ރާއްޖޭގެ ރިސޯޓްތަކުގެ މެދުގައި ކުރިއަށްދާ އެންމެ ފޯރިގަދަ ފުޓްސަލް މުބާރާތް، ރިސޯޓް ލީގުގެ ނޯތު މާލެ ޒޯންގައި އިއްޔެ ކުޅުނު މެޗުތަކުން، ސެންޓާރާ ގްރޭންޑް ލެގޫންސް މޯލްޑިވްސް އާއި އޯގާ އާޓް ރިސޯޓް މޯލްޑިވްސް މޮޅުވެއްޖެ އެވެ.
އެ ގޮތުން، ގްރޫޕް ޑީގައި ފުރަތަމަ މެޗުގައި ބަރޮސް މޯލްޑިވްސް އަތުން 5-2 އިން ބަލިވި ސެންޓާރާ ގްރޭންޑުން އިއްޔެ ކުޅުނު މެޗުގައި، ކޮކޯ ބޮޑު ހިތި ބަލިކުރީ 2-1 އިންނެވެ. މި މެޗުގައި ސެންޓާރާ ގްރޭންޑްގެ ލަނޑުތައް ޖެހީ، މުތާއު މުހައްމަދު އާއި މުހައްމަދު އަޒުމޫން އެވެ. އަދި ބޮޑު ހިތީގެ ގޯލު ޖެހީ، މުހައްމަދު އަދުހަމް އެވެ.
މި ގްރޫޕްގެ ފަހު މެޗުގައި، ބަރޮސް އިން ކުޅޭނީ ކޮކޯ ބޮޑު ހިތިއާ އެވެ.
ގްރޫޕް އީގެ ފުރަތަމަ މެޗުން އޮބްލު އެކްސްޕީރިއަންސް އަތުން ފޯ ސީޒަން ރިސޯޓް މޯލްޑިވްސް އެޓް ކުޑަހުރާ މޮޅުވީ، 4-3 އިންނެވެ. އެކަމަކު، އިއްޔެ ކުޅުނު މެޗުގައި ކުޑަހުރާ އަތުން އޯގާ އާޓް ރިސޯޓް މޯލްޑިވްސް އިން މޮޅުވީ 2-0 އިންނެވެ. އެ ޓީމުގެ ލަނޑުތައް ޖެހީ، ހުސެއިން މައިޝާން އާއި ލޫތު އަހުމަދު ފަތުހީ އެވެ. މި ގްރުޕްގެ ފަހު މެޗުގައި، އޯގާ އިން ބައްދަލުކުރާނީ އޮބްލު އެކްސްޕީރިއަންސް އެވެ.
ނޯތު މާލެ ޒޯނުގައި މިއަދު ކުޅެން ހަމަޖެހިފައިވަނީ، ގްރޫޕް އެފްގެ ދެ މެޗެވެ. އެއީ، ވަރު އާއި ސަމާ އައިލެންޑް ކުޅޭ މެޗާއި އަމީންގިރި އާއި ބަނޑޮސް ބައްދަލުކުރާ މެޗެވެ. ބަނޑޮސް އިން ފުރަތަަމަ މެޗުގައި ސަމާ އައިލެންޑް މޯލްޑިވްސް ބަލިކުރީ 5-3 އިންނެވެ. އަދި، ވަރު ބައި އެޓްމޮސްފިއާ އިން ވަނީ 2-0 އިން ހިލްޓަން މޯލްޑިވްސް އަމީންގިރި ރިސޯޓް އެންޑް ސްޕާ ބަލިކޮށްފަ އެވެ.
މުބާރާތުގެ ފުރަތަމަ ބުރު ގްރޫޕް ސްޓޭޖު ނިމުމަށް ފަހު، ތިން ޓީމު ހިމެނޭ ގްރޫޕްތަކުގެ ދެ ވަނަ އާއި ތިން ވަނަގެ މެދުގައި ޕްލޭއޮފެއް ކުޅޭނެ އެވެ. ޕްލޭއޮފުން މޮޅުވާ ޓީމުތަކާއި ގްރޫޕްތަކުގެ އެއް ވަނަ އަދި ގްރޫޕް އެފްގެ ދެ ވަނަ ހިމެނޭ ގޮތަށް ދެ ވަނަ ބުރުގައި ކުޅޭނީ ގަދަ 12 ޓީމެވެ. އެ އަށް ފަހު ދެން އޮންނާނީ ގަދަ ހަ ޓީމުގެ ބުރެކެވެ. އެ ބުރުގެ އެންމެ ފުލަށް ދާ ދެ ޓީމުގެ މެދުގައި، ސެމީ ފައިނަލުގެ ޖާގަ އަކަށް ޕްލޭއޮފެއް ކުޅޭނެ އެވެ. މި ޒޯންގެ ސެމީ ފައިނަލް މި މަހު 23 ވަނަ ދުވަހު ކުޅޭއިރު، ފައިނަލް މެޗު އޮންނާނީ މި މަހުގެ 25 ވަނަ ދުވަހު އެވެ.
