ޔޫރަޕް ޖޫނިއާ ބެޑްމިންޓަން ކަލަންޑަރުގައި ހިމެނޭ ޕޮލިސް އިންޓަނޭޝަނަލް ފެސްޓިވަލްގައި ލައިބާ އަހުމަދު މަހުލޫފް (އެލީ) އާއި ކިޔާން އާދިލް މުހައްމަދު މުބާރާތުގައި ވާދަކުރަން ފަށައިފި އެވެ.
އިއްޔެ ފެށި މި މުބާރާތް ނިމޭނީ އަންނަ އާދީއްތަ ދުވަހު އެވެ. މި ފަހަރުގެ މުބާރާތުގައި ފަސް ގައުމަކުން 140 އަށް ވުރެ ގިނަ ޖޫނިއާ އެތުލީޓުން ވާދަކުރާނެ އެވެ.
މޯލްޑިވްސް ސްޕޯޓްސް އެވޯޑްސްގެ އެންމެ އުންމީދީ އެތުލީޓުންގެ ތެރޭގައި ހިމެނޭ، އެލީ މިދިޔަ އަހަރުން ފެށިގެން ޔޫރަޕް ޖޫނިއާ ކަލަންޑަރު މުބާރާތްތަކުގައި ބައިވެރިވާއިރު، މިއީ ކިޔާން ޔޫރަޕްގެ މުބާރާތެއްގައި ވާދަކުރާ ފުރަތަމަ ފަހަރެވެ. މީގެ ކުރިން އެލީ ވަނީ ޔޫރަޕް މުބާރާތްތައް ކުޅެ, ގިނަ ކާމިޔާބީތަކެއް ހޯދައިފަ އެވެ. މި ފަހަރުގެ މުބާރާތުގައި އެލީ ވާދަކުރާނީ 13 އަހަރުން ދަށުގެ ކެޓަގަރީގަ އެވެ. ކިޔާން ވަނީ މިދިޔަ އަހަރު ބޭއްވި ސައުތު އޭޝިއާ ރީޖަނަލް މުބާރާތުގައި ބައިވެރިވެފަ އެވެ. އޭނާ މި މުބާރާތުގައި ފެނިގެންދާނީ، 15 އަހަރުން ދަށުގެ ކެޓަގަރީންނެވެ.
މުބާރާތުގެ 13 އަހަރުން ދަށުގެ މިކްސް ޑަބަލްސް ބައިން، އެލީ އާއި ލިތުއޭނިއާގެ ޖޫލިއަސް ވަނީ ކުޅުނު ދެ މެޗުން މޮޅުވެ ސެމީ ފައިނަލް އަށް ދަތުރުކޮށްފަ އެވެ. މި ގްރޫޕްގައި ހިމެނޭ ޕޮލެންޑްފެ ސަވޭރީ އާއި ހެނާގެ ޕެއާ އަތުން އެލީ އާއި ޖޫލިއަސްގެ ޕެއާ މޮޅުވީ 21-11، 21-15 އިންނެވެ. އަދި ޕޮލެންޑްގެ ނިކޯޑެމް އާއި އަލެކްސަންޑަގެ ޕެއާ އަތުން އެލީ އާއި ޖޫލިއަސްގެ ޕެއާ މޮޅުވީ 21-16. 22-20 އިންނެވެ.
ސިންގަލްސްގެ 13 އަހަރުން ދަށުގެ ބައިން އެލީ ވަނީ ކުޅުނު ތިން މެޗުން މޮޅުވެ، ގަދަ 16 އަށް ދަތުރުކޮށްފަ އެވެ. އެލީ ފުރަތަމަ މެޗުން މޮޅުވީ ވިކްޓޯރިއާއާ ބައްދަލުކޮށް 21-16 21-14 އިންނެވެ. ދެ ވަނަ މެޗުގައި ހެނާއާ ކުޅެގެން، 21-16، 12-15 އިން މޮޅުވިއިރު، ތިން ވަނަ މެޗުގައި ކުރިހޯދީ އަލެކްސަންޑާ ކުރާސިއަކް އަތުން 21-11، 22-20 އިންނެވެ.
އަންހެން ޑަބަލްސްގައި އެލީ އާއި ޕޮލެންޑްގެ އޮލިވިއާ ސެރަފީންގެ ޕެއާ ކުޅުނު މެޗުން ވަނީ 21-18، 21-09 އިން ބަލިވެފަ އެވެ. މި ގްރޫޕްގެ ދެ މެޗު މިއަދު އެބައޮތެވެ.
ފަނަރަ އަހަރުން ދަށުގެ ބައިގައި ވާދަކުރާ ކިޔާންގެ މެޗުތައް ފަށާނީ މިއަދު އެވެ. އެ ގޮތުން، މިކްސް ޑަބަލްސްގައި ކިޔާން ޕެއާ ކޮށްފައިވަނީ، ޔޫކްރެއިންގެ މަކްސީމް އާބަންސްކީއާ އެކުގަ އެވެ. އެ ޕެއާ އިން ކުޅޭނީ ހަތަރު ޕެއާ ހިމެނޭ ގްރޫޕެއްގަ އެވެ.
އަންހެން ސިންގަލްސްގެ 15 އަހަރުން ދަށުގެބައިގައި ކިޔާން ހިމެނެނީ ވެސް ހަތަރު ކުޅުންތެރިންގެ ގްރޫޕެއްގަ އެވެ. އެއީ، ޕޮލެންޑްގެ ދެ ކުޅުންތެރިންނާއި އުޒްބެކިސްތާން ކުޅުންތެރިއަކާ އެކުގަ އެވެ.
ފަނަރަ އަހަރުން ދަށުގެ އަންހެން ޑަބަލްސް ބައިގައި، ކިޔާން ހިމެނެނީ، ޕޮލެންޑްގެ ރޯޒާ ސްޒީޕެރެކްއާ އެއް ޕެއާއެއްގަ އެވެ. މި ޕެއާ އިން ކުޅޭނީ ޕޮލެންޑްގެ ދެ ޕެއާ އާއި، ލިތުއޭނިއާގެ ޕެއާ އަކާ ދެކޮޅަށެވެ.
