ރާއްޖެއިން އަވަށްޓެރި އިންޑިއާއާއެކު ބާއްވާ ގާތް ގުޅުން ދެމެހެއްޓުމަށް އެންމެ މުހިންމުވި އެއް ދަނޑިވަޅުގައި، އެ ގައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރު ކުރެއްވި މަސައްކަތަށް ރައީސް ޑރ. މުހައްމަދު މުއިއްޒު ޝުކުރު ދަންނަވައިފި އެވެ.
ސަފީރު ކަމުގެ ދައުރު ހަމަކުރައްވާ އެނބުރި ގައުމަށް ވަޑައިގަތުމުގެ ކުރިން މުނޫ މިއަދު ވަނީ ރައީސް މުއިއްޒުގެ އަރިހަށް ވަދާއީ ޒިޔާރަތް ކުރައްވާފަ އެވެ. މި ބައްދަލުވުން ބޭއްވީ މިއަދު ހެދުނު ރައީސް އޮފީހުގަ އެވެ.
ބައްދަލުވުމާ ގުޅިގެން އެ އޮފީހުން ނެރުނު ބަޔާނެއްގައި ބުނީ، ދެ ގައުމުގެ ގުޅުން ކުރިއަރުވާ ދެމެހެއްޓުމާސް މުނޫ ކުރެއްވި މަސައްކަތަށް ރައީސް އޭނާއަށް ޝުކުރު އަދާކުރެއްވި ކަމަށެވެ.
"އަދި، އިންޑިއާ ސަފީރުގެ ސަފީރުކަމުގެ ދައުރަކީ ފަހަކަށް އައިސް ދިވެހިރާއްޖެއާއި އިންޑިއާގެ އެކުވެރިކަމާއި ދެ ގައުމުގެ ގުޅުން އާރޯވެގެންދިޔަ، މުހިންމު މަރުހަލާއެއް ކަންވެސް ރައީސުލްޖުމްހޫރިއްޔާ ފާހަގަކުރެއްވި،" އެ ބަޔާނުގައިވެ އެވެ.
ދެ ގައުމުގެ ގުޅުން އާރޯވެގެން ދިޔަ ކަމަށް ރައީސް އޮފީހުން ބުނެފައިވާއިރު، މި ވެރިކަމުގެ ކުރީކޮޅު ރާއްޖެ-އިންޑިއާ ގުޅުން ދުވަހަކު ނުވާހާ ބޮޑަށް ގޯސްވި އެވެ. ނަމަވެސް މުނޫ އާދި ދިވެހި ހާރިޖިއްޔާގެ ގިނަ މަސައްކަތްތަކަކުން ގުޅުން މިހާރު ވަނީ ރަނގަޅުވެފަ އެވެ.
މި ބައްދަލުވުމުގައި އިންޑިއާގެ ސަފީރު ވަނީ ރާއްޖޭގެ ތަރައްގީއަށް އެ ގައުމުގެ އެހީތެރިކަން އަބަދުވެސް ލިބޭނެ ކަމުގެ ޔަގީންކަން ދެއްވާފަ އެވެ. އަދި ގޮންޖެހުންތަކުން އަރައިގަތުމަށް ރައީސް މުއިއްޒު ދައްކަވާ ލީޑަޝިޕަށް މުނޫ ފާހަގަކުރެއްވި ކަމަށް އެމަނިކުފާނުގެ އޮފީހުން ބުނެފައިވެ އެވެ.
ރައީސް އޮފީހުން ބުނި ގޮތުގައި މި ބައްދަލުވުމުގައި ރައީސް އާއި ސަފީރު ވަނީ އޮކްޓޯބަރު ދެ ގައުމުގެ ދެމެދުގައި އެއްބަސްވި ވިޝަން ޑޮކިއުމެންޓުގައިވާ ކަންކަން ތަންފީޒުކުރެވެމުންދާ މިންވަރާއި އެ މަަސައްކަތް ހަލުވި ކުރުމާ ބެހޭގޮތުން މަޝްވަރާކުރައްވާފަ އެވެ.
ނޮވެމްބަރު 10، 2021 ގައި ރާއްޖެއަށް ކަނޑައަޅުއްވާފައި ހުންނަވާ ސަފީރުގެ މަގާމަށް އެ ގައުމުން އައްޔަނު ކުރެއްވި މުނޫގެ ބަދަލުގައި އެ މަގާމަށް މިދިޔަ ހޯމަ ދުވަހު ހަމަޖައްސާފައި ވަނީ އިންޑިއާއިން ނައިޖީރިއާއަށް ކަނޑައަޅުއްވާފައި ހުންނެވި ސަފީރު ޖީ ބަލަސުބްރަމަނިއަން އެވެ.
ރާއްޖޭގެ ސަފީރުކަމާ ވަރަށް އަވަހަށް ސުބްރަމާނިއަން ހަވާލުވެވަޑައިގަންނަވާނެ ކަމަށް އިންޑިއާގެ މިނިސްޓްރީ އޮފް އެކްސްޓާނަލް އެފެއާޒުން ހޯމަ ދުވަހު ބުންޏެވެ.
