ރަސްމީ ޑޮލަރު ރިޒާވުގެ ހާލަތު ރަނގަޅުކުރަން ސާކް ފްރޭމްވާކްގެ ދަށުން ރިޒާވް ބޭންކް އޮފް އިންޑިއާ އިންދޭ ފޮރިން ކަރަންސީ ސްވޮޕް ފެސިލިޓީގެ އެއްބަސްވުމުގައި މިއަދު ސޮއިކޮށްފި އެވެ.
މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަހުމަދު މުނައްވަރެވެ. އިންޑިއާގެ ފަރާތުން ސޮއިކުރެއްވީ ފިނޭންސް މިނިސްޓްރީގެ ސެކްރެޓަރީ ޝްރީ އަޖޭ ސެތު އެވެ. މިއީ 400 މިލިއަން ޑޮލަރުގެ ކަރަންސީ ސްވަޕެއްކަން އެމްއެމްއޭ އިން މީގެ ކުރިން ވަނީ އިއުލާނުކޮށްފަ އެވެ.
ރާއްޖޭގެ މާލީ ހާލަތު ގޯސްވެފައިވާ މި ދަނޑިވަޅުގައި އިންޑިއާއިން ކަރަންސީ ސްވަޕެއް ހަމަޖައްސަން ނިންމިކަން އިއުލާނުކުރީ ރައީސް ޑރ. މުހައްމަދު މުއިއްޒު މިހާރު އެ ގައުމަށް ކުރައްވަމުން ގެންދަވާ ދަތުރުގެ ތެރެއިންނެވެ.
މި އެއްބަސްވުމުގައި ސޮއިކުރީ މިއަދު ރައީސް މުއިއްޒު އިންޑިއާގެ ބޮޑުވަޒީރު ނަރެންދުރަ މޯދީއާ ބައްދަލުކުރައްވާ ބޭއްވި ރަސްމީ މަޝްވަރާތަކަށްފަހު އެވެ. މި މަޝްވަރާތަކުގައި ރާއްޖޭގެ މާލީ ވަޒީރާއި އެމްއެމްއޭގެ ގަވަރުނަރުވެ ސް ބައިވެރިވެވަޑައިގެންނެވި އެވެ.
އިންޑިއާއިން މިފަދަ އެހީއެއް ދީފައި މިވަނީ ދަރަނި ދެއްކުމުގައި އިތުރު ގޮންޖެހުންތައް ހުރި ކަމަށް ބަލައި، ބައިނަލްއަގުވާމީ ރޭޓިން އެޖެންސީތައް ކަމަށްވާ ފިޗާއި މޫޑީސް އިން ރާއްޖޭގެ ކްރެޑިޓް ރޭޓިން ދަށްކޮށްފައިވާ ދަނޑިވަޅެއްގަ އެވެ.
މިކަމާ ގުޅިގެން އެމްއެމްއޭ އިން މީގެ ކުރިން ނެރުނު ބަޔާނެއްގައި ބުނީ ސަރުކާރުގެ މެދުރާސްތާގެ ފިސްކަލް އަދި ޑެޓް ސްޓްރެޓެޖީ އާ އެއްގޮތްވާގޮތުގެ މަތިން ހަރަދު ކުޑަކުރުމަށާއި އާމްދަނީ އިތުރުކުރުމަށް އަޅާ ފިޔަވަޅުތަކުގެ ސަބަބުން ރާއްޖޭގެ މާލީ ހާލަތު މިހާރަށް ވުރެ ރަނގަޅުވާނެ ކަމަށެވެ. އަދި ސަރުކާރާ ގުޅިގެން ކުރެވޭ މަސައްކަތުން އެ ނަތީޖާއަށް ވާސިލުވެވޭނެ ކަމުގެ ފުރިހަމަ ޔަގީންކަން ވެސް އެ އޮތޯރިޓީން ދިނެވެ.
