އިންޑިއާގެ އެހީގައި ހއ. ހަނިމާދޫ އެއާޕޯޓުގައި ތަރައްގީ ކުރަމުން އަންނަ އައު ރަންވޭ ރަސްމީކޮށް މިއަދު އިފުތިތާހުކޮށް، ހުޅުމާލޭގެ ދެވަނަ ފިޔަވަހީގައި އިންޑިއާގެ އެހީއާއެކު އެޅި 700 ހައުސިން ޔުނިޓު ދިވެހި ސަރުކާރާ މިއަދު ރަސްމީކޮށް ހަވާލުކޮށްފި އެވެ.
އެކަން އިއުލާނު ކުރެއްވީ ރައީސް ޑރ. މުހައްމަދު މުއިއްޒު އިންޑިއާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން ދެ ގައުމުގެ ދެމެދުގައި މިއަދު ސޮއި ކުރި އެއްބަސްވުންތަކުގެ މައުލޫމާތު ހިއްސާ ކުރުމަށް އިންޑިއާގެ ބޮޑުވަޒީރު، ނަރެންދުރަ މޯދީ އާއި ރައީސް މުއިއްޒު ދެއްވި ޖޮއިންޓު ޕްރެސް ސްޓޭޓުމެންޓުގަ އެވެ.
އިންޑިއާގެ އެގްޒިމް ބޭންކުން 136 މިލިއަން ޑޮލަރު ހަރަދު ކޮށްގެން ކުރިއަށް ގެންދާ ހަނިމާދޫ އެއާޕޯޓު ތަރައްގީ ކުރުމުގެ މަޝްރޫއުގެ ތެރެއިން އަލަށް ގާއިމު ކުރާ ރަންވޭ އަކީ 2.7 ކިލޯމީޓަރުގެ ދިގު ރަންވޭ އެެކެވެ. އެ ރަންވޭ ޑިޒައިން ކޮށްފައި ވަނީ މިހާރު ބޭނުން ކުރަމުންދާ ރަންވޭއާ ވެސް ވަކި ހިސާބަކުން ގުޅޭ ގޮތަށެވެ.
އެ ރަންވޭ އެއްކޮށް ނިންމައި ބޭނުން ކުރަން ފެށުމުން އެ އެއާޕޯޓުން އަހަރަކު 1.3 މިލިއަން ފަސިންޖަރުންނަށް ހިދުމަތް ދެވޭނެ އެވެ.
އެ ރަންވޭގެ ފުރަތަމަ 1400 މީޓަރު މިމަހު ބޭނުން ކުރަން ފެށޭނެ ކަމަށް އެ މަސައްކަތް ކުރަމުންދާ ރީޖަނަލް އެއާޕޯޓްސް ކޮމްޕެނީން ވަނީ މީގެ ކުރިން ބުނެފަ އެވެ.
ހުޅުމާލޭގެ ދެވަނަ ފިޔަވަހީގައި އަލަށް އަޅާ 700 ހައުސިން ޔުނިޓާ ގުޅޭގޮތުން މާބޮޑު ތަފުސީލެއް މިއަދުގެ ސްޓޭޓުމެންޓުގައި ނުދެއްވަ އެވެ. ނަމަވެސް އެ މަޝްރޫއު ކުރިއަށް ގެންދާނީ އިންޑިއާގެ އެގްޒިމް ބޭންކުގެ ބަޔޯކްރެޑިޓް ސްކީމުގެ ދަށުން ކަމަށް ރައީސް މުއިއްޒު ވިދާޅުވި އެވެ.
