ވެރިކަމަށް އައުމަށް ކުރި ކެމްޕޭނުގެ ތެރޭގައި މީގެކުރިން އިންޑިއާއާ މެދު މިހާރު ސަރުކާރުގެ ވެރިން ދައްކާފައިވާ ވާހަކަތައް ސޯޝަލް މީޑިއާގައި ތިލަކޮށް, ސަރުކާރުގެ ވެރިން ލަދު ގަންނުވާލައިފި އެވެ.
މި ސަރުކާރުން ވެރިކަމަށް އައުމުގެ ކުރިން އަދި ވެރިކަމަށް އައުމަށް ފަހު ވެސް ދިޔައީ އިންޑިއާއާ ބެހޭ ގޮތުން ތަފާތު ވާހަކަތައް ދައްކަމުންނެވެ. އެގޮތުން ރައީސް ޑރ. މުހައްމަދު މުއިއްޒު ހިމެނިވަޑައިގަންނަވާ ގޮތަށް ސަރުކާރުގެ ވެރިން ދިޔައީ ފާޅުގައި އިންޑިއާއަށް ފަޑުވިދާޅުވަމުންނެވެ.
ސަރުކާރުގެ ވެރިން ތުހުމަތުތައް ކުރަމުން ގެންދިޔައީ އިންޑިއާއިން ރާއްޖޭގެ މިނިވަންކަން ނަގާލުމަށް މަސައްކަތް ކުރަމުންދާ ކަމަށެވެ. އެ މިނިވަންކަން އިންޑިއާއިން ނަގާލަން މަސައްކަތް ކުރީ، ކުރީ ސަރުކާރު މެދުވެރިކޮށް އައްޑޫ ސިޓީ ވިއްކާލައިގެން ކަމަށް ވެސް މި ސަރުކާރުގެ ވެރިން ކުރިން ދިޔައީ ބުނަމުންނެވެ.
އޭގެ އިތުރުން, ހދ. ހަނިމާދޫގައި ތަރައްގީ ކުރަމުންދިޔަ އެއާޕޯޓަކީ ވެސް އިންޑިއާއިން ހަން ފެތުރުމަށް ބޭނުންކުރާނެ ތަނެއް ކަމަށް މި ސަރުކާރުގެ ކެބިނެޓުގައި ތިއްބެވި ބައެއް ބޭފުޅުން ވެސް ވަނީ ވިދާޅުވެފަ އެވެ. ނަމަވެސް, ރައީސްގެ ދަތުރުގައި ވަނީ ހަނިމާދޫ އެއާޕޯޓުގެ ރަންވޭ ވެސް އިފްތިތާހުކޮށްފަ އެވެ.
ރައީސް މުއިއްޒު ޗައިނާއަށް ކުރެއްވި ދަތުރަށް ފަހު މާލެ ވަޑައިގެން ހުޅުލޭ އެއާޕޯޓުގައި ހުންނަވައި އިންޑިއާގެ ސަފީރުގެ ހާޒިރުގައި އެ ގައުމަށް ބަހުގެ ހޫނު ހަމަލާތަކެއް ދެއްވި އެވެ. އަދި, އެއް ގައުމަކަށް ބަރޯސާވުން ނިމުމަކަށް ގެންނަވާނެ ކަމަށް ވިދާޅުވެ ކުޑަ ގައުމަކަށް ރާއްޖެ ވި ނަމަވެސް ބުލީ ކުރުމުގެ ފުރުސަތު ނުދެއްވާނެ ކަމަށް ވިދާޅުވި އެވެ.
ވެރިކަމަށް އަހަރެއް ނުވަނީސް ރައީސް މުއިއްޒުގެ ރާގު ބަދަލުވަމުން ގޮސް ކެމްޕޭނުގައި އެ ގައުމާ މެދު އުފެއްދި ނަފްރަތާއި ރުޅިވެރިކަން މުޅިން ތައުރީފުގެ ބަސްތަކަށް ބަދަލުވެ ނިމިއްޖެ އެވެ. އިންޑިއާއަކީ މިހާރު ސަރުކާރުގެ އެންމެ ގާތް އެކުވެރިއާއަށް ވެއްޖެ އެވެ. އެ އެކުވެރިކަން ހާމަކޮށްދިނީ ރައީސް މުއިއްޒު އިންޑިއާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ.
މި ސަރުކާރާއި އިންޑިއާއާ އޮތް ގުޅުން އެންމެ ބޮޑަށް ގޯސްވެގެން ދިޔައީ ސަރުކާރުގެ ޑެޕިއުޓީ މިނިސްޓަރުންތަކެއް އިންޑިއާގެ ބޮޑުވަޒީރު ނަރެންދުރަ މޯދީއަށް ކުޑައިމީސްކޮށް ވާހަކަތަކެއް ސޯޝަލް މީޑިއާގައި ދެއްކުމުންނެވެ. އެކަމާ ގުޅިގެން އެ ޑެޕިއުޓީ މިނިސްޓަރުން ސަސްޕެންޑު ކޮށްފައި ވަނިކޮށް މަގާމުން އިސްތިއުފާ ދެއްވީ ރައީސް މުއިއްޒު އިންޑިއާއަށް ފުރާވަޑައިގަތުމާ ކައިރި ކޮށްފަ އެވެ.
އާންމުން ބުނަމުން ދަނީ ސަރުކާރުން ވައުދުވި ގޮތާ ހިލާފަށް އިންޑިއާ އާއެކު ނުކުރާނެ ކަމަށް ބުނި ހުރިހާ ކަމެއް ކުރަމުންދާ ކަމަށެވެ. އެއާއެކު ސަރުކާރަށް އޮތް އިތުބާރު އާންމުންގެ މެދުގައި ގެއްލިފައިވާ ކަމަށް ވެސް ދަނީ ބުނަމުންނެވެ.
