އަދަދު ނޫހުން މީގެ 17 ދުވަސްކުރިން ގެނެސްދިން އައިޝާ ޑޮކިއުންމެންޓަރީގެ މައްސަލަ މީޑިއާ ކޮންޓްރޯލް ކޮމިޝަނުން މިއަދު ބަލަން ފަށައިފި އެވެ.
އެ ކޮމިޝަނުން އެ މައްސަލަ ބަލަން ފަށާފައިވާކަން، މި ނޫހަށް މިއަދު ވަނީ އަންގައިފަ އެވެ. އައިޝާ ޑޮކިއުމެންޓްރީ މި ނޫހުން ގެނެސްދިނީ މާޗު 28، ގަ އެވެ.
އެ ޑޮކިއުުމެންޓްރީގައި އިންޓަވިއުދިން އަންހެން މީހާ ވަނީ ރައީސުލްޖުމްހޫރިއްޔާ މުހައްމަދު މުއިއްޒުގެ މައްޗަށް ސީރިއަސް ތުހުމަތުތަކެއް ކޮށްފައި އެވެ. އެ ގޮތުން، ކައިވެނިން ބޭރުން މުއިއްޒު ގުޅުމެއް ބޭއްވި ކަމަށާއި އޭނާއަށް މުއިއްޒު ޖިންސީ ފުރައްސާރަ ކުރި ކަމަށް ވެސް އޭނާ ތުހުމަތު ކޮށްފައިވެ އެވެ.
އެ ޑޮކިއުމެންޓްރީ އާންމުކުރުމުގެ ކުރިން ސަރުކާރުގެ ތަރުޖަމާނާ އެ ތުހުމަތުތަކާ ގުޅޭގޮތުން ސުވާލު ކުރުމުން ވަނީ އެ ތުހުމަތުތައް ދޮގުކުރައްވާފަ އެވެ. އެ ޑޮކިއުމެންޓްރީގައި އެ ޖަވާބު ވެސް ހިމަނާފައިވާނެ އެވެ.
އަދަދު ނޫހުގެ ސޯޝަލްމީޑިއާ ޕްލެޓްފޯމްތަކުން ގެނެސްދިން އެ ވީޑިއޯގައި އެ މުވައްޒަފުގެ އަސްލު ނަން ވަނީ ސިއްރުކޮށްފަ އެވެ.
"ރައީސްގެ ކެބިން ތެރޭގަ އިންނާނެ ދެ ސޯފާ. އެލްއެއް ގޮތަށް. ހުންނައިރުގަ މިހެން ދިގުކޮށް ހުންނަ ސޯފާގައި އަޅުގަނޑާ ރައީސްއާ ދެމީހުން އެންމެ ގިނައިން ފިސިކަލްކޮށް [އުޅުނީ]. ދެން ރައީސްގެ މެއިން ޓޭބަލް، ވަށްކޮށް ހުންނަ ޓޭބަލް. ދެން އެ ޓޭބަލް މަތީގައި އަޅުގަނޑު ރައީސްއާއެކު ފިސިކަލްކޮށް އުޅުނީ."
ރައީސް މުއިއްޒު އާއި އޭނާއާ ދެމެދު މެސެޖު ބަދަލުކޮށްފައިވާ ޗެޓު ލޮގާއި ކޯލް ލޮގު މި ނޫހަށް ވަނީ ފެނިފަ އެވެ. އޮފީހުގެ ރަސްމީ ވަގުތުން ބޭރުން ރައީސް އޭނާއަށް މެސެޖު ކުރައްވާފައިވާކަން އޭގެން ހާމަވެ އެވެ. އަދި އޭނާއަށް ރައީސް ފޮނުވާފައި ވަނީ ވަކި ގަޑިއެއްގެ ތެރޭގައި އަމިއްލައަށް ފުހުވޭ ވައްތަރުގެ މެސެޖެ އެވެ.
އެ ވީޑިއޯގެ މައްސަލަ ކޮންޓްރޯލް ކޮމިޝަނުން ތަހުުގީގު ކުރަން ފަށާފައިވާއިރު، އެ ޑޮކިއުމެންޓްރީ އާންމުކުރިފަހުން، މިހައިތަނަށް ސަރުކާރުން ވެސް މުއިއްޒު ވެސް އެކަމާ ބެހޭގޮތުން އެއްވެސް އެއްޗެއް ބުނެފައެއް ނުވެ އެވެ. އަދި، އެ ތުހުމަތުތަކުގެ ސީރިއަސްކަމާއެކު ވެސް އެއްވެސް އިދާރާއަކުން އެ މައްސަލަ ތަހުގީގު ކޮށްފައެއް ވެސް ނުވެ އެވެ.
މި ނޫހަށް އިންޓަވިއު ދިން މީހާއަކީ، މިދިޔަ އަހަރުގެ ކުރީކޮޅު ރައީސް އޮފީހުގެ ވަޒީފާއެއްގައި ހުރި މުވައްޒަފެކެވެ. އޭނާ އެ އޮފީހުގައި ވަޒީފާ އަދާކުރީ ހަފުތާއެއްހާ ދުވަހު އެވެ. އޭގެ ފަހުން ޖެންޑާ މިނިސްޓްރީ އާއި ހަޔާ އެޑިކުކޭޝަން މިނިސްޓްރީގެ ސިޔާސީ މަގާމެއްގައި ވެސް ހުއްޓެވެ. ނަމަވެސް، މިވަގުތު އޭނާ ސަރުކާރުގެ އެއްވެސް މަގާމެއް އަދާނުކުރެ އެވެ.
