މުހައްމަދު މުއިއްޒު އެކުލަވާލާފައިވާ ކެބިނެޓުން 10 މިނިސްޓަރަކު މިއަދު އިސްތިއުފާ ދެއްވުމާ ގުޅިގެން، އެ މަގާމުތަކަށް މިރޭ އައު މިނިސްޓަރުން އައްޔަންކުރަން ރަސްމިއްޔާތެއް ބޭއްވުމަށް ހަމަޖެހިފައިވާ ކަމަށް މައުލޫމާތު ލިބިއްޖެ އެވެ.
އަދަދު އަށް އެނގިފައިވާ ގޮތުގައި ކެބިނެޓަށް އައު މިނިސްޓަރުން އައްޔަން ކުރަން ހަމަޖެހިފައިވަނީ މިރޭ 19:00 ގެ ފަހުންނެވެ. އެގޮތުން މުއިއްޒު އެ ގަޑިއަށް ރައީސް އޮފީހަށް ވަޑައިގަތުމަށް ވެސް ހަމަޖެހިފައިވާ ކަމަށް މައުލޫމާތު ލިބެ އެވެ.
ކެބިނެޓަށް އައްޔަންކުރާ އައު މިނިސްޓަރުންގެ ތަފްސީލެއް މިހާތަނަށް މި ނޫހަށް ލިބިފައެއް ނުވެ އެވެ.
މިއަދު ކެބިނެޓުން ވަކިވި މިނިސްޓަރުން
1- ޑިފެންސް މިނިސްޓަރު، މުހައްމަދު ޣައްސާން މައުމޫން
2- ފޮރިން މިނިސްޓަރު، އަބްދުﷲ ހަލީލް
3- ހެލްތު މިނިސްޓަރު، އަބްދުﷲ ނާޒިމް
4- ޓޫރިޒަމް އެންޑް އެންވަޔަރަމެންޓު މިނިސްޓަރު، ޠާރިޤު އިބްރާހީމް
5- ސޯޝަލް އެންޑް ފެމިލީ ޑިވެލޮޕްމަންޓް މިނިސްޓަރު، އައިޝަތު ޝިހާމް
6- ދިވެހި ލެންގުއޭޖް މިނިސްޓަރު، އާދަމް ނަސީރު އިބްރާހީމް
7- އެގްރިކަލްޗާ އެންޑް އެނިމަލް ވެލްފެއާ މިނިސްޓަރު، މަރްޔަމް މާރިޔާ
8- ޔޫތު މިނިސްޓަރު، އިބްރާހީމް ވަހީދު
9- ސިޓީސް މިނިސްޓަރު، އާދަމް ޝަރީފު އުމަރު
10- މިނިސްޓަރ އޮފް ހަޔާ އެޑިޔުކޭޝަން، ލޭބާ އަލީ ހައިދަރު
އަދަދު އަށް އެނގިފައިވާ ގޮތުގައި މިއަދު ބައެއް މިނިސްޓަރުން އިސްތިއުފާ ދޭން އެންގެވީ ސީދާ މުއިއްޒު އެވެ. އަދި ބައެއް މިނިސްޓަރުންނަށް އިސްތިއުފާ ދެއްވުމުގެ ފުރުސަތު ނުދީ ވަކި ކުރީ އެވެ.
އެކަމާ ގުޅިގެން ރައީސް އޮފީހުން ނެރުނު ބަޔާނެއްގައި ބުނީ ހުރިހާ މިނިސްޓަރުން ވެސް އިސްތިއުފާ ދެއްވީ ކަމަށާއި އިސްތިއުފާ ދެއްވީ މުއިއްޒު ގެންނަން ބޭނުންވެވަޑައިގަންނަވާ އިސްލާހުތަކަސް ފުރުސަތު ދެއްވުމުގެ ގޮތުން ކަމަށެވެ.
ސަރުކާރުގެ މިނިސްޓަރުންތައް މިއަދު ވަކިކޮށްފައި މިވަނީ ނިމިދިޔަ ލޯކަލް ކައުންސިލް އިންތިހާބުގައި ސަރުކާރު ހިންގާ ޕީއެންސީ ބޮޑު ނާކާމިޔާބީއަކާ ކުރިމަތިލާފައި ވަނިކޮށެވެ.
ކައުންސިލް އިންތިހާބާއެކު ނެގި ފެންނަ ނުފެންނަ ވޯޓުން ވެސް ސަރުކާރުން ހުށަހެޅި ދެ އިންތިހާބު އެއްކޮށްލުމާ ގުޅޭ ހުށަހެޅުމަށް ވެސް ބޮޑުތަނުން ރައްޔިތުން ވަނީ ނޫނެކޭ ބުނެފަ އެވެ.
