޔަރުގެ މަގާމާއި ސިޓީ ކައުންސިލްތަކުގެ މެޖޯރިޓީ އާއި ގިނަ ރަށު ކައުންސިލްތަކުގެ މެޖޯރިޓީ އަދި ރައީސްކަން ލިބުނީ ވެސް އިދިކޮޅު އެމްޑީޕީއަށެވެ.
އޭގެ އިތުރުން، ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލަން ފެނޭތޯ ނެގި ވޯޓުގައި 68 ޕަސެންޓު ރައްޔިތުން ބުނީ، ސަރުކާރުން ބޭނުންވި ގޮތަށް ދެ އިންތިހާބު އެއްކޮށްލަން ނުފެންނަ ކަމަށެވެ.
