މޯލްޑިވްސް ޕޯޓްސް ލިމިޓެޑުގެ މުވައްޒަފުންނަށް ކޮންމެ އަހަރަކު ވެސް ދެމުން އަންނަ އަހަރީ ބޯނަސް ދިނުން މި އަހަރު ލަސްވެއްޖެ އެވެ.
ކޮންމެ އަހަރެއްގެ ވެސް އޯގަސްޓު މަހުގެ ކުރިން ދެމުން އަންނަ އަހަރީ ބޯނަސް މިފަހަރު ލަސްވެފައި ވަނީ ކޮން ސަބަބަކާ ހުރެކަން ނޭނގޭ ކަމަށް "އަދަދު" އާ ވާހަކަ ދެއްކި ބައެއް މުވައްޒަފުން ބުންޏެވެ.
އެކަމާ ގުޅިގެން އެމްޕީއެލްގެ ރަސްމީ ބަހެއް ނުލިބުނު ނަމަވެސް، ބޯނަސް އަދި ނުދޭކަން އެ ކުންފުނިން ކަށަވަރު ކޮށްދިނެވެ.
އެމްޕީއެލްއަކީ ސަރުކާރު ހިއްސާވާ ކުންފުނިތަކުގެ ތެރެއިން ރަނގަޅު ފައިދާއެއް ލިބޭ ކުންފުންޏެކެވެ.
ނަން ނުޖެހުމަށް ޝަރުތުކޮށް ވާހަކަ ދެއްކި އެމްޕީއެލްގެ އިސްވެރިއަކު ވިދާޅުވީ އަހަރީ ބޯނަސް ދިނުން ފަސްކުރަން ބޯޑުން ނިންމާފައިވާ ކަމަށެވެ.
"އަހަރީ ބޯނަސް ނުދޭކަށް ނުނިންމާ، އެކަމަކު ދިނުން ފަސްކުރަން ބޯޑުން ނިންމާފައި އޮތީ،" އޭނާ ވިދާޅުވި އެވެ.
ޕްރައިވެޓައިޒޭޝަން އެންޑް ކޯޕަރޭޝަން ބޯޑުގެ ތަފާސްހިސާބުތަކުން ދައްކާ ގޮތުގައި މި އަހަރުގެ ފުރަތަމަ ކުއާޓަރު ނިމުނުއިރު އެމްޕީއެލްގައި 2301 މުވައްޒަފުން ތިއްބެވެ.
އެމްޕީއެލްގެ އިތުރުން، އެމްއޭސީއެލްގެ މުވައްޒަފުންނަށް ވެސް އަހަރީ ބޯނަސް ދިނުން ވަނީ މި އަހަރު ލަސްވެފަ އެވެ. އެ ކުންފުނީގެ މުވައްޒަފުންނަށް ވެސް ބޯނަސް ލިބޭނެ ދުވަހެއް އަދި ނޭނގޭ ކަމަށް މުވައްޒަފުން ބުނެފައިވެ އެވެ.
