ޕޮންޒީ ސްކީމެއް ހިންގިކަމުގެ ތުހުމަތުގައި ރައްޔިތުންގެ މަޖިލީހުގެ ކުރީގެ މެމްބަރު އަލްހާން ފަހުމީ އާއި އޭނާގެ ދެ ކޮއްކައިން ކަމަށްވާ މީޑިއާ ކައުންސިލުގެ ކުރީގެ ރައީސް ސަހުބާން ފަހުމީ އަދި ޝަޒުބާން ފަހުމީގެ މައްޗަށް އުފުލި ޓެކުމުގެ ދައުވާތަކަށް ބަދަލެއް ގެންނަން ނުޖެހޭ ކަމަށް ޕްރޮސެކިއުޓާ ޖެނެރަލް (ޕީޖީ) އަހުމަދު އައްބާސް ޝަރީފް ނިންމަވައިފި އެވެ.
އެ މައްސަލާގައި ދައުވާކުރީ މ. ފިނިވާގެ 2 ނަންބަރު ބައި, އަލްހާން ފަހުމީ އަދި މީޑިއާ ކައުންސިލުގެ ކުރީގެ ރައީސް ކަމަށްވާ ސަހުބާން ފަހުމީގެ އިތުރުން ސ. ފޭދޫ, ބޮންތި, ޝަޒްބާން ފަހުމީގެ މައްޗަށެވެ.
ޕީޖީ އޮފީހުން ބުނީ އެ މައްސަލައާ ގުޅިގެން ކޮށްފައިވާ 39 ދައުވާއެއް މުރާޖާއާ ކޮށްދިނުމަށް މައްސަލައިގައި ހިމެނޭ އަލްހާންގެ ތިން ބެއިން އެދުމުން، އެ އޮފީހުން މުރާޖާއާ ކުރިއިރު ދައުވާތަކަށް ބަދަލެއް ގެންނަން ޖެހޭ ހާލަތެއް އޮތް ކަމަށް ނުފެނުނު ކަމަށެވެ.
"މައްސަލައިގެ ތަހްގީގު ކުރިއަށް ގެންގޮސްފައިވާ ގޮތާއި، ލިބިފައިވާ ހެކި ގަރީނާއާއި، އިޖުރާއީ ގޮތުން އަމަލުކޮށްފައިވާ ގޮތާއި، ދައުވާލިބޭ މީހުންގެ ފަރާތުން މައްސަލަ މުރާޖައާކޮށްދިނުމަށް އެދި ހުށަހަޅުއްވާފައިވާ ކަންކަމަށް ރިއާޔަތްކުރިއިރު، މި މައްސަލާގައި ހިމެނޭ ދައުވާތައް މުރާޖައާކޮށް، އެ ދައުވާތަކަށް ބަދަލެއް ގެންނަންޖެހޭފަދަ ސަބަބެއް ނުވަތަ ހާލަތެއް އޮތްކަމަށް ނުފެންނަކަމަށް ޕްރޮސިކިއުޓާ ޖެނެރަލް ވަނީ ނިންމަވާފައި،" އެ އޮފީހުން ބުންޏެވެ.
ކިންގްސް ކެޕިޓަލް ހޯލްޑިންސް ޕްރައިވެޓް ލިމިޓެޑްއިން އާންމުންނަށް ހުޅުވާލައިގެން އިންވެސްޓްމަންޓް ސްކީމެއް ތަޢާރަފްކޮށް އިންވެސްޓަރުންނަށް މަންފާ ލިބޭނެކަމަށް ދައްކައިގެން، މަކަރާ ހީލަތުން ގިނަ ދިވެހިންތަކެއް އަތުން ފައިސާ ހޯދާ އެ ފައިސާ ލޯންޑާކޮށްފައިވާ މައްސަލައިގައި، ފުލުހުންގެ ތަހުގީގު ފުރިހަމަކޮށް ހުށަހަޅާފައިވާ ގެއްލުން ލިބުނު 13 މީހުންނާ ގުޅިގެން އަލްހާންގެ ތިންބެއިންގެ ކުރެ ކޮންމެ މީހަކަށް 13 ދައުވާއެއް ނޮވެމްބަރު 23، 2023 ގައި އުފުލާފައިވެ އެވެ.
އަލްހާންގެ ތިންބެއިންނަށް އުފުލި ދައުވާތައް:
1. މ. ފިނިވާގެ 2 ނަންބަރު ބައި، އަލްހާނު ފަހުމީ ގާނޫނު ނަންބަރު: 2014/9 (ދިވެހިރާއްޖޭގެ ގާނޫނުލްއުގޫބާތު) ގެ 212 ވަނަ މާއްދާގެ (ހ) ގެ ދަށުން، ޓެކުމުގެ ކުށުގެ 13 (ތޭރަ) ދައުވާ.
2. މ. ފިނިވާގެ 2 ނަންބަރު ބައި، ސަހުބާން ފަހުމީގެ - ޤާނޫނު ނަންބަރު: 2014/9 (ދިވެހިރާއްޖޭގެ ގާނޫނުލްއުގޫބާތު) ގެ 212 ވަނަ މާއްދާގެ (ހ) ގެ ދަށުން ޓެކުމުގެ ކުށުގެ 13 (ތޭރަ) ދައުވާ.
3. ސ. ފޭދޫ، ބޮންތި، ޝަޒްބާން ފަހުމީ - ގާނޫނު ނަންބަރު: 2014/9 (ދިވެހިރާއްޖޭގެ ގާނޫނުލްއުގޫބާތު) ގެ 212 ވަނަ މާއްދާގެ (ހ) ގެ ދަށުން ޓެކުމުގެ ކުށުގެ 13 (ތޭރަ) ދައުވާ.
އަލްހާގެ ތިންބެއިންގެ މައްޗަށް އުފުލާފައިވާ ދައުވާތަކުގެ ޝަރީއަތް ކްރިމިނަލް ކޯޓުގައި ފަށާފައިވާއިރު، އެ ތިންބެއިންގެ މައްޗަށް އުފުލި ދައުވާތަކަށް ވަނީ އިންކާރު ކޮށްފަ އެވެ.
އިންވެސްޓަރުންނަށް މަންފާ ލިބޭނެ ކަމަށް ދައްކައިގެން އެ ތިން ބެއިން ހިންގާ ކިންގްސް ކުންފުނިން އާންމުންނަށް ހުޅުވާލައިގެން އިންވެސްޓްމަންޓް ސްކީމެއް ތައާރަފުކޮށް, ހިންގި އެ ސްކީމަށް އެކި މީހުން 98 މިލިއަނަށް ވުރެ ގިނަ ދިވެހި ރުފިޔާ ވަނީ އިންވެސްޓުކޮށްފަ އެވެ.
