ރ، މަޑުއްވަރީގައި ބާއްވާ" ލަ ސޯނިޔާ ދި ޔުނިޓީ ކަޕް 2026" ގެ ގުރުއަތުލުން ބާއްވައި، މުބާރާތުގައި ވާދަކުރާ އަށް ޓީމު ދެ ގްރޫޕަކަށް ބެހިއިރު، ވަރުގަދަ ކުރިމަތިލުންތަކެއް ތާވަލުކުރެވިއްޖެ އެވެ.
މި މުބާރާތަކީ މިހާތަނަށް މަޑުއްވަރީގައި ބޭއްވޭ އެންމެ ހައިބަތު ބޮޑު ފުޓްސަލް މުބާރާތް ކަމަށް މުބާރާތް އިންތިޒާމްކުރާ ލަ ސޯނިޔާ އިން މައުލޫމާތު ދެ އެވެ.
މުބާރާތުގެ ގުރުއަތުލުން ބާއްވައި، ޓީމުތައް ބަހާފައިވާއިރު، ގްރޫޕް އޭގައި ހިމެނެނީ، ޔުނީކް ސްޕޯޓްސް ކްލަބް، އެފްސީ ޔުނައިޓެޑް، ސްޕާޓަންސް ސްޕޯޓްސް ކްލަބް އަދި ކާޅު ސްޕޯޓްސް ކްލަބް އެވެ. ގްރޫޕް ބީގައި ހިމެނެނީ ބީބީ ނިއު ޖެނެރޭޝަން، ޕެންތާސް ސްޕޯޓްސް ކްލަބް، ގޯޓް ބުލްސް ސްޕޯޓްސް ކްލަބް އަދި ހަބުލް ބަބުލް އެވެ.
އަންނަ އަންގާރަ ދުވަހުގެރޭ މަޑުއްވަރީގެ ފުޓްސަލް ދަނޑުގައި ފަށާ މި މުބާރާތުގެ ފުރަތަމަ މެޗުގައި ބައްދަލުކުރާނީ ޔުނީކް ސްޕޯޓްސް ކްލަބާއި އެފްސީ ޔުނައިޓެޑް އެވެ. ދެ ވަނަ މެޗުގައި، އެ ރޭ ބީބީ ނިއު ޖެނެރޭޝަނުން ވާދަކުރަނީ ޕެންތާސް ސްޕޯޓްސް ކްލަބް އެވެ.
ގްރޫޕް ސްޓޭޖު ނިމުމަށް ފަހު، ސެމީ ފައިނަލް މެޗުތައް އޮންނާނީ މި މަހުގެ 18 ވަނަ ދުވަހުގެރޭގަ އެވެ. އަދި، ފައިނަލް މެޗު އޮންނާނީ މި މަހުގެ 20 ވަނަ ދުވަހުގެރޭގަ އެވެ.
ޔުނިޓީ ކަޕްގެ އެންމެ ބޮޑު ހާއްސަ ކަމަކީ، މިއީ، ތާރީހުގައި ވެސް މިހާތަނަށް މަޑުއްވަރީގައި ބޭއްވިގެންދާނެ އެންމެ އަގުބޮޑު މުބާރާތެވެ. އެ ގޮތުން، މި އަހަރުގެ މާޗް 10 ވަނަ ދުވަހު ފަށާ މި މުބާރާތުގައި އެހެން މުބާރާތްތަކާ ހިލާފަށް މޮޅުވާ ޓީމުތަކަށް ވެސް އިނާމް ފައިސާ ދޭ ގޮތަށް ވަނީ ރޭވިފަ އެވެ.
މުބާރާތުގެ ޗެމްޕިއަން ޓީމަށް 40،000 ރުފިޔާ ދޭން ނިންމާފައިވާއިރު، ރަނަރަޕަށް 20،000 ރުފިޔާ ލިބިގެންދާނެ އެވެ. އަދި، މުބާރާތުގެ ގްރޫޕް ސްޓޭޖު ފަހަނައަޅައި އަނެއް ބުރަށް ދާ ކޮންމެ ޓީމަކަށް 1500 ރުފިޔާ ދޭ ގޮތަށް ވަނީ ހަމަޖެހިފަ އެވެ. އަދި، މި ގޮތަށް ބަލާއިރު، ޗެމްޕިއަންކަން ހޯދާ ޓީމަކަށް ޖުމްލަ އެކު، 43000 ރުފިޔާ ހޯދުމުގެ ފުރުސަތު އޮންނާނެ އެވެ.
ޔުނިޓީ ކަޕް، ބޭއްވުމުގެ އެންމެ ބޮޑު މަގުސަދެއްގެ ގޮތުގައި ލަ ސޯނިޔާ އިން ފާހަގަކޮށްފައިވަނީ، ޒުވާނުންގެ މެދުގައި އެއްބައިވަންތަކަން އާލާކޮށް، ކުރިއަރަމުން އަންނަ ފުޓްސަލް ކޮމިއުނިޓީގެ މެދުގައި ފޯރިގަދަ އިވެންޓެއް ކުރިއަށްގެންދިއުމަށެވެ. މި ފަހަރުގެ މުބާރާތުގައި، މަޑުއްވަރީގެ ކުޅުންތެރިންގެ ހުނަރުގެ އިތުރުން، ރާއްޖޭގެ ނަން މަޝްހޫރު ފުޓްސަލް ކުޅުންތެރިން އަދި، ރާއްޖެ އަށް ސާފް ފުޓްސަލް ޗެމްޕިއަންޝިޕް ކާމިޔާބުކޮށްދިން ގައުމީ ޓީމުގެ ކުޅުންތެރިންގެ މޮޅު ކުޅުން ފެނިގެންދާނެ އެވެ.
