ބޮޑީބޯޑިން އެސޯސިއޭޝަން އޮފް މޯލްޑިވްސް (އެމްބީބީއޭ) އިން ބާއްވަމުން އަންނަ ގައުމީ ބޮޑީބޯޑިން ލީގުގެ މުބާރާތްތަކުގައި އަހަރުން އަހަރަށް ބައިވެރިވަމުން އަންނަ ޒުވާން އެތުލީޓުންގެ ފެންވަރުު އަންނަނީ މަތިވަމުން ކަމަށް ރާއްޖޭގައި އުފެދުނުް އެންމެ މޮޅު ބޮޑީބޯޑަރު، އަލީ ޚުޝްރުވާން އަހުމަދު (ކުޑަ އައްޔަ) ބުނެފި އެވެ.
ގައުމީ ބޮޑީބޯޑިން ލީގުގެ ދެ ވަނަ މުބާރާތް، ލަބޭރާ ޗެލެންޖް މިދިޔަ ބުރާސްފަތި ދުވަހު ނިމުނުއިރު، އެ މުބާރާތް ކާމިޔާބުކުރީ ކުޑަ އައްޔަ އެވެ. މިއީ، ކުޑަ އައްޔަ މި މުބާރާތް ކާމިޔާބުކުރި ތިން ވަނަ ފަހަރެވެ. މުބާރާތް ބާއްވަން ފެށީއްސުރެ މި މުބާރާތް ކާމިޔާބު ކުރަމުން އަންނަނީ ކުޑަ އައްޔަ އެވެ.
މި މުބާރާތުގެ ފައިނަލަށް ފަހު ވާހަކަ ދައްކަމުން ކުޑަ އައްޔަ ބުނީ، ކުރިން މުބާރާތްތަކަށް ނުކުންނައިރު، މުބާރާތް ކާމިޔާބުކުރެވޭނެ ކަމުގެ ޔަގީންކަން އޮންނަ ކަމަށެވެ. އެކަމަކު، މި ފަހުން އަހަރަކުން އަހަރަކަށް ޒުވާން އެތުލީޓުންގެ ފެންވަރު އަންނަނީ ރަނގަޅުވަމުން ކަމަށާއި، މިހާރު މުބާރާތްތައް ކާމިޔާބުކުރުން އެއީ ޗެލެންޖެއް ކަމަށް ކުޑަ އައްޔަ ބުނެފައިވެ އެވެ.
ލަބޭރާ ޗެލެންޖްގައި ކުޑަ އައްޔަ ވާދަކުރަނީ.---- ފޮޓޯ: އަތޫފް އާތިފް / އަދަދު ސްޕޯޓްސް
"ތިން ވަނަ ފަހަރަށް ލަބޭރާ ކާމިޔާބުކުރީމަ މިހުރީ ވަރަށް އުފަލުން. މިހާރު ދެން ވަރަށް ޗެލެންޖިން، ޒުވާން އެތުލީޓުންގެ ޕާފޯމެންސްއާ އެކު" ކުޑަ އައްޔަ ބުންޏެވެ.
ކުޑަ އައްޔަ ބުނީ ގައުމީ ލީގުގެ ދެން ހުރި މުބާރާތްތައް ކާމިޔާބުކޮށް ލީގުގެ އެއް ވަނަ ހޯދުން އެއީ އަމާޒު ކަމަށެވެ.
މި އަހަރުގެ ގައުމީ ބޮޑީބޯޑިން ލީގުގެ ފުރަތަމަ މުބާރާތް ބުރުނު ޝިކާރުގެ މެންސް އޯޕަން އާއި ޑްރޮޕްނީ ކެޓަގަރީގެ ޗެމްޕިއަންކަން ވެސް ހޯދީ ކުޑަ އައްޔަ އެވެ.
ލަބޭރާ ޗެލެންޖުގެ ފައިނަލްގައި ކުޑަ އައްޔައާ ވާދަކޮށްފައިވަނީ އަލީ ޖާވިދު (ޖާއްޓޭ) އެވެ. ކުޑަ އައްޔަ ފައިނަލް ކާމިޔާބުކުރީ 1.04 ޕޮއިންޓް އިތުރަށް ހޯދައިގެންނެވެ. ފައިނަލް ހީޓުގައި ކުޑަ އައްޔަ ޖުމްލަ ފަސް ރާޅުގައި އެޅިއިރު، އެންމެ މަތިން ސްކޯކުރި ދެ ރާޅުން އޭނާ ވަނީ 6.50 އާއި 4.07 ސްކޯކޮށް ޖުމްލަ 10.57 ސްކޯކޮށްފަ އެވެ. ޖާއްޓެ ފައިނަލުގައި ޖުމްލަ ހަތް ރާޅުގައި އެޅިއިރު، އޭގެ ތެރެއިން އެންމެ މަތިން ސްކޯކުރި ދެ ރާޅުން އޭނާ އަށް ލިބުނީ، 4.00 އަދި 5.17 އެވެ. ޖާއްޓެގެ ޖުމްލަ ސްކޯ އަކީ، 9.17 އެވެ.
ޑްރޮޕް-ނީ ފައިނަލް، ކުޑަ އައްޔަ ކާމިޔާބުކުރީ ޒުވާން ބޮޑީބޯޑަރު އާމިން އުމަރު މޫސާ ބަލިކޮށްފަ އެވެ. ފައިނަލުގައި ކުޑަ އައްޔަ ވަނީ ހަ ރާޅުން 9.33 ސްކޯ ކޮށްފަ އެވެ. އެއީ، އެންމެ މަތިން ސްކޯކުރި ދެ ރާޅުން 4.33 އާއި 5.00 ހަމަކޮށްގެންނެވެ. އާމިން އަށް ފައިނަލުގައި ފަސް ރާޅުން ލިބުނީ 4.30 ގެ ސްކޯ އެކެވެ. އެއީ އެންމެ މަތިން ސްކޯކުރި ދެ ރާޅުން, 1.90 އަދި 2.40 ސްކޯކޮށްގެންނެވެ.
