ޔާމީން ބިނާކުރި ދަރުމަވަންތަ ހޮސްޕިޓަލް ހުޅުވިއިރު ހުރިހާ ޝުކުރެއް ރައީސް މުއިއްޒަށް

ރޭގެ ޖަލްސާގައި ރއީސް ޑރ. މުހައްމަދު މުއިއްޒު ދަރުމަވަންތަ ހޮސްޕިޓަލް ރަސްމީކޮށް ހުޅުވައި ދެއްވާއިރު، އަރިހުގައި ހެލްތު މިނިސްޓަރު އަބްދުﷲ ނާޒިމް އަދި ދަރުމަވަންތަ ހޮސްޕިޓަލްގެ ސީއީއޯ އިބްރާހިމް އަބްދުއްރައްޒާގް ހަލީމް. -- ފޮޓޯ: ރައީސް އޮފީސް

ރޭގެ ޖަލްސާގައި ރއީސް ޑރ. މުހައްމަދު މުއިއްޒު ދަރުމަވަންތަ ހޮސްޕިޓަލް ރަސްމީކޮށް ހުޅުވައި ދެއްވާއިރު، އަރިހުގައި ހެލްތު މިނިސްޓަރު އަބްދުﷲ ނާޒިމް އަދި ދަރުމަވަންތަ ހޮސްޕިޓަލްގެ ސީއީއޯ އިބްރާހިމް އަބްދުއްރައްޒާގް ހަލީމް. -- ފޮޓޯ: ރައީސް އޮފީސް

ކުރީގެ ރައީސް ޔާމީނުގެ ވެރިކަމުގައި ހިންގި އެންމެ ބިޔަ އެއް މަޝްރޫއު ކަމުގައިވާ ދަރުމަވަންތަ ހޮސްޕިޓަލުން ހިދުމަތް ދޭން ފެށިތާ ފަސް އަހަރު ފަހުން ރޭ ރަސްމީކޮށް ހުޅުވިއިރު، އިއްވި ޝުކުރުގެ ލިސްޓުގައި ޔާމީނުގެ ނަން ނުހިމަނައި ހުރިހާ ޝުކުރެއް އޭރުގެ ހައުސިން މިނިސްޓަރު، އަދި މިހާރުގެ ރައީސް ޑރ. މުހައްމަދު މުއިއްޒުއަށް ދީ ނިންމާލައިފި އެވެ.

ދަރުމަވަންތަ ހޮސްޕިޓަލް ހުޅުވުމަށް ރޭ ބޭއްވި ހާއްސަ ރަސްމިއްޔާތުގައި، ޝުކުރުގެ ލިސްޓު އިއްވެވީ މާލެ ސިޓީ ހޮސްޕިޓަލްސް ގުރޫޕުގެ ސީއީއޯ، އިބްރާހިމް އަބްދުއްރައްޒާގް ހަލީމް އެވެ. ހަލީމްގެ ޝުކުރުގެ ލިސްޓުގެ އެންމެ ކުރީގައި އޮތީ ރައީސް މުއިއްޒުގެ ނަންފުޅެވެ.

"މިރޭގެ މި ރަސްމިއްޔާތުގެ އަސްލަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ހިކުމަތްތެރި ވިސްނުންފުޅު، މިއީ މަނިކުފާނު އެ ދުވަހު ރައީސުލްޖުމްހޫރިއްޔާގެ އިންތިހާބީ ވައުދުތައް ތަކުރާރު ކުރެއްވި ފަދައިން ދަރުމަވަންތަ ހޮސްޕިޓަލް އޭގެ އެންމެ ފުރިހަމަ މާނައިގައި ފުރިހަމަ ގޮތުގައި ތަރައްގީ ކުރުމަށް ކުރެއްވި އުއްމީދު މިއަދު ވެސް ހަނދުމަފުޅު ބަހައްޓަވައި މި ހޮސްޕިޓަލާ މެދު ގެންގުޅުއްވި ހާއްސަ ސިޔާސަތުގެ ފޮނި ނަތީޖާ،" ހަލީމް ވިދާޅުވި އެވެ.

އެއަށް ފަހު ދެން ހަލީމް ޝުކުރު އަދާ ކުރެއްވީ ދަރުމަވަންތަ ހޮސްޕިޓަލުގައި މަސައްކަތް ކުރާ ޑޮކްޓަރުންނާއި ނަރުހުން ހިމެނޭހެން ހުރިހާ މުވައްޒަފުންނަށެވެ. ހޮސްޕިޓަލް ޓާޝަރީ ފެންވަރުގައި ހުޅުވުމަށް އެ މުވައްޒަފުން ކުރެއްވި މަސައްކަތް ހަލީމް ފާހަގަ ކުރެއްވި އެވެ.

ލިސްޓުގެ ތިންވަނައަށް ހަލީމް ފާހަގަކުރެއްވީ ހެލްތު މިނިސްޓަރު، އަބްދުﷲ ނާޒިމް އާއި އެ މިނިސްޓަރީގެ މުވައްޒަފުންނެވެ. ދެން ފިނޭންސް މިނިސްޓަރު މޫސާ ޒަމީރު އާއި އެ މިނިސްޓަރީގެ މުވައްޒަފުންނެވެ.

ލިސްޓުގެ ފަހަތުން ހަލީމް ޖާގަ ދެއްވީ ދަރުމަވަންތަ ހޮސްޕިޓަލުގެ ސަޕްލަޔަރުންނަށާއި ދައުލަތުން އެއްވެސް ހަރަދެއް ނުކޮށް މިރޭގެ އިވެންޓު ބާއްވައިދިން ސްޕޮންސަރުންނަށެވެ.

ހަލީމްއަށް ފަހު ވާހަކަދެއްކެވި ހެލްތު މިނިސްޓަރު ނާޒިމްގެ ވާހަކައިގައި ވެސް ފާހަގަ ކުރެއްވީ ރައީސް މުއިއްޒުގެ ދުރު ވިސްނުން ފުޅާއި ސިއްހީ ނިޒާމު ކުރިއެރުވުމަށް އެމަނިކުފާނު ގެންގުޅުއްވާ ތަސައްވުރުގެ ވާހަކަ އެވެ.

ޕީޕީއެމްގެ ފުރަތަމަ ވެރިކަމުގައި 2.2 ބިލިއަން ރުފިޔާ ހަރަދުކޮށްގެން އިމާރާތްކޮށް 2018 ގައި ނިމުނު ދަރުމަވަންތަ ހޮސްޕިޓަލުން ހިދުމަތް ދޭން ފެށީ އޭޕްރިލް 2019 ގަ އެވެ. ރެއާ ހަމައަށް އެ ހޮސްޕިޓަލް ބޭނުން ކުރަމުން އައީ އައިޖީއެމްއެޗުގެ ބައެއްގެ ގޮތުގަ އެވެ.

ސަރުކާރުގެ މައި ހޮސްޕިޓަލްގެ ގޮތުގައި ދަރުމަވަންތަ ހޮސްޕިޓަލް ރޭ ރަސްމީކޮށް ހުޅުވި ވަގުތު އެ ރަސްމިއްޔާތުގައި އެޅުވި ވީޑިއޯ ރިޕޯޓުގައި ވެސް ހިފެހެއްޓުމެއް ނެތް ތައުރީފު އެތައް އަޑަކުން ރައީސް މުއިއްޒުއަށް ކުރި އެވެ.

ދަރުމަވަންތަ ހޮސްޕިޓަލް ޓާޝަރީ ހޮސްޕިޓަލެއްގެ ގޮތުގައި ރަސްމީކޮށް ރޭ ހުޅުވުމާ ހަމައަށް ދިޔައީ އެތައް ގޮންޖެހުމަކާއެކު ގިނަ މަރުހަލާތަކެއް ކަޑައްތު ކޮށްފައި ކަމަށް އެ ރިޕޯޓުގައި ބުންޏެވެ.

"ރާއްޖޭގައި ބިނާ ކުރެވިފައިވާ އެންމެ ބިޔަ ބިނާކަމުގައިވާ މި ހޮސްޕިޓަލުގެ ބިންގާ އެޅުނު ދުވަހުން ފެށިގެން އޭރުގެ ހައުސިން އެންޑް އިންފްރާސްޓްރަކްޗާ މިނިސްޓަރު އަދި މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މި ހޮސްޕިޓަލް ނިންމުމަށް ދެއްވި ހާއްސަ ސަމާލު ކަމަކީ ދިވެހި ހުރިހާ ރައްޔިތުން ވެސް އަދި ހާއްސަކޮށް ހޮސްޕިޓަލުގެ މުވައްޒަފުން ފަހުރުވެރިކަމާއެކު ބަލައިގަންނަ ކަމެއް،" އެ ރިޕޯޓުގައި ބުންޏެވެ.

ރައީސް ޔާމީނުގެ ނަން ނުކިޔާ ރޭގެ ޖަލްސާ ނިންމައިލި ނަމަވެސް، ސިނަމާލެ ބުރިޖާއި ހިޔާ ޓަވަރުތަކުގެ އިތުރުން ދަރުމަވަންތަ ހޮސްޕިޓަލަކީ ޔާމީނުގެ ފަސް އަހަރުގެ އެންމެ ކާމިޔާބު މަޝްރޫއުތަކެވެ.

ކޮމެންޓް

ފަހުގެ ޚަބަރު

ލޯ ޑިގްރީ އިމްތިހާނަށް މާލެ އަންނާކަށް ނުޖެހޭނެ: ބާ ކައުންސިލް

ލޯ ޑިގްރީގެ އިމްތިހާނުތައް ހެދުމަށް މާލެއަށް ނުވަތަ ވަކި ހާއްސަ ރަށަކަށް ހާޒިރުވުން ލާޒިމު ނޫން ކަމަށާއި، ދަރިވަރުން ދިރިއުޅޭ ރަށެއްގެ ސްކޫލް ނުވަތަ ކައުންސިލް މެދުވެރިކޮށް އިމްތިހާނު ހެދޭނެ މަގު ބާ ކައުންސިލުން ފަހިކޮށްދީފިއެވެ. އަންނަ އަހަރުން ފެށިގެން އަމަލުކުރާ މި އުސޫލުގެ ދަށުން އިމްތިހާނު ހަދާ ގޮތަށް ބަދަލު އައި ނަމަވެސް، ކޯހުގެ މަންހަޖާއި ކިޔަވައިދޭ މުއްދަތަށް އެއްވެސް ބަދަލެއް ނާންނާނެއެވެ.

ތަރައްގީގެ އެއްވެސް ކަމެއް ކުރުމަށް ލާރިއެއް ނެތް: ޝާކިރު

އަންނަ އަހަރުގެ ބަޖެޓުގައި ރިކަރަންޓް ހަރަދަށް ކެނޑުމަށްފަހު ތަރައްގީގެ މަޝްރޫއުތަކަށް ފައިސާ ނެތް ކަމަށް ވިދާޅުވެ މެންބަރު އަހުމަދު ޝާކިރު ކަންބޮޑުވުން ފާޅުކުރައްވައިފިއެވެ. އޭނާ ވިދާޅުވީ ދައުލަތުގެ އާމްދަނީގެ ބޮޑުބައެއް ހަރަދުވަނީ ރިކަރަންޓް ކަންކަމަށް ކަމަށާއި، މަޝްރޫއުތައް ހިންގަން ޖެހެނީ އިތުރަށް ދަރަނި ނަގައިގެން ކަމަށެވެ. މީގެ އިތުރުން ސަރުކާރު ކުންފުނިތަކުން ބޮޑެތި ގެއްލުންވަމުންދާ ދިއުމަށްވެސް އޭނާ ވަނީ ފާޑުވިދާޅުވެފައެވެ.

"ސިޓިޒަންސް ކޮމްޕްލެއިންޓްސް" ލައުންޖުތަކެއް ގާއިމުކޮށްފި

ރައްޔިތުންގެ ޝަކުވާތަކާއި ކަންބޮޑުވުންތައް ސަރުކާރަށް ހުށަހެޅުމަށްޓަކައި މާލެ އާއި ހުޅުމާލޭގައި "ސިޓިޒަންސް ކޮމްޕްލެއިންޓްސް" ބިއުރޯގެ ދެ ލައުންޖެއް މިއަދު ވަނީ ހުޅުވައިފައެވެ. ސަރުކާރު ބަންދު ނޫން ކޮންމެ ދުވަހަކު ޚިދުމަތް ދޭ މި އޮފީސްތަކަކީ ރައީސުލްޖުމްހޫރިއްޔާގެ އޮފީހުގެ ދަށުން ހިންގާ، ރައްޔިތުންގެ މައްސަލަތަކަށް ހައްލު ހޯދައިދިނުމަށް ގާއިމުކުރި ތަންތަނެވެ.

ރިއަލް އެސްޓޭޓު ބިލު މަޖިލީހަށް ބަލައިގަނެފި

މި ބިލު ބަލައިގަންނަން ވޯޓު ދިނީ 42 މެންބަރުން. ބިލާ ދެކޮޅަށް ވޯޓު ދެއްވީ އެމްޑީޕީގެ 13 މެންބަރުން. މި ބިލު ދިރާސާކުރާނީ ގައުމީ ތަރައްގީ އާއި ތަރިކައިގެ ކޮމިޓީން. މިއީ ގާނޫނުއަސާސީގެ ހިމާޔަތްތައް ނައްތާލައި، ތާއަބަދަށް ނުވަތަ ހުސްނުވާ ގޮތަށް ބޭރު މީހުންނަށް ބިން މިލްކުކުރެވޭނެ ގޮތް ހެދުމަށް އިންތިޒާމުތަކެއް ހިމަނާފައިވާ ބިލެއް

ބޮޑެތި ޖޫރިމަނާތަކެއް ހިމަނާފައިވާ އަބުރުގެ ބިލު ކޮމިޓީއަށް

ސޯޝަލް މީޑިއާގައި މީހެއްގެ އަބުރާ ބެހޭ ފަދަ ޕޯސްޓެއް ހިއްސާކޮށްފިނަމަ 5 ލައްކަ ރުފިޔާއާ ހަމައަށް ޖޫރިމަނާ ކުރެވޭ ގޮތަށް ހުށަހެޅި އަބުރުގެ ބިލު މަޖިލީހަށް ބަލައިގަނެ ކޮމިޓީއަށް ފޮނުވައިފިއެވެ. މި ބިލުގައި ބަހާއި، ފޮޓޯއާއި، އިޝާރާތް އަދި ފިލްމު ފަދަ ވަސީލަތްތައް މެދުވެރިކޮށް އަބުރާ ބެހުމުގެ ދައުވާ ކުރެވޭނެ ގޮތްތައް ބަޔާންކޮށްފައިވެއެވެ.

މަރުގެ އަދަބު ތަންފީޒު ކުރާ ބިލު ބަލައިގެންފި

ދަންޖައްސައިގެން މަރުގެ އަދަބު ތަންފީޒުކުރާ ގޮތަށް ސަރުކާރުން ހުށަހެޅި ބިލު ރައްޔިތުންގެ މަޖިލީހަށް މިއަދު ބަލައިގެންފިއެވެ. މި ބިލުގައި މަރުގެ އަދަބު ތަންފީޒުކުރާނެ ގޮތާއި، އެކަން ހިންގާނެ ޕެނަލެއް އެކުލަވާލުމުގެ އިތުރުން، ބަލިވެއިނުމާއި ދަރިފުޅަށް ދެ އަހަރު ފުރުން ފަދަ އަދަބު ތަންފީޒުނުކުރެވޭނެ ހާލަތްތައް ބަޔާންކޮށްފައިވެއެވެ.

ތިން ކުންފުންޏެއްގެ މަނީ އެކްސްޗޭންޖު ލައިސަންސް ބާތިލްކޮށްފި

މަނީ ޗޭންޖިން ގަވާއިދާ ތަކުރާރުކޮށް ހިލާފުވި ތިން ކުންފުންޏެއްގެ ލައިސަންސް އެމްއެމްއޭ އިން ބާތިލުކޮށް، އެ ކުންފުނިތައް ބޮޑެތި އަދަދުތަކުން ޖޫރިމަނާކޮށްފިއެވެ. މި ފިޔަވަޅަކީ ބޭރު ފައިސާގެ ބާޒާރު ކޮންޓްރޯލްކޮށް، ގަވާއިދާ ހިލާފު މުއާމަލާތްތައް ހުއްޓުވުމަށް އެމްއެމްއޭ އިން ކުރަމުންދާ މަސައްކަތުގެ ތެރެއިން އެޅި ފިޔަވަޅެކެވެ.

Newsletter

Get the latest news delivered straight to your inbox