އިރާނުގެ ރޫހާނީ ލީޑަރު އާޔަތުالله އަލީ ޚާމަނާއީ އަވަހާރަކޮށްލުމާ ގުޅިގެން ހިޒްބުالله އިން ދިން ރައްދު ހަމަލާތަކަށްފަހު، އިޒްރޭލުން ލުބުނާނުގެ އެކި ސަރަހައްދުތަކަށް ވަރުގަދަ ހަމަލާތަކެއް ދޭން ފަށައިފި އެވެ.
ލުބުނާނުގެ ހެލްތު މިނިސްޓްރީން ބުނާ ގޮތުގައި މި ހަމަލާތަކުގައި މިހާތަނަށް މަދުވެގެން 31 މީހުން މަރުވެ، 149 މީހުން ވަނީ ޒަހަމްވެފަ އެވެ.
އިޒްރޭލްގެ އަސްކަރިއްޔާއިން ބުނި ގޮތުގައި އެގައުމުގެ ވައިގެ ސިފައިން ވަނީ ބައިރޫތުގެ ދެކުނު ސަރަހައްދުތަކާއި، ބިގާއު ވާދީ އަދި ލުބުނާނުގެ ދެކުނުގެ އެކި ރަށްތަކަށް އަމާޒުކޮށް 10 އަށްވުރެ ގިނަ ބާރުގަދަ ހަމަލާދީފަ އެވެ. މި ހަމަލާތަކުގައި ހިޒްބުاللهގެ އިންޓެލިޖެންސް ހެޑްކުއާޓަރުގެ ވެރިޔާ ހުސައިން މަކްލަދު މަރާލާފައިވާ ކަމަށް އިޒްރޭލުން ވަނީ ކަށަވަރުކޮށްދީފައެވެ.
މި ހަމަލާތަކާ ގުޅިގެން އިޒްރޭލުން ވަނީ ލުބުނާނުގެ ގިނަ ސަރަހައްދުތަކަކުން މީހުން ހުސްކުރުމަށް އަމުރުކޮށްފައެވެ. އިޒްރޭލްގެ އަސްކަރީ ވެރިޔާ ލެފްޓިނެންޓް ޖެނެރަލް އީޔާލް ޒަމީރު ވިދާޅުވީ، ހިޒްބުاللهއިން އިޒްރޭލަށް ދިން ހަމަލާތަކުގެ ބަދަލު ވަރަށް ހިތިކޮށް ދޭނެ ކަމަށާއި، ކުރިއަށް އޮތް ދުވަސްތަކުގައި ހަމަލާތައް އިތުރަށް ވަރުގަދަވާނެ ކަމަށެވެ.
މި ހަމަނުޖެހުންތަކުގެ އަސަރު މުޅި ސަރަހައްދަށް ފެތުރިފައިވާއިރު، ސައުދީ އަރަބިއްޔާގެ ރައުސް ތަނޫރާ ރިފައިނަރީ އަށް ވެސް ވަނީ އިރާނުގެ ޑްރޯންތަކެއްގެ ސަބަބުން ގެއްލުންތަކެއް ލިބިފައެވެ. މިކަމާ ގުޅިގެން ދުނިޔޭގެ ބާޒާރުގައި ތެލުގެ އަގު ވަނީ ބޮޑުތަނުން އުފުލި، ބްރެންޓް ކްރޫޑް ފީފާއެއްގެ އަގު 80 ޑޮލަރަށް އަރާފައެވެ. ހޯމްޒް ކަނޑުއޮޅި ސަރަހައްދުގައި ތެޔޮ ޓޭންކަރުތައް ދަތުރުނުކުރެވި ކިއޫ ހަދާފައިވާ ކަމަށް ރިޕޯޓްތައް ބުނެއެވެ.
