ރާއްޖޭގެ ރިސޯޓްތަކުގެ މެދުގައި ބާއްވާ އެންމެ ބޮޑު ފުޓްސަލް މުބާރާތް، ރިސޯޓް ލީގު 2025 ގެ އަރި ޒޯނުގެ ފައިނަލުގައި ފަސޭހަކަމާ އެކު ބާސެލޯ ވޭލް ލެގޫން މޯލްޑިވްސްގެ މައްޗަށް ކުރިހޯދާ ކޮންރެޑް މޯލްޑިވްސް ރަންގެލިން އަށް ވަނަ ފަހަރަށް އަރި ޒޯން ކާމިޔާބުކޮށްފި އެވެ.
މި މުބާރާތުގެ ލީގު ބުރުގައި މި ދެ ޓީމު ބައްދަލުކުރި މެޗު ނިމުނީ 1-1 ގެ ނަތީޖާ އަކުންނެވެ. ބާސެލޯ އިން ފައިނަލުގެ ޖާގަ އެއް ހޯދަން ސެމީ ފައިނަލު މެޗު ކުޅެން ޖެހުނުއިރު، ކޮންރެޑް ފައިނަލަށް ދަތުރުކުރީ ލީގު ބުރުގެ އެއްވަނަ ޓީމުގެ ގޮތުގަ އެވެ.
އިއްޔެ ކުޅުނު ފައިނަލު މެޗުގެ ތިންވަނަ މިނިޓްގައި ކޮންރެޑުން ވަނީ ގޯލު ޖަހައި ލީޑު ނަގައިފަ އެވެ. މި ގޯލު އެ ޓީމަށް ޖަހައިދިނީ މުހައްމަދު ރިފާއު ހަސަން އެވެ. އަދި އޭގެ ފަސް މިނިޓް ފަހުން ހުސެއިން އީސާ ވަނި އިތުރު ގޯލެއް ޖަހައި ކޮންރެޑްގެ ލީޑު ފުޅާކޮށްދީފަ އެވެ.
އަރި ޒޯނުގެ ފައިނަލުގައި ކޮންރެޑާއި ބާސެލޯ ބައްދަލުކުރި މެޗުގެ ތެތެއިން - ފޮޓޯ: އިމޭޖަސް.އެމްވީ
އޭގެ ފަހުން ބާސެލޯ އިން ކުރިއަށް ޖެހި ގިނަ ހަމަލާތަކެއް އުފެއްދިނަމަވެސް ގޯލެއް ޖެހޭ ގޮތް ވަނީ ނުވެފަ އެވެ. އޭގެ ފައިދާ ނަގައި ކޮންރެޑުން ވަނީ ދެވަނަ ހާފުގެ ފަސްވަނަ މިނިޓްގައި އެ ޓީމުގެ ތިންވަނަ ގޯލު ޖަހައިފަ އެވެ. މި ގޯލު އެ ޓީމަށް ޖަހައިދިނީ އަބްދުالله އަޒީމް އެވެ. އަދި އޭގެ މިނިޓެއް ފަހުން ކޮންރެޑްގެ ހަތަރުވަނަ ގޯލު އެ ޓީމަށް ޖަހައިދިނީ ލައިޒާން މައުސޫމް އެވެ.
މި ޒޯނުގެ ޗެމްޕިއަންކަން ކޮންރެޑުން ހޯދިއިރު، އެންމެ ގިނަ ގޯލު ޖެހީ ކޮންރެޑުގެ އަހުމަދު މައިސޫން އެވެ. އޭނާ ވަނީ ޖުމްލަ އަށް ގޯލު ޖަހައިފަ އެވެ.
މި ޒޯނުގެ އެންމެ މޮޅު ފަސް ކުޅުންތެރިންނަކީ ބާސެލޯގެ މާއިލް މުހައްމަދު، އުސައިދު އަލީ، ކޮންރެޑްގެ މުހައްމަދު ރިފާއު، އާދަމް އާޒިމް އަދި އަހުމަދު ސައީދު އެވެ.
އަރި ޒޯނުގެ އެންމެ މޮޅު ފަސް ކުޅުންތެރިން - ފޮޓޯ: އިމޭޖަސް.އެމްވީ
އަރި ޒޯނުގެ އެންމެ މޮޅު ކޯޗަކީ، ކުޅުންތެރިއެއްގެ ގޮތުގައި ކޮންރެޑަށް ހަ ތަށި ހޯދައިދިން އެ ޓީމުގެ ކުރީގެ ކެޕްޓަން އަލީ އުމައިރު (އަކާ) އެވެ. މި ޒޯނުގެ އެންމެ މޮޅު ކުޅުންތެރިޔަކަށް ހޮވުނީ ކޮންރެޑްގެ ހުސެއިން ޝިފާހް އެވެ.
