މިިދިޔަ ހޯމަ ދުވަހު ފޮރިން މިނިސްޓަރުކަމާ ހަވާލުވެވަޑައިގެންނެވި، އަބްދުﷲ ހަލީލްގެ އަރިހަށް ސައުދީ އަރަބިއްޔާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، މަތުރަކް އަބްދުالله އަލްއަޖާލީން އަލްދައުސަރީ އިހުތިރާމުގެ ޒިޔާރަތެއް ކުރައްވައިފި އެވެ.
ބައްދަލުވުމާ ގުޅޭގޮތުން ފޮރިން މިނިސްޓަރީން ބުނީ ސައުދީ އާއި ރާއްޖެ އާ ދެމެދު އޮންނަ ގުޅުން އިތުރަށް ވަރުގަދަ ކުރުމަށް މިއަދު މަޝްވަރާ ކުރެވުނު ކަމަށެވެ.
މިނިސްޓަރު ހަލީލު އެކްސްގައި ކުރެއްވި ޕޯސްޓެއްގައި ވިދާޅުވީ މަތުރަކް އާ ބައްދަލުކޮށް މަޝްވަރާ ކޮށްލުމުގެ ފުރުސަތު ލިބުމުން ހިތްހަމަޖެހުން ލިބިވަޑައިގެންނެވި ކަމަށެވެ.
"ސައުދީ އަރަބިއްޔާ އާއި ރާއްޖެ އާ ދެމެދު އޮންނަ ވަރުގަދަ ގުޅުމާއި ދެ ގައުމުގެ ރައްޔިތުންގެ ހިތްތަކުގައި ބިންވަޅު ނެގިފައިވާ އަހުވަންތަކަމަށް [މި ބައްދަލުވުމުގައި] އަލި އަޅުވާލެވުނު،" ހަލީލްގެ ޕޯސްޓުގައި ވިދާޅުވި އެވެ.
އޭނާ ވިދާޅުވީ ރާއްޖޭގެ ތަރައްގީއަށް ސައުދީން ވެދޭ އެހީތެރިކަމަށް ޝުކުރު އަދާ ކުރައްވާ ކަމަށެވެ.
ފޮރިން މިނިސްޓަރަކަށް ހަލީލު ހަމަޖެއްސެވީ އެ މަގާމުގައި ކުރިން ހުންނެވި މޫސާ ޒަމީރު ފިނޭންސް މިނިސްޓަކަށް ބަދަލު ކުރުމުންނެވެ. ފިނޭންސް މިނިސްޓަރުގެ މަގާމަށް ޒަމީރު ބަދަލު ކުރެއްވީ އެ މަގާމުގައި ހުންނެވި ޑރ. މުހައްމަދު ޝަފީގު އިސްތިއުފާ ދެއްވުމުންނެވެ.
ފޮރިން މިނިސްޓަރުކަމާ ހަވާލުވެވަޑައިގަތުމަށް ފަހު އެންމެ ފުރަތަމަ ހަލީލު ބައްދަލު ކުރެއްވީ އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރު އާ އެވެ.
