މަޖިލިސް މެންބަރުންގެ ގޮނޑި ގެއްލުވައިލުމުގެ ބާރު ސިޔާސީ ޕާޓީތަކަށް ލިބޭ ގޮތަށް ގާނޫނުއަސާސީއަށް އިއްޔެ ގެނައި އިސްލާހަކީ ގާނޫނުއަސާސީގެ ހަތަރުވަނަ މާއްދާއިން ކަށަވަރުކޮށްދޭ ރައްޔިތުންގެ ބާރު ގެއްލޭގޮތަށް ފަރުމާ ކޮށްފައި އޮތް އިސްލާހެއް ކަަމަށް ވާތީ އެ އިސްލާހަށް ގާނޫނީ ބާރުވެރިކަން ނުލިބޭނެ ކަމަށް ކުރީގެ އުއްތަމަ ފަނޑިޔާރު، ޑރ. އަހުމަދު އަބްދުﷲ ދީދީ (ޑީޑީ) ވިދާޅުވެއްޖެ އެވެ.
އެކްސްގައި ޑީޑީ ކުރެއްވި ޕޯސްޓެއްގައި ވިދާޅުވީ ގާނޫނުއަސާސީގެ ހަތަރު ވަނަ މާއްދާއިން ކަށަވަރު ކޮށްދޭ ރައްޔިތުންގެ ބާރު ނުވަތަ ރައްޔިތުންގެ ސިޔާދަތުގެ ޕްރިންސިޕަލް އަކީ އެއާ ހިލާފަށް ގާނޫނުއަސާސީއަށް ވެސް ބަދަލު ނުގެނެވޭނެ "ސޫޕްރާ ކޮންސްޓިޓިއުޝަނަލް" ޕްރިންސިޕަލް އެއް ކަމަށެވެ.
"ރައްޔިތުންގެ ސިޔާދަތުގެ މަބްދައަކީ ހަގީގަތުގައި އެ މަބްދައާ ހިލާފަށް ގާނޫނުއަސާސީއަށް ވެސް ބަދަލު ނުގެނެވޭނެ "ސޫޕްރާ ކޮންސްޓިޓިއުޝަނަލް" ޕްރިންސިޕަލް އެއްކަމުން، އެ މަބްދައާ ތައާރުޒުވާ ގޮތަށް ގާނޫނުއަސާސީ އިސްލާހު ކުރުމުގައި ކަނޑައެޅޭ ކޮންމެ ނައްސަކީ އެއަށް "ކޮންސްޓިޓިއުޝަނަލް ލެޖިޓިމެސީ" ލިބިގެންވާ ނައްސެއްކަމުގައި ނުބެލެވޭނެ އެވެ." ޑީޑީ ވިދާޅުވެފައިވެ އެވެ.
ދުނިިޔޭގެ ބައެއް ގައުމުތަކުގައި ޕާޓީ ބަދަލު ކުރުން މަޖިލިސް މެންބަރުންނަށް މަނާ ކުރުމުގެ ގޮތުން ގާނޫނުތައް ހަދާފައި ހުންނަ ކަމަށެވެ. ނަމަވެސް އެންޓި ޑިފެކްޝަން ގާނޫނުތަކަކީ ދުނިޔޭގެ ކުރިއަރާފައިވާ ގިނަ ޑިމޮކްރެސީތަކުގައި ބަލައިގަންނަ އެއްޗެއް ނޫން ކަމަށް ޑީޑީ ވިދާޅުވި އެވެ.
ޑީޑީ ވިދާޅުވީ އެންޓި ޑިފެކްޝަން ގާނޫނު ހަދައި، ބޭނުން ކުރަނީ ބަރުލަމާނީ ނުވަތަ ސެމީ ބަރުލަމާނީ ނިޒާމުތަކުގައި ކަމަށެވެ. އަދި އެފަދަ ގާނޫނުގެ މައިގަނޑު މަގުސަދަކީ އެފަދަ ނިޒާމުތަކުގައި، މަޖިލީހުގެ މެޖޯރިޓީ ގެއްލިއްޖެ ނަމަ ސަރުކާރު ދެމިއޮތުމަށް ހުރަސް އެޅިދާނެތީ އެކަމަށް ހައްލު ހޯދުން ކަމަށް ޑީޑީ ވިދާޅުވި އެވެ.
"ދިވެހިރާއްޖޭގެ ޖުމްހޫރިއްޔާ ފަދަ ރިޔާސީ ނިޒާމެއްގައި ސަރުކާރު އުފަންވަނީ ރައްޔިތުންގެ މަޖިލީހުން ކަމުގައި ނުވާއިރު، ރައްޔިތުންގެ މަޖިލީހުގެ މެޖޯރިޓީ އާއި ސަރުކާރުގެ ވުޖޫދާއި އަދި ދެމި އޮތުމާއި ދެމެދު އޮންނަންޖެހޭ އެއްވެެސް ދުސްތޫރީ ގުޅުމެއް ނެތްއިރު، ދިވެހިރާއްޖޭގައި އެންޓި ޑިފެކްޝަން ގެ އުސޫލުތަކެއް މި ގެނެވުނު ދުސްތޫރީ އިސްލާހުގައި ބަޔާން ކުރެވިފައިވާ ގޮތަށް، ކަނޑައެޅިގެން ދިޔުމުން ރައްޔިތުންގެ މަޖިލީހަކީ އެ މަޖިލީހާ ގާނޫނުއަސާސީން މަތިކޮށްފައިވާ އިހުތިސާސްތައް ފުރިހަމައަށް އަދާކުރާ ބާރެއްގެ ގޮތުގައި އޮންނަ އޮތުން ނިމުމަކަށް އައިސް އެ މަޖިލިސް "ޑިސްފަންކްޝަނަލް" ބާރަކަށް ބަދަލުވެގެން ދިޔުމުގެ އިހުތިމާލު ވަރަށް ވެސް ބޮޑެވެ." ޑީޑީ ވިދާޅުވި އެވެ.
އަވަސް އަރުވާލައިގެން ގާނޫނުއަސާސީއަށް އިސްލާހު ގެނައުމަކީ ތަހުޒީބު މުޖުތަމައުއެއްގައި ކަން ހިނގައިގެން ވާނެ ގޮތެއް ނޫން ކަމަށް ވެސް ޑީޑީ ވިދާޅުވި އެވެ. އެހެންކަމުން، ބެސްޓްޕްރެކްޓިސްއަށް ތަބާވުމަކާ ނުލައި އެއް ދުވަސް ތެރޭގައި އިސްލާހު ހުށަހަޅައި އިސްލާހަށް ބަހުސްކޮށް އިސްލާހު ފާސްކޮށްފައި ވަނީ ނޭދެވޭ ނުފޫޒުގައި ޖެހުން ފިޔަވައި އެހެން އެއްވެސް ސަބަބެއް އޮވެގެން ކަމަށް ގަބޫލު ނުކުރެވޭ ކަމަށް ޑީޑީ ވިދާޅުވި އެވެ.
އެކި މަގާމުތަކަށް އިންތިހާބު ކުރާ މެންބަރުން މަގާމުން ވަކި ކުރުމުގެ ބާރު، ރައްޔިތުންނަށް ލިބޭ ގޮތަށް ގާނޫނުއަސާސީއަށް އިސްލާހު ގެނައުމުގެ މުހިންމުކަން މިހާރު އިތުރުވެފައިވާ ކަމަށް ވެސް ޑީޑީ ވިދާޅުވި އެވެ.
